مدام الفهد :

الحين دوري بأكشني بكري بنوته من اربع سنوات طبعا عوشرت كنت من اول مادخلت التاسع وانا اقول كل يوم بولد وبما انها اول مولود كنت متحمسه وشغوفه الله يرزق كل محروم وفي نص التاسع جاني تحجر طول اليوم مافك معي وتعبت منه رحت اكشف قالت لي الطبيبه الرحم مقفل والتحجر يعتبر طلق لان الجنين يدفع نفسه لتحت وكنت في اوجاع وتساليف وتعاديل وقرب يخلص التاسع وانا ماولدت وخفت من سالفة الطلق الصناعي لاني رحت اكشف بالاسبوع الاربعين وقالوا لي لك اسبوع اذا ماولدتي تعالي طلق صناعي وحددوا لي يوم الثلاثاء قعدت ع اعصابي وما استخدمت اي محفزات لان الرحم كان مقفل جاء فجر يوم الجمعة وباقي ع اليوم الموعود ثلاث ايام بعد صلاة الفجر قمت امشي بالحوش كنت عند اهلي الى الساعه ثمان الصبح وانا امشي واستغفر وادعي الفرج يوم انهد حيلي وادخل اريح جات الساعه 11 حسيت برطوبة رحت اشيك لقيت افراز بملابسي الداخليه بقعه شفافه وشي وردي خفت وفرحت بنفس الوقت رحت لامي اسألها عن هالشي قالت بوادر ولادة انتظري لين يجيك طلق وانتظر طول يوم الجمعه الى بعد العشاء ولا صار جديد مغوص بارده قالت اختي قومي الطواريء نكشف يمكن فتح الرحم ونروح وبعد الكشف قالت الرحم مسكر حسيت باحباط طيب والافراز اللي نزل قالت طبيعي باقي لك وقت انتي بكرية ياكثر ماكرهت هالكلمة 😩 طلعنا وجاء زوجي ياخذني وقلت له بالسيارة اللي حصل وانا محبطه ويوديني الممشى قال انزلي وامشي ومالي حيلة الا المشي وامشي مترت الممشى روحة وجيه الين قمت افوحش برجليني والناس تناظرني وقلت خلااااص تعبت قال ياللا للبيت ونروح وصار بيننا جماع وانام بعد ساعه من نومتي فجر يوم السبت قمت اتألم من ظهري وانا ساجدة وأون بقوة قام زوجي على صوت ونيني قال اشفيك قلت ظهري يعورني واقوم آخذ شاور ويزيد الالم واطلع وانا اتلوى منه واحاول انام كنت اغفى واصحى وامي تتصل علي وارد عليها اذا راحت الطلقه واقول لها عادي مافيه جديد بس نايمه وكنت متواصله مع صديقتي واعلمها وش صار معي وهي مجربة الولاده نصحتني ما اروح الا لما يكون الالم قريب من بعض ومتواصل وانا الالم كان كل نصف ساعه كنت احسب له انتظرت يوم السبت وجاء يوم الاحد وانا على حالي كل نصف ساعه اتلوى الى ان جاء بعد العشاء صار الالم كل ربع ساعه وانا تعبت لانوم زين ولا اكل زين قعدت اتصبر الى الساعه عشرة بالليل ونزل معي افراز وردي للمره الثانيه واروح لزوجي قلت بروح اكشف تعبت وبعد ماكشفت قالت الرحم فاتح واحد ونصف فرحت مره وبنفس الوقت احبطت حسيت اني خذت وقت طويل وانا اتألم وبس واحد ونصف سألت الدكتوره بحماس يعني الفجر وانا والده قامت تضحك علي قالت انتي بكرية يمكن بكرة الظهر طلعت من عندها رحت لبيتي وقعدت امشي فيه واحسب الطلقه كم بينها وبين الثانيه ولما جات الساعه وحده بالليل ماعاد قدرت اتحمل صار كل عشر دقايق طلقه قويه وطويله وتعبت صرت ادوخ من قل الاكل والنوم قلت بروح المستشفى اللي بولد فيه واكيد بيدخلوني ولاده واخذ شنطة المستشفى ونمشي لهم جت الساعه 2 وانا عندهم وتكشف علي قالت لسى واحد ونصف قلت شوفي لي حل تعبت من امس اطلق وبعد بكره طلق صناعي ابي اولد قالت طيب وتسوي لي تحريض كانت يدها خفيفه وسريعه ماكنت اعرف التحريض بس هي علمتني بعد ماسوت وقالت روحي البيت امشي واذا صار الطلق كل خمس دقايق تعالي ويمكن تجين ع الفجر او الصبح بدري طلعت من عندها وما امداني اطلع من السيب قمت ادور الحمام تكرمون حسيت بشيء نزل معي وادخل اشوف الا افراز ثقيل ابيض معه خيوط دم صارت السداده نزلت وزاد الطلق معي احس بحرارة بظهري كنت امشي شوي واوقف اتمسك في باب او جدار اي شي قدامي والتفت على المستشفى وانا ضايق صدري اني برجع البيت اتلوى واتوجع وبعد مارجعنا قعدت امشي وادور بالغرفه واذا وقفت يتشنج ظهري واذا مشيت يحتمي كل شي علي ولا احس بالطلقه زي وانا واقفه ولما جات الساعه خمس حسيت اني خلاص تعبت وزوجي كان نايم واجيه اصارخ شعري كان طاير ووجهي هالات سوداء وشكلي يرثى له هو ارتاع من شكلي وقام بسرعه تروش وانا عند باب الحمام تكرمون اقوله بسرعه خلصني ماعاد مسكتني الارض ونطير للمستشفى وندخل الطواريء وتكشف علي نفس الطبيبه وانا اقول لها بشري تكفين لاتقولين ارجعي البيت قالت خلاص فتح 4 تطلعين الحين غرفة الولادة واستانس مدري وش بواجه بغرفة الولادة ولما دخلت الغرفه كانت بارده وغريبه سرير طفل فيها وسرير له رجلين مرفوعه ولمبة عند السرير وادوات غريبه قعدت اناظر وحسيت ان كل شي برد فيني ولاعاد فيني ولا طلقه خفت اقولهم ويقولون ارجعي للبيت جت الممرضه واعطتني ملابس قالت غيري واعطتني حقنة شرجية بعدها جيت ونومتني ع السرير وحطت علي اسلاك مدري وشي كل شي كان غريب ومجهول وكنت مستسلمه لاي شي تسويه لي الممرضه اهم شي اولد وارتاح ولما جات الساعه 6 رجع الطلق يزيد وقمت اتلوى ع السرير كان ودي اقوم اهج من السرير من قوة الالم ماحبيت شعور الحكرة والربطة وانا اتوجع ورفضت الممرضه عشان اسلاك التخطيط ونبض الجنين يتابعونه واقعد ازن عليهم ابي ابرة ظهر قالت الممرضه لازم تخلصين ثلاث علب مغذي بعدين نعطيك ابرة وقعدت من 6 الى الساعه 9 وانا اتوجع واصيح ابي ابرة ظهر وقطعت القطن اللي تحتي من كثر ما افرك رجولي فيه واناظر المغذي وهو ينزل قطرة قطرة وانا قلبي يحترق ابيه يخلص بسرعه عشان يعطوني الابرة ولما خلص جاء اخصائي التخدير واعطاني الابرة وبعدها ارتحت قمت اصور بجوالي واسولف وركبوا لي قسطرة بول مادريت عنها وجت الطبيبه وفتحت موية الجنين على الساعه عشر ولما جت 11 الضحى قالت الممرضه ادفعي وكانت تراقب الجهاز وتحط يدها على بطني واذا شافت الطلقه قويه قالت ادفعي وكنت ادفع وادفع الى ان جت الساعه 12 الا ربع والجنين يشوفون راسه بس ماطلع جات الدكتوره قالت ترى بحولك قيصري الجنين ضعف نبضه وتبرز وقمت اصيح استنجد بالله يامخلص النفس من النفس خلصني وادفع بكل قوتي وكانت الدكتوره واقفه وتناظرني برحمة وبفضل الله الساعه 12 الظهر يوم الاثنين طلعت بنتي وحطوها على صدري وانا احمد الله انها طلعت وكانت متبرزه كثير وماصاحت تجمعوا عليها ثلاث ممرضات واسعفوها كانت شرقانه والحمدلله صاحت وسمعت صوتها وقعدت الطبيبه تخيطني ودقيت على زوجي وامي ابشرهم وتوته توته خلصت الحتوته

الحين دوري بأكشني بكري بنوته من اربع سنوات طبعا عوشرت كنت من اول مادخلت التاسع وانا اقول كل يوم...

سماسم١ :

ولدي عنده صفار و المستشفى ماراح يطلعونه عادي اطلعه معي للبيت

ولدي عنده صفار و المستشفى ماراح يطلعونه عادي اطلعه معي للبيت