كيفكم يابنات حوا اتمنى تكونوا جميعاً في أفضل حال
من زمان عن كتابة المواضيع لكن وانا جالسه مع نفسي اليوم افكر في حالي وحال اغلب الناس اخذتنا الدنيا ومحنا حاسين مدري انتم زيي احس الوقت صار بسرعه يمر والسنين تركض فينا واحنا محنا ملحقينن نسوي شي واذا جيت افكر احس ضاع عمري ماسويت شي اطمح له او حققت حلم او شي اتمناه واحنا نركض ورا هالدنيا محنا ملحقين شي نسينا الهدف الاساسي اللي انخلقنا علشانه وهو عبادة الله والعمل للأخره صار كل همنا ذا الدنيا وذا الناس وصرنا نهتم باللبس والكشخه والديكورات وسفر العزايم ونتجاكر بعد اكثر من اهتمامنا بعباداتنا وغير القال والقيل فلانه قالت وعلانه سوت الدين يسر ولاهو مطلوب منا الاعتكاف ولكن انحرفنا بقوه عن المسار اللي المفروض نكون عليه الله سبحانه وتعالى صحيح قال ولاتنسى نصيبك من الدنيا ولكن احنا اولينا الدنيا كل اهتمامنا يابنات والله لو انا مع الله فعلا ومستشعرين وجود الله معنا بكل امورنا كان حياتنا غير يعني الصلاه اللي ننقرها نقر نبي نلحق ع الدنيا وش فيها لو انا تانينا وخشعنا واستشعرنا ان الله يشوف صلاتنا ولازم تكون خاشعه وترا ماتاخذ وقت لكن الشيطان يقول بسرعه لايفوتك شي وغير كذا والله يابنات الشخص مايلقى الراحه الا وهو قريب من الله يعني اقرو معي هذا الحديث بتمعن عن أنس
قال: قال رسول الله 
: { من كانت الآخرة همه، جعل الله غناه في قلبه، وجمع عليه شمله، ثم أتته الدنيا وهي راغمة، ومن كانت الدنيا همه جعل الله فقره بين عينيه، وفرّق عليه شمله، ولن يأته من الدنيا إلا ما قُدر له }شفتوا سبحان الله يعني خلك مع الله ولاتفكرين بالدنيا وبعدها الدنيا بتجيك راغمه كل شي تبينه بيتحقق لك
خلي ذكر الله دايما على لسانك لاتتقيدي بعدد ولا بوقت استغفري هللي كبري احمدي الله اشكريه لاتقولي ابجرب ولاتقولين جربت ومافاد اكره ماعلي ذي الكلمه انتي تبين الاجر ولا تبين ملذات الدنيا لافكرتي بالاجر وفكرتي برضا ربك عليك من غير لاتفكرين بالدنيا ربي لارضي عليك ارضاك وربي مايخيب عبده الصالح ولازم لازم يابنات الثقه بالله وحسن الضن فيه وتيقنوا ان كل شي يصيبنا من الله خير ثم خير الله مطلع على كل امورنا وعالم باحوالنا ويصرف عنا شر اشيا نعلمها واشيا مانعلمها في علم الغيب عنده ووكلوا اموركم لله كلها فهو نعم المولى ونعم النصير ونعم الوكيل يكفينا كل مااهمنا اللي تبي وضيفه اللي تبي زوج اللي تبي عيال اللي تبي اي شي في هالكون وكلي امرك لله ولن يصيبك اكثر من الي كاتبه ربك لك محد بيده يحقق لك شي الا بامر الله وتسخير الله الجأي لله اولا واخيرا لا بد من العمل بالاسباب لكن تيقني ان الله مسبب الاسباب
اقروا ذا الحديث ومن السنة: ما جاء عَنْ أَبِي تَمِيمٍ الْجَيْشَانِيِّ قَالَ : سَمِعْتُ عُمَرَ يَقُولُ : سَمِعْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ يَقُولُ : ( لَوْ أَنَّكُمْ تَوَكَّلْتُمْ عَلَى اللَّهِ حَقَّ تَوَكُّلِهِ لَرَزَقَكُمْ كَمَا يَرْزُقُ الطَّيْرَ تَغْدُو خِمَاصًا وَتَرُوحُ بِطَانًا
اتمنى انكم تستفيدون من كلامي وانا اوصي نفسي في هالكلام قبل اوصيكم والانسان مهما كان عارف ومتعلم يحتاج دائما احد يذكره ويعينه ودعواتكم لي