تبين تغيرين حياتج و مو عارفه اشلون؟..أهلا وسهلا فيج.. هذي اول الخطوات
السلام عليكم يا حوائيات.. أشلونكم
طبعا كالعادة انقطع عن المنتدى لفتره من الزمن وأرجع لكم محمله بكل شي يسركم ان شا الله
قبل ما ابدأ في الموضوع .بقول لكم ان انا مو خبيرة او استاذة في تطوير الذات او مستشارة نفسية..انا باختصار وحدة مريتبظروف مريرة عساكم ما تشوفونها..واعتقد انا تكلمت عن نفسي في مواضيع سابقة عن الأنوثة..انا في الماضي كنت بنت محطمه و تعبانه نفسيا نتيجة للمواقف والظروف اللي مريت فيها..اعتزلت الناس واللي يشوفني يعرف من شكلي اني مهمومه وتعبانه..وجهي كان دائما متجهم وحزين..ماراح ادخل في تفاصيل اسباب هذي الظروف لكن راح اذكر لكم اشلون طلعت من هذي الحالة.... لاني كنت ابحث عن حلول ابحث عن شي يطلعني من الحالة اللي كنت فيها..طبعا بحثت في الكويت و خارج الكويت.... تعاملت مع مرشدين أجانب من مؤسسات كبيرة بامريكا وغير اجانب وخذوا بيدي خطوة بخطوة.. والشي الأكيد انك ماراح تتغيرين و تتحسنين اذا انتي من داخلك ما تبين ولا قاعده تسعين ..اذا انتي يائسة من نفسك و مستسلمة صدقيني ولا اكبر مرشد يقدر يساعدك..
اذا انتي قاعدة مكانك و تنتظرين الفرج ماراح يجيك الفرج..لازم تسعين ..سعي معنوي وهي علاقتك مع الله و سعي مادي يعني تتخذين الآسباب و من هذي الأسباب هو اللي راح اشرحه لكم
وانا وربي أمر على المنتدى واشوف حالات حزينة و مكتئبة و يكون عندي رد لها لكن ما أرد لاني ردي يحتاج جلسة كاملة و موضوع كامل علشان الوحدة فيكم تدرك و تنتبه لاشياء هي غافلة عنها.. واحس اني لازم اقدم شي من اللي استفدته..لآنكم بنات تستاهلون وانا احب اساعدكم ولا ابي اي وحده تكون تعيسة و محبطة
علشان تغيرين حياتج للأفضل لازم تغيرين أفكارج
ليش الأفكار؟؟
((إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنفُسِهِمْ))
خلوني أعطيكم مثال:
تخيلوا معاي .. بنت ذكية وممتازة و دائما تطلع الأولى في جميع المواد.. اتفقوا المدرسات مع مديرة المدرسة ومع والدة البنت و الطالبات انهم يلقبون هذي البنت ب"الغبية".. بدون لا يعتدون عليها بالضرب او اي شي ثاني.. فقط يلقبونها بالغبية سواء في البيت او في المدرسة او مع صديقاتها.. مع توفير كل سبل التفوق و النجاح من ملخصات ممتازة.. و دروس مشروحة.. والمدرسات يشرحون لها بضمير لكن مع نهاية كل شرح.. يقولون لها هل فهمتي يا غبية؟!!
اول ما تدخل المدرسة اول يوم وهي سعيدة.. تخيلوها معاي
لاحظوا شكلها 1- سعيدة و مبتسمة
2- واقفة بثقة
3- يظهر على شكلها الأرتياح النفسي و البهجة
4- تشعرك بالسعادة و التفاؤل بمجرد النظر اليها
5- تشع حيوية و نشاط
شنو تتوقعون شكلها بيكون بعد 3 شهور من تلقيبها بالغبية
شكلها بيكون بهذي الصورة..
شكلها بيكون بهذي الصورة..
حزينة
2- شخصيتها مهزوزة جدا3- خايفه و متشائمه4- بمجرد النظر اليها تشعرين بالحزن
يا ترى شنو اللي تغير في الموضوع؟؟
كتبها موجودة ومحد منعها انها تذاكر.. يعني متوفرة لها كل احتياجاتها للدراسة.. من كراسات .. و الدروس مشروحة و ملخصة بصورة رائعة و ممتازة.. عندها مكتب او درج مريح و لونه يشووق.. و كل سبل الراحة متوفرة لها.. لكن ما الذي حدث؟؟
اعتقد عرفتوا الإجابة...
اللي تغيير فقط تفكيرها. اللي تحول بعد ذلك الي اعتقاد. بسبب المحيطين بها
خلونا نشوف الية مخ الإنسان عند تكوَن هذي الأفكار
لما اقول لكم تخيلوا مجرد خيال ولكن يكون الخيال بقوة واستشعار .. ان في يدك نصف ليمونة واستشعري انها فعلا في يدك.. واعصريها مباشرة في فمك دون توقف..واشربي العصير دون انقطاع..
بتلاقين شكلك بيكون كذا
هههههههه ...لكن هل فعلا اكلتي الليمونة ؟؟!! او في يدك ليمونة؟؟!!.. لا طبعا..اذا ليش عفستي وجهك؟؟؟..
لأن طعم اليمونة فقط موجودة في افكارك.. طعم الليمونة فكرة في عقلك
واعتقد تصير لنا مواقف أحيانا واحنا ناكل وتجي أختك او اخوك او اي احد و يتكلم عن شي مقزز ومقرف ..فجأة تشوفين حامت كبدك و توقفتي عن الأكل... في بعضنا ما تتحمل و تستفرغ اكرمكم الله.... منو صار لها مثل هذا الموقف او مشابه له ترفع يدها هههههههه ...
ليش صار كذا؟؟هل فعلا هذا الشي المقزز او المقرف موجود امامك؟؟!! .. طبعا لا.... هو فقط موجود في خيالك وانتي ركزتي تفكيرك فيه ثم نتج ان الجسم كله استجاب واستشعر هذا الشي وثم تولد السلوك اللي هو الأستفراغ اكرمكم الله ....
المعادلة لعمل مخ الإنسان هي
الأفكار >>> ثم التركيز على هذي الأفكار>>>>ثم تولدت الأحاسيس>>>ثم ظهر السلوك
وقيسي على هذا كل فكرة تظنينها في نفسك سواء كانت فكرة زينة او شينة
مرات نشوف بنت عادية لكن من طريقة كلامها كأنها استاذة او دكتورة وفعلا تحسين انها مثقفة بالرغم ان ما عندها شهادات.. ونبقى محتارين كيف صارت كذا؟؟
وأحيانا نشوف بنت كل مقومات الجمال فيها وعندها شهادة عليا لكن تتصرف مثل الجاهلات و ما عندها ثقة بنفسها و مهزوزة .. ونحتار شنو اللي خلاها تصير كذا؟؟
السبب في الحالتين هو تفكيرهم (طبعا تركيز التفكير يتحول الي معتقد) عن نفسها وولد عندها احاسيس و ظهرت بشكل سلوك
كيف تعدلين من أفكارك؟
سبحان الله ديننا اعطانا كل الحلول لكن احنا مقصرين ومسوين مثل ضعيف النظر يبحث عن نظاراته و هو ماسكها في يده وما يدري
انا راح اقول النقاط لكن اذا مريتي عليها مرور الكرام بدون تطبيق صدقيني ماراح تستفيدين شي وبتظل افكارك اللي ما تحبيها موجودة و تسبب لك النفسية التعبانة او الضيقة او اي شي انتي ما تحبينه.. في ناس يقولون ما استفدنا ولما تدققين و تتحققين معاهم تلقينهم قروا و ما طبقوا... الأساس هو التطبيق
الخطوات لتغيير افكارك الشينة الي زينة:
اولا ذكر الله.. واقصد بالذكر كل شي.. من فروض او نوافل وأدعيةوـذكار الصباح و المساء.. والإستغفار و الصلاة على النبي.. و قراءة القران.. القرب من الله راحة و سكينة
تصيدي اللحظات السعيدة في يومك ودونيها.. خصصي لك دفتر تكتبين فيه شي جميل او اسعدك في يومك..مثلا امك او اختك قالت لك اليوم صايرة حلوة..او اكلتي ايسكريم لذيذ..او شفتي برنامج اسعدك..او قطفتي ورده جميلة..او نحفتي كيلو..كل شي اشعرك بسعادة حتى لو بسيط اكتبيه واحمدي الله و اشكريه ..لا تركزين على الأشياء اللي تسبب لك حزن..مثل اختك قالت عنك شينة او اخوك ما شرا لك اغراضك اللي طلبتيها..الخ لا تكتبينها في الدفتر .. وزيني هذا الدفتر وزخرفيه وسميه اسم تحبينه.. مثلا دفتر السعادة..دفتر الجمال.. دفتر سارونه المزيونه هههههه.. وخليه بجانب سريرك تكتبين فيه قبل ما تنامين في الليل.. أكتبي على الأقل 5 أشياء اسعدتك اليوم ولو اشياء بسيطة وبعد ما تكتبين هذي الأشياء اكتبي بعدها (الحمد لله) .. ليش نسوي جذي لآنك بالطريقة هذي تدربين عقلك انه يركز على كل شي جميل..وهالشي مع الوقت بتحسين انه نابع من قلبك و تحسين بسعادة ..والشي الثاني ربنا قال في كتابه الحكيم (لئن شكرتم لأزيدنكم)..اشكري الله وشوفي كيف حياتك راح تتغير.. احنا عيبنا نقرأ القرآن و الحلول موجوده لكن محد يطبق.. طبقوا هذي الطريقة و شوفي كيف بتكون حياتك جميلة.. ما تلاحظون معاي ان في ناس بالرغم ان ما عندهم لقمة ياكلونها لكنهم سعداء سعادة نابعة من داخلهم من اسرار هذي السعادة هو الآمتنان لكل شي جميل عندهم
ثالثا: اذا حسيتي انك حزينة او قلقة او صار لك موقف يحزن و يزعل ..فرغيه في ورقةاكتبي واكتبي واكتبي فرغي كل حزنك و مشاعرك الشينة في هذي الورقة ما يهم كم صفحة تكتبين.. نص صفحة او عشر صفحات المهم ان كل هذي المشاعر تطلعينها في الورقة..اكتبيها مهما كانت سوداوية او فيها غضب او كره او سب و شتائم..كلها طلعيها في هذي الورقة ثم مزقيها وارميها .. وبعدها راح تشوفين كيف بترتاحين
رابعا: اطلعي واستنشقي هواء ..حتى لو في الحوش..احتكي بالطبيعة.. حطي لك زرع طبيعي عندك في البيت..انا احب شجرة البامبو وزارعتها عندي بكثرة .. و..مارسي شي تحبينه..هواية او اي شي يستهويك ..في بنات يحبون الرقص ارقصي و هيصي هههههههه
خامسا: الرياضة..الرياضة مهمة يا بنات تعدل المزاج لازم يكون عندك برنامج رياضي لا تستهينين في هذي النقطة. وسوي لك برنامج اسبوعي و سجلي انجازك الرياضي خلال الاسبوع..مهم جدا
سادسا: ابتعدي عن المتشائمات اللي منغمسين بمشاكل او اللي يتشكون 24 ساعة ومو قاعدين يسعون للتغير للأفضل او اي صديقة محبطة لانها راح تأثر عليك باحباطها وافكارها ..ادري في بنات بيقولون هذي انانية!! بالعكس هذا حرص على نفسك....صادقي اللي تعطيك تفاؤل و تحفيز .. صادقي الناجحات و السعيدات و صيري مثلهم..
اذا طبقتي هالخطوات باذن الله بتشعرين بالتفاؤل في حياتك.. والأهم ان النتايج ماااراح تظهر في يوم و ليلة ..لا تستعجلين النتايج و استمري واستمري لا توقفين مهما كانت العوائق.. لانك متوكله على رب قادر على كل شي
في النهاية بقول ان هذي التطبيقات في البداية بتلقين صعوبة انك تطبقينها ..تدرون ليش ؟!!
لآنك عايشه طول عمرك وانتي متعوده على طبع معين و فجأة تدخلين لبرنامج واطباع جديدة راح تحتاجين صبر واصرار واستمرار حتي يصير هذي الآطباع متأصله فيك و جزء من حياتك غصب عليك جسمك تعود عليها.
خلي هذي الآية في بالك و اكتبيها و علقيها في مكان تشوفينه على طول.. بتسريحتك مثلا
(لا أبرح حتى أبلغ مجمع البحرين أو أمضي حقبا ) سورة الكهف
هذا قدوتنا نبي الله موسى عليه السلام يعلمنا معنى الآصرار لبلوغ اهدافنا النبيلة حتى لو انها تاخذ مننا وقت طويل..
ديننا عظيم والله العظيم يا بنات