تبغي تجربتي مع الفكس؟! نصيحة للي تالف من راسها

بسم الله الرحمن الرحيم و به نستعين
السلام عليكم و رحمة الله تعالى و بركاته

يعني و الله ما احب ادعي على أحد البنات اللي يكتبو هنا قصص و يالفو و كله كذب في كذب ترى حسبي الله و نعم الوكيل تخسرون العالم فلوس و الاهم وقت و تعطون امال كاذبة ايش تستفيدو يختي ما تبغي تعلمي الناس اللي نفعك لا تعلمي ما نبي علمك ذا بس فكينا من الكذب و التاليف و تذكري اذا افدتي شخص حتى لو ما تعرفينه الا و يرجع لك الخير اللي تسويه
و في خلطات تنكتب نكتـــــــــــــــــــــــــــــــــــــــــــــــــــــــــــــة مهههههزلة و ربي يعني تقرين الخلطة و تضحكين استغفر الله بس ،

ع العموم ...

أبي اذكر تجربتي مع الفكس بذكر لكم تجربتين

عندي المنطقة او الخط اللي بالصدر لونه اغمق من جسمي قلت ابي اجرب اوحده لاحظو ما ابي بياض و لا شي بس ابيه نفس لونه
جربت ادهن الفكس مع كريم و جربت ادهنه لوحده نفس ما الاخت كانت تقول و تقول نتائج رهيبة
من رابع استعمال او اسبوع تقريبا الا المفاجأة!!!!!!!!!!!!!!!!!!!! صدمممممة يا بنات و الله اني خفت خفت النتيجة ما تروح
الا و اشوف بقع في المنطقة لونها اسود اسود و شكلها يخوف لانه مبين شي مو طبيعي و على طول تبت مرة ثانية احط شي
وقفتها الحمد لله تدريجيا راح الاثر
مرة من المراير و انا افر بهالمنتديات لقيت وحدة تقول مادري دكتور القحطاني تقريبا يقول يحذر انها تسبب بهاق و الله انه صادق شفته بعيني
ما حد قالي

للامانة تجربتي سلبية لكن انا اعرف بنات عمتي ياخذون بالعلب 8 علب فكس كذا مرة اشوفهم يشترون يمكن بشرة لبشرة تفرق الله اعلم و يمكن يستخدمونها لشي ثاني ما ادري ما سالتهم

وش بعد ايه وحده تقول حطو عسل حول العين حتى تختفي الخطوط و الهالات و نامو فيها حسبي الله و نعم الوكيل الله ستر على عيوني العسل معروف يشد و مشد قوي بعد قسم بالله صحيت عيوني حولة ما امزح الا احس ان عيوني انحولت مع ان العسل ما دخل داخل عيوني صرت من الخوف مسكرة عيوني حتى ما اتعب بالنظر و الحمد لله بعد اسبوع و شوي تدريجيا رجعت طبيعية

بعد ايش وحدة تقول غسول نيتروجينا مرة حلو للبشرة و اروح اشتريه اللي لونه برتقالي قسم يجفف البشرة بشكل مو طبيعي قوي تركته مرة سيء سيء

و اللي تقول سوو سيروم فيتامين E ما ادري 70 الف وحدة هذا اللي صغير زجاجته شفافة ما يسوي شي غير انه دهني بشكل و ثقيل ع البشرة حتى بعد ما اخلطه باي كريم ثاني و ما شفت له اي نتيجة من النتائج الخرافية اللي يسوقون لها

و اللي يمدحون صنفرة كاب ترى ما فيها شي يهبل لو انك جايبة زيت و سكر يسوي لك العجايب اطلق من هذا الكاب اللي ما شفت منه شي

بنات ليش المبالغة ؟؟؟ ليش ؟! يعني موضوع بيكون التوب اذا مدحتي شي زيادة عن حقه! قولي يفتح شوي .. يرطب.. يحسن نوما ما .. بس ماله داعي الوصف الغير طبيعي الخرافي للاشياء العادية ذي

ما اعرف ايذ اقول استغفر الله العظيم تحبطون العالم معاكم و تبيعون الامل ليش.. حسبي الله و نعم الوكيل
اذا تبغي تصرفي بضاعتك ع العين و الراس هذا رزقك بس اوصفي بضاعتك بالشكل الصحيح ماهوب تضيفين وصف ماله علاقة بمكونات المنتج و خصائصه و قوته