تبين شعرك يرجع قوي وصحي بخلال شهر؟!😍

السلام عليكم 🌹
قبل ابدأ راح اقولكم انو الكلام كثير وتشوفونه صعب التطبيق
لكن صدقوني ابسط منه مافيه اذا طبقتوه
اصلا اذا شفتوا النتيجه راح تتحمسون تكملون ويكون روتينكم الاساسي..
يمكن الاشياء اللي بقولها مكرره كثير خاصة بهذا المنتدى
لكن حبيت انزل الموضوع للي حابه تبدأ بداية جديده😍
،
بقولكم كيف شعري
عادي جدا مو دهني ولا جاف ولا كيرلي ولا خشن يعني وسط متموج ع خفيف
الشعر الطبيعي المعروف😶
كنت اصبغ بالبيت بدون سحب طبعاً
واستشور كثير
اكثر شي كان يطفشني احسه تعبان بالذات من الاطراف
مع اني اقصها لكن برضو يطول تالف
كان طويل بس مو واضح طوله عشان التقصف اللي بالاطراف
ماخليت شي ماجربته من خلطات وزيوت
كان يتحسن بنسبه بسيطه لكن مافيه حيويه
كله بسبب الصبغه والاستشوارررر..!
الفتره الاخيره صبغت بصالون وسويت سحب
وبعدها بشهور رجعت صبغت ثاني وسحبت
شعري صار سلكة مواعين خششن متعقد مايدخل المشط فيه ناششششف باااهت ميييييت كاني الشمس المشرقه
مايمتص المويه بسرعه من قوة الجفاف
وتساقط بشكل فضيع لدرجة قصيته لحد كتفي
ومع الاستشوار يطير مايضبط
وصار قليل لما اخمه بيدي كانو ذيل بسه🥺💔
المهم
لما شفته صار كذا قلت ماينفع معاه الا الحنااااء
وسويت لي جدول بصراحه مو مستمره لكن بالبدايه استمريت شهر وبعدها شعري الحمدلله الحمددددددلله رجع احسن من اول بمليووووون مرا
وصرت استخدم الحناء مرتين بالشهر او استمر اسبوعيا زي الجدول ع حسب وقتي اهم شي مايمر الشهر الا وانا محنيه شعري .. واذا حنيت لازم بنفس الاسبوع زيت وماسك ترطيب لانو الحناء يجفف الشعر ..
خف التساقط صار يطول بشكل ملحوظ يلمع وحيوي واطرافه قويه وصارت الشعره نفسها فيها ثقل ماشاءالله ولا احتاج استشوار مو طاير ولا خشن
واخر مرا استشورت بعيد الاضحى 😍
،
،
هذا الجدول ..
،
(( اول شي قصوا التااااالف لانو اذا الاطراف صحيه وقويه راح يبان طول شعرك ويطول بسرعه ))
الجمعه / حناء وللشعر المصبوغ سدر لكن من تجربتي ماكان يعطيني نتيجه مرضيه لما كنت اصبغ شعري
اللي عنجد غيرلي شعري هوا الحنااااااااء
+ ( مغلي البصل والثوم واذا مستعجله انقع شاهي واعجن فيه الحناء + محلب + ملعقة قرنفل مطحون هذا المقادير الاساسيه مستمره عليها...)
..
اكليل الجبل ، ورق الآس، زبادي ، عسل ، ليمون، مايونيز ، اي نوع زيت .... هذي الاشياء اي شي متوفر عندي منهم حطيته بخلطة الحناء مو شرط كلها اللي متوفر حطيه.
..
السبت / بخاخ الشعر ع الجذور مع مساج ( ١٠ملاعق زنجبيل + ٥ ملاعق اي زيت)
..
الاحد / زيت مع مساج
..
الاثنين / راحه
..
الثلاثاء / بخاخ شعر
الاربعاء / ماسك ترطيب ( اي ماسك ترطيب مو متقيده بنوع معين ع حسب المقادير المتوفره عندي اهم شي يكون يرطب الشعر ، مرات اذا مافحالي اسوي اسرع شي اللي هوا مايونيز وزيت جوز الهند ، اركز عالاطراف اكثر )
..
الخميس / بخاخ الشعر

،
،

بخاخ الشعر مو مستمره عليه
بنات لاتصعبون اي شي
اللي متوفر استخدموه
انا احيانا ماعندي زنجبيل اسوي البديل مثلا منقوع اكليل الجبل ابخ ع شعري و اي عشبه تعرفوها كويسه للشعر نقعوها وخذي مويتها واذا ماتبغي الخطوه هذي الغيها عادي مافيه شي صعب 🥺
لكن اهم اهم اهم ششششي تمشي ع الخطوات الثلاث بنفس الترتيب اللي هيه حناء زيت ماسك ..
______
بالنسبه للشاور ..
خذو شامبو كويس خالي من المواد المضره للشعر تلاقو كثير ف ايهيرب
والشامبو خففوه ف مويه واعملو مساج دقايق للفروه بالشامبو لاتحوسو الشعر بكل الاتجاهات كذا يتقطع ويخرب وخلو الباقي من الشامبو ينزل عالاطراف ..
وكمان مره بالشهر نظفو فروة الراس برضو تلاقو خلطات كثيره انا عن نفسي مسويتلي مقشر للجسم سكر وقهوه وسدر وزيت جوز الهند واستخدمه كمان للفروه بس ازود عليه شامبو قليل ..
بعد الشاور لاتنشفوا الشعر فرك راح يتساقط
لفوه بالمنشفه وخلوه تقريبا ربع ساعه وبعدها نشفوا بالضغط الخفيف وحطوا اي زيت ع اطراف الشعر
وكل شهر او شهرين قصوا الاطراف شي بسيططط
وبسسس هذي عنايتي واسفه اذا طولت
اتمنى تستفيدون🥺 ..
،
دعواتكم🌹
،
(سبحان الله وبحمده، سبحانك اللهم وبحمدك، أشهد أن لا إله إلا أنت، أستغفرك وأتوب إليك)