تبين تسوين رجيم ولا تلخبطين لاخر يوم !! بدون حبوب بدون خرابيط بدون هالسوالف !!

السلام عليكم ورحمة الله وبركاته

صباحكم رحمه وخير من رب العالمين ان شاء الله :)

بسم الله ماشاءالله ولا حول ولا قوة الا بالله

خواتي الغاليات

الي تبى تنزل

5 كيلو

او

10 كيلو

او

20 كيلو

او

50 كيلو

حياكم جميعا


انا عندي كم كيلو ناشبات في حلجي احاول انزلهم ما اقدر !!!!

وجسمي صعب جدا في النزوووووووووووووووووول

يومياتي موجوده في الموضوع الي في توقيعي :crap:


مره فوق مره تحت !!!

انا ما كنت جذيه

لو تلاحظون مواضيعي اول ما دخلت المنتدى

ومواضيعي الحين !!!

تبدلت من صبوره لشكايه

من صبوره لملوله

من منظمه الى ما اخلص اي شي في ايدي !!!!:crap:

تفكيري تغير من ايجابي لسلبي :11:

تحولت من القمه الى القاع :sad:



المهم امس تقولي ربيعتي ( صديقتي ) انها نزلت 10 كيلو في شهر يمكن عندكم شويه

بس بالنسبه الها انجااااز تقول اول مره ما الخبط !!!! في الرجيم !!! هيه لازم تنزل اقل شي

35 كيلو عشان تحمل اسال الله ان يرزقها التوئم الي يعوضها عن صبرها في السنين الي فاتت خير يارب

المهم قالت الملل يخرب الرجيم !!!

تاكلين الريوق وتترين الغداء متى بي !!!!

وبعدين تتغدين وتترين العشاء متى بي

والانتظار ممل وايب اليوع !!!!

قالت قلت بشغل نفسي !!!

كانت تشرب مااااااااااي كل ما ياعت ( هذي انا اعتمدها ) وبعد ربع ساعه اذا ماراح اليوع تاكل خيار او تفاح !!!

قالها الطبيب كل ما كبرتي كل ما كان نجاح العلاج صعب !!

وطول ما انتي بهالوزن ما بتحملين ابدا!!!!!

فسوت التالي

1_ تشرب ماي كل وقت وكل لحظه !!!

2_ بدت تشغل نفسها ترتب الغرفه تسوي جرد دقيق تنظف علب الميك اب اي شي تقول ما خطط شو بنظف اليوم او شو بسوي عشان ما احس بالضغط تقول اختار شي بسيط اخلصه انتقل الى شي ثاني وهيه تشرب الماء تقول ما صرت انتظر ابدا الاكل !!!! لاني مشغوله !!! وشاغله عمري في اشيء وايده !!

3_اذا ياعت تاكل الاكل المسموح فقط وتقول بيتي مافيه اي اكل غير الاكل المسموح !!! وريلها ياكل عند اهله

4_ وهذا مهم جدا ما تيلس عند اي شخص ياكل ولا تشوف اكلهم ابدا ولا تشوف اي حد يطبخ ولا تطبخ
غير اكل الرجيم !!!

5_ تقول اسوي رياضه لو 5 دقايق في اليوم ما حدد وقت عشان ما امل واتركها !!!او يانبني ضميري واحس وراي شي !!!

هيه كانت تتمنى تنزل 15 كيلو بس الحمدلله حتى 10 ممتاز اسال الله ان يحفظها من العين ما احلل الي ما يذكر الله ويبارك لها لو في قلبه الى يوم الدين

تقول في الشهر فقدت 10 كيلو وصار بيتي في قمت الترتيب والنظام !!! تقول عمره بيتي ما كان جذيه
حتى ريلها يقولها هيه توني احس انه بيت مريح ( مع العلم هيه بيتها نظيف قبل بس مش مرتب ابدا يعني عادي وصار مريح )



المهم انا امس بديت في رجيم خفيف واليوم قلت بطبق كلامها

انا من الف سنه ابا اسوي فور مات للكمبيوتر وعندي اشيء وااااااااااايده اقول برتبها بنظمها

1_ صور ملابس على اكلات على مستحضرات على عطور على ميك اب على كل شي

2_ محاضرات الجامعه على بحوث على خرابيط مالها اول ولا الها تالي

معني بين فتره وفتره اسوي جرد وامسح واعدل ويترتب بس من كثر الاشيء اقول بعدين بعدين ويتراكم !!!

قلت ببتدي فيه ما حددت شو بسوي ولا كم بقعد

بديت ادخل فايلات عشوائيه ارتب هذا احذف هذا لين مليت !!!

بعدين دخلت على الصور تميت اخلي لكل شي قسمه الول للملابس

الثاني للميك اب وهكذا لين مليت وخليته !!!

رحت للاشيء الي تخص الجامعه الي حذفته الي خزنته والي الي الي !!!

وبعدين بنت الاب توب بس حسيت بشعور حلو !!! اني ما كنت افكر في الاكل وايد !!

رحت عن الاهل وبعدين دق في بالي افتح درج واشوف الي فيه والي مافيه شو ابا شو ما ابا

وخلصته سكرته وبعدين وقفت فتحت النت اتصفح المنتدى وابحث في قوقل بعدين قلت ليش ما كتب

لخواتي صدق نجح الموضوع ما حسيت بالترقب الي قبل مع الرجيم توني باديه بس قلت نبدا مع بعض

1_ نضعف هالكم كيلو

2_ نكون مرتبين ومنظمين عشان تنفتح نفسنا للحياه ( ابا ارجع مثل قبببببببببببببل وهذي افضل طريقه تردني للنظاااام والترتيب )

3_نستفيد من وقتنا بدال هالتسدحات جنا عيايز عمرنا الف !!! اموت وعرف يوم بنعيز شو بنسوي :scream:


وبس هذا الي عندي كل يوم بسوي شي عشان الهي نفسي عن الاكل !! وفي النهايه انا الكسبانه في الحالتين

منوه بتشاركني ؟؟


وعندي فكره حلوووووه

ما يخصها في الرجيم :04:

يوم يكون الطريق طويل او مسافرين او زحمه

طلعي تليفونج او جهازج وحذفي الصور الزايده وكل شي فائض لان الاجهزه الحين بسررررعه تمتلي

فهذا احلى وقت تستغلينه في ترتيب وتنظيم جهازج ومع الوقت بيكون مرتب ومافيه شي فشغلي نفسج بالاستغفاااار والصلاه على الرسول اللهم صلي وسلم عليه

والسلام عليكم ورحمة الله وبركاته:luvkiss: