تبغي ولدك يطلع (( رجاااال ))
تبي ولدك يطلع { رجال } مو خكري ودلوع و جنس ثالث ومو قد المرجله ؟!!
.
طبعا كل واحد او كل وحده فيكم تحلم انها تتزوج الزوج الصالح ويعيش الحياه السعيده وينجبون البنين والبنات
والاولاد تسميهم بأسماء حلوه ويطلعون حلوين كل يوم انه طالع شبه مين .. ويبونه يطلع رجل فيه كل معاني الرجوله والشهامه والدين !!
لكن في النهايه
وفي هالعصر
يطلع خكري
مايتحمل اي مسؤولية.. لا شهادة سنعه.. كل همه اللفلفة بالشوارع.. ويمكن تدخين وزنا ومحرمات بعيد عنكم وعنا !!
هذا اذا ما لبس لبس حريم وحط مكياج بعد !!
بتسإلون ليش ؟؟؟ احنا ما قصرنا ؟؟
إحنا وبصوره غير مباشره مقصرين في عيالنا واحنا في نظرنا ما قصرنا
انا همي الاكبر .. الذكور
الرجال
الي صاروا عمله نادره جدا جدا جدا !!
لانه مو كل من ربى شارب وطول ولبس ثوب وغتره رجال !!
الرجال اخلاق وطباع وشخصيه !!!
..
قريت مواضيع كثيرة في هالمجال .. وان شاء الله استفيد
مثل ما انا قاعدة افيدكم الحين !!!
وما ابي منكم الا الدعاء الصالح !!!
.
في شغلات لازم نطبقها... لانه ولد مو بنت !!!!!
وهالشغلات تبتدي من قبل ما يتعلم الكلام
!!!
لان اول خمس سنوات من عمر الطفل هي اللي تحكم شخصيته واطباعه في المستقبل !!!
فحاسبوا على كل شئ !!
............ ......... ......... .......
""الكنية
يعني .. بدال ما تنادونه "دودو" ولا "بوبو" ولا "حمادي" ولا " صلوحي "ولا "ميمو" ...الخ
نادوهم بأسماءهم أو كنيات رجولية مثل "ابو محمد " , " ابو اليزيد" ,"ابو شهاب" ..الخ
لا تقولون طفل وما ادري وشو ... لان بكره مع الكبر ما راح يحب اسمه
- راح يحب ينادونه "دودي
.
حتى سالفه "عبود","حمود","سلوم" هاذي شيلوها .. احترموه علشان يتعود على الاحترام ويتعلم يحترم نفسه هو بعد !!
............ ...
"اخذه للمساجد والمجالس مع الكبار "
بتقولون لا - راح يحوسنا ويحوس اعمامه ولا خواله خليه يلعب بلي ستيشن ... لأأأأأأأأأ!!!!!!!!!
والمسجد ... لازم يروح مع ابوه كل يوم .. حتى لو على الاقل صلاه الجمعه لحد ما يتعلم الصلاه مع الرجال ولو نص نص !!!
خل يروح يتعلم ان في شئ اسمه عباده ومسجد ويتعلم احترام المساجد والصلوات ويسمع الخطبه!!!
ولازم يعلمه ابوه الادب والقعده شلون اهناك !! هاذي مسؤوليته !!!!
............ ...
"نحكي لهم القصص عن بطولات السابقين في المعارك الاسلاميه وغيرها"
بدال ما نحكي لهم عروس البحر والجميله والوحش !!!!
ما في احسن من قصص الانبياء والمجاهدين في سبيل الله والغزوات ..
ممكن تقصونها عليه باسلوب يناسب عمره .. وتبتعدون عن المصطلحات الصعبه !!
علشان يتعلم منها ويعيش جو الرجال والشجاعه وقوة الايمان !!
إذا كنتم مو حافظين القصص اقروا قصص وثقفوا اعماركم في دينكم وحياتكم بالمره !!!!
............ ....
"تعليمه احترام الكبار والادب معهم"انه يحب رأس الكبار في السن وشلون يسلم على امه وابوه ويحب يده وراسه - ولازم من الصغر يتعلم تقبيل قدم الأم والأب وفضل هذا عند الله علشان اذا كبر مايستحي من هالشي ويتكبر عليه .
وان لو في حد كبير دخل المجلس يقوم من مكانه ويوسع له ويخدمه ويقهويه من وهو صغير ويصير سنافي!!
وان مر على أحد يسلم .. وان دخل على مجلس يسلم ..الخ
............ ....
"اعطاء الابناء قدرهم في المجلس"
يعني في ناس يستهينون به كونه طفل
بدال ما يعاملونه كبير علشان يصير كبير فعلا ورجال يفهم !!
فيطردونه او يسخرون منه وكذا .. وهذا اكبر غلط !!!
لازم كل ابو يحترم ولده ويقدره ولا يرضى عليه انه ينهان في المجلس حتى من قبل جده او عمامه !!!
ولا بيظل طول عمره منهان !!!!
............ .....
"تعليمهم الرياضات الرجوليه"
مو كمبيوتر و بلايستيشن و خرابيط فقط << وين المرجله في الموضوع ؟؟
الرياضيات الرجولية يعني الرمايه .. ركوب الخيل .. السباحه... القتال ..
هاذي الشغلات الي تبني الرجال !!!
مو واحد جالس بالمجلس يفتخر ان ولده شاطر في الكمبيوتر فقط
بكره ان احتاجوه في الشده بيقعد يصيح ويبكي ويدور ابوه وامه بدون مايساعد نفسه ويساعد غيره ؟ خخخخخ
الرسول صلى اله عليه وسلم وصى بهالشئ بعد!!
وكانوا قبل الامرا ء والملوك وساده القبيله
اول شئ يتعلمه الولد : القرآن .. بعده الرمايه والسباحه وركوب الخيل والقتال !!!
مو الحين وبالقوة يادوب كوره ومدرسه !!
............ ....
" تجنيب الابناء اسباب المياعه "
الحياه مو مدرسه وجامعه وبعدها يدور على الوزارات يالله بالواسطه وظيفه حكومه !!
لأ
خل من اهو صغير يجرب الحياه يروح مكتب ابوه يشتغل في الصيف وقت الفراغ ..
ينتج شئ
مو يقضي وقت فراغه سفرات وأسواق !!
في امهات واباء يضحكون لما يشوفون اولادهم يرقصون او يتمايلون حتى من يومهم صغار
هاذا غلط
ما في شئ اسمه "لا صغير ياحليله ما يفتهم"
وبعض الامهات اذا الصبي حلو شوي يلبسونه شباصات ويحطون له مكياج وثياب بنات على اساس مزحه !!
وهاذا حرام .. لاتقولون ما يفهم !!!!!!!!!!
............ ......... ....
" تجنب تهينه أمام احد ثاني .. حتى أمام خواله او عمامه "
قوا شخصيته قدامهم تفاهم معه بعدين بينك وبينه
وكثير امهات واباء اشوفهم اذا فشلوه قدان الناس يعني بيتعلم .. وبهذه الطريقة ممكن يتجنب فيها الفعل الي هاوشتيه عليه لكن انتوا ا تدمرون شئ ثاني انتوا مو شايفيه !!!
............ ......... ...
"عدم احتقار افكاره .. وتشجيعه على المشاركه وتحسسيه بقدره واهميته"
هاذي مايحتاج اشرحها .. مفهومه ..
انا شفت هالشئ من اباء وامهات ومن خوات واخوان بعد .. وهذا غلط كبير كبير!!!!!!
لازم تحسسونه بقدره واهميته في المجلس وفي البيت !!!
علشان يحس انه مسؤول ويتعلم المسؤوليه ويدير باله على نفسه وعلى الي حواليه ويفكر بعقل اكبر .. بدال ما يتكل على غيره ولا مبالي بشئ في حياته!!
ممكن كبدايه تسلمونه مسؤوليات بسيطه تناسب سنه !!
ولازم تحترمونه .. بانكم تسلمون عليه وتستشيرونه فيما يخصه وفي بعض الشغلات المنزليه
ممكن تعلمونه كتمان الاسرار بانك تكتمه على سر بسيط معين علشان يحس بقدره وانه مهم لان امنته على هالسر!!
............ ......... ......... .
" تعليمه الجرائه في الشغلات الصح "
لان في فرق بين الجرائه والوقاحه
والله ياكثر الوقحين في الشارع .. صاير الذرب مثل الفقع في الصيف !!
ممكن تعلمونه فن الخطابه وشلون يتكلم نيابه عن ربعه او عن مشكله او في المدرسه
بدال ما يستحي ويضحك على ربعه الي يتكلمون واهو متخبي وراء الكرسي !!
............ ......... .......
"الاهتمام بالحشمه في ملابسه وتجنبه الميوعه في الازياء وقصات الشعر والحركات والمشي وتجنبه لبس الحرير الذي هو من طبائع النساء"
............ ......... ......
"تجنيبه الدلع وحياه الكسل "
اشغليه بالمسؤوليات .. اعطيه مهمات .. ولازم الاب يتولاه ويعلمه شغلات جديده في الحياه !!!
............ ......... .......
" تجنيبه القعدات البطاليه والغنائيه لانها ما تزيد للرجوله ذره.. الا تنقص منها "
............ ......... ....
" استقصوا عن اصحاب واصدقاء ابنائكم "
اعرفوا من يرافق بتعرفون ايش بيصير !!!!!!!!
وهذي مسؤوليه الاب 100 %
............ ......... .......
............ .....
وفي النهايه
اتمنى اني افدتكم
واقولكم مع احترامي
التربيه صعبه لكن
الي مو كفو تربيه لا يجيب عيال احسن
لان فعلا البلد مو ناقصه متخلفين وعاهات
الموضوع منقول
لكن اتمنى منكم تدعون لي ولأبنائي التوفيق والصلاح بالدنيا والآخرة .
180
15K
يلزم عليك تسجيل الدخول أولًا لكتابة تعليق.
جو دبنت الأجاويد
•
بارك الله فيك موضوع رااائع جدا
جزاك الله خير
موضوع روووعه وفي صميم حياتنا مع عيالنا
الله يصلح أولادنا والمسلمين أجمعين
موضوع روووعه وفي صميم حياتنا مع عيالنا
الله يصلح أولادنا والمسلمين أجمعين
الصفحة الأخيرة