السلام عليكم ورحمة الله وبركاته
أنا من لما عرفت حالي حامل وانا مسنترة في منتدى الحمل والولادة خخ وأقرى فهالقصص مرة اخاف ومرة افرح اذا شفت صاحبة القصة ولادتها سهلة ماشاء الله
أنا هاذي ثاني ولادة ليا ... ولدت ابني الاول على 32 اسبوع بسبب انه انفتحت موية الراس في الاسبوع 28 وظليت في المشفى شهر وولدت طلق صناعي واستعملت ابرة الظهر ..فما كنت اعرف الم خروج الراس و لا الولادة الا هالمرة
أنا كان جاني طلق في الاسبوع 32 في هالحمل والطبيب امرني انام عظهري لحتى يبقى الجنين في بطني اقصى مدة ممكنة
المهم اختكم في الله عايشة في غربة وما عندي احد يساعدني وعندي ولد فما اخذت الراحة التامة زي ماقال الدكتور... المهم انا بقولكم هالشي عشان اذا قالك الدكنور راحة تامة يعني راحة تامة مافي اروح اغسل المواعين وارجع هههه
كنت في الاسبوع 36 و5 ايام يوم الخميس 16/02/2012 الساعة 7 الصبح حسيت بموية دافية عديمة اللون والرائحة تنزل مني وما عندي قدرة احبسها.. فزعت من فراشي وقلت اكيد حان وقت ولادتي يعني ماني بكرية عارفة انها موية راس
قمت قلتها لزوجي قالي ان شاء الله ..عارفاه خواف لاني كنت دايما بقوله لما بولد fبتدخل معي وقت الولادة وهو يتهرب خخخ
المهم رحت تروشت شلت الشعر الزايد سشورت شعري وحطيت فوطة للموية ورحت شيكت على شنطة المشفى اذا ناقصني شي
المهم رجعت فراشي ارتاح واقول يمكن مو موية راس لانه مارجع انكب علي شي بقيت الفوطة ناشفة
المهم قلت بستنى تنزل عليا الموية مرة ثانية واروح المشفى ... حطيت موضوع هنا في المنتدى والكل شجعني اروح المشفى..وما انسى وحدة من الاخوات قالتلي الله يسخرلك الاطباء والممرضات والله دعيت معها من قلب ودعيت مع كل الحوامل
رحت 7 المسا المشفى طوارئ كشفت علي الدكتورة قالتلي افتحت موية الراس رح تتنومي عندنا واذا ما اجاكي طلق من هنا ل7 الصبح رح نعمل تحفيز للولادة لانه موية الجنين قليلة كثير وما رح يتحمل كثير
توكلت على الله تنومت وهديك الليلة اقول ياربي يجيني طلق ما ابي طلق صناعي لاني كنت ناوية ما استعمل ابرة الظهر...
المهم صباح اليوم التالي 9 الصبح قمت توضيت صليت وفطرت وودوني للمكان اللي بيولدوفيه
حطولي مغذي و حبة دوا في الرحم عشان يفتح الرحم لانه ماكان فاتح ولا نص سانتي ... وكنت اعزي حالي واقول يا بنت اصبري ولا تستعجلي وان شاء الله خير لانهم قالولي عنق الرحم طويل و قاسي ومانه مفتوح ...يعني مو حالة ولادة ابدااا
المهم ظليت على هالحال وانا صابرة ادعي واقرى قران وسورة الزلزلة ومريم لحتى وصلت الساعة 3 الظهر اجت دكتورة كشفت عليا و حطتلي حبة ثانية و الرحم لساته مسكر ومافي بوادر ولادة
مع الساعة 6 اجى دكتور الله لا يوفقه خوفني وقالي اذا ما انفتح الرحم من هنا ل9 رح نعملك عملية ما رح نخلي الجنين مدة اطول
وقتها خلاص كل الصبر راح وصرت ابكي ما ابي عملية واتصلت بامي الله يخليهالي وهي بتدعيلي وابي بيدعي وحالتي صارت حالة و صرت ادعي يارب خلصني مابي عملية بارب خلصني
في 8 دخلت طبيبة باين انها استشارية او شي مهم لانها كانت بتصرخ عليهم كلهم..وقالتلي هالشي طول كثير...تعرفو الاوربيين ما عندهم مجاملات وقت الجد...لازم تولدي الليلة ورح تولدي طبيعي
المهم كشفت عليا وعملتلي توسيع حسيت وقتها روحي بتطلع بس صبرت وقلت لازم اخلص المهم افتك واولد بقى...لما كملت قالتلي الحين صار الرحم موسع 2 سانتي و كملت فتح موية الراس لحتى يجيني طلق..وقتها ابتدى الظلق بس على خفيف المهم تجيني الطلقة واحاول اتنفس بعمق وادعي وقت الطلقة لحتى تفوت وزوجي جنبي ماسك يدي الله يحفظه ما تركني ولا لحظة من لما فتت الصبح عالغرفة
وصلت 10 ونص بالليل وانا الالام صارت متسارعة وبين كل طلقة وطلقة 3 دقايق ..فرحت قلت خلاص بولد
دخل دكتور كشف عليا ....3 سانتي بسسسسسسسس
سالته كم باقيلي ...قالي اقل شي 8 او 9 ساعات او يمكن للصبح
انا ساعتها تحطمت تحطيم ما يعلم بيه الا ربي ... صارت تجيني الطلقة وابكي قلتلهم بدي ابرة الظهر قالولي الحين مستحيل لانها بتنعمل في غرفة العمليات وهي الحين مشغولة فيها وحدة بتولد.....خلاص اللي كان باقي من الصبر راح...صرت ابكي من الالم واقول لزوجي كيف رح اصبر 8 او 9 ساعات يا رب خلصني وفكنيي
وصلت 11وربع ليلا قلتلهم بدي روح الحمام ...رحت اجلس وما اعمل شي وانتم بكرامة
ناديت على الممرضة قلتلها احس نفسي بروح الحمام بس كاني جاني امساك
بقبقت عيونها فيي وقالت ... رح روح انادي دكتور...اتاريها علامة ولادة وانا ما كنت ادري ... راحت جابت معها قابلة عجوز وةهالاخيرة كانها مكذبتني وخلتها تكشف عليا ... صارت الممرضة تصارخ عليهم الراس بيطلع الراس بيطلع ..والثانية قالتلها ..كيف يعني الراس بيطلع الدكتور لسه شافها وقال بس 3 سانتي
كشفت عليا هي كمان و اتاكدت انه فعلا الراس طالع وصارت هي اللي تصارخ وتنادي الممرضين يساعدوها ...كان زوجي برا عند الباب لانهم بيطالعوه كلما كشفو عليا ...ولما سمع الصراخ دخل مفجوع ...لقاهم بيحركو السرير لياخدوني للغرفة الولادة قام هو سحب السرير وهوما وراه بيجرو خخخخخخخخ وهالشي كلهم بيقولولي لا تدفعي لا تدفعي وانا قولهم هو طالع لحاله احسه خلاص بيطلع
قالولي انزل من السرير واطلع على السرير الثاني قمت انا نقزت من سرير للثاني خخخخخخ من الخوف لينزل برا خخخخ ..صرت ادف وادف خلاص غمضت عيوني وادف بكل قوتي وهوما بيقولولي يالله بنشوف راسه دفي لحتى طلع حبيبي حسيت بثقل و****ل سبحان الله كاني ما كنت اولد ...
سمعت زوجي بيقول يالله ما احلاه وانا والله ما قدرت افتح عيوني من التعب تاخرت كثير لافتحهم واشوفه حطوه على طاولة جمبي بينظفوه و قصو الحبل السري وطالعت وقتها الساعة كانت 23و50 دقيقة من يوم الجمعة ...اكثر شي فرحني انه ولد يوم الجمعة خخخ...راح زوجي اذن واقام في اذنيه وراح يعمله اوراق المشفى وانا ظليت بيخيطوني ...صراحة اكثر شي عذبني هو الخياطة ...ما اثر فيني البنج ..حطولي 4 ابر بنج وحسيت بالخياطة كلها الم لا يوصف الله يجعله في ميزان الحسنات. تالمت في الخياطة اكثر من الولادة نفسها لانهم طول اليوم وهوما بيكشفو عليا صار لحمي كله ملتهب وبالولادة صار اسوء يعني الله يتقبل كل هالالم في ميزان القبول
الحمد لله ابني سميته مروان وكان وزنه ماشاء الله كثير جيد وزن 3 كيلو رغم انه ولد قبل وقته
اعرف اني طولت كثير عليكم بس حبيت تعيشو معي اللحظة خخخ وصدقوني رغم الالم والتعب لما بتولدي كانك ما ولدتي لما بتحملي ابنك بين ايديكي كلو بيتنسى سبحان الله ..النصايح الي بدي اقولها للبكريات ولكل الحوامل انه دعاء الوالدين والله بيفيد كثير انا اكيدة انه ربي يسر علي في الاخير بسبب دعاء والدي لي الله يخليهم ويشفيهم اثنيناتهم يارب ....كمان لما تحسي انك بتروحي للحمام فاكيد بيكون طلوع الراس لانه الممرضة بمجرد ما قلتلها ما ترددت تنادي القابلة...واهم شي كلو كثييييير جبن ومشتقات الحليب في الحمل لاني كنت مدمنة جبن طوال الحمل وتوحمت عليه لانه بيقوي عظام الجنين وبيعطيه قوة يدفع هو كمان وقت الولادة ...
اتمنى اني كنت خفيفة ظل عليكم خخخخ رغم انه قصة ولادتي تاخرت كثييييير بس اليوم لفضيت
واي سؤال انا جاهزة حبوبات
وامانة امااااانة اذكروا الله ان العين حق
ماشاء الله الحمد لله ولا حول ولا قوة الا بالله
سبحانك اللهم وبحمدك اشهد ان لا اله الا انت استغفرك واتوب اليك
يلزم عليك تسجيل الدخول أولًا لكتابة تعليق.
الصفحة الأخيرة
الحمد لله ع سلامتك
ومبررروك ماجبتي