تتذكرون قصة البنت..سمعوها لو سمحتوا!!

شخباركم عساكم بخير ......

تتذكرون الموضوع اللي كتبته ( خافوا ربكم ياحريم.. شرف الناس مو لعبه)
بتركم مع صاحبة القصه اهي حابه تكلمكم ياليت تسمعونها :

السلام عليكم..
حبيت اشكر كل وحده قرت قصي وحبيت اشكر من صميم قلبي كل وحده شاركت برأيها شكرا لكل وحده وقفت معاي وشكرا لكل وحده وقفت ضدي .. انا بصراحه قريت كل ردودكم على قصتي
انا مالوم كل وحده هاجمتني بس حبيت اوضح لهم شغله ترى انا ماني مثل ماقلتوا عني قليلة اصل او مش متربيه بهالشي ظلمتوني انا ولله الحمد انتمي لعايله كبيره جدا ومعروفه جدا جدا والحمدلله متربيه احسن تربيه .. مافي انسان مايغلط احنا بشر مو ملائكه انا غلطت فعلا واعترف بغلطتي غلطت لما صدقت شخص كان كل غرضه ينتقم مني لسبب انا اجهله وللحين ماني عارفته هالانسان دخل حياتي فجأه حبيته غصب عني حبيته والحب كالموت يأتي فجأه وبدون استأذان حاولت ابعد عنه ماقدرت كان يلاحقني قلت له روح لزوجتك وعيالك انا مانفعك قال اخذت قلبي وعقلي وتبيني اروح انا احبج افهمي احبج من قبل ماتزوجها كان معاي بالجامعه يقول كنت احاول اكلمج بس انتي ماعطيتيني وجه ولافرصه سمعت انج تزوجتي فانا تزوجت بنت عمي بعد زواجي من بنت عمي انتي تطلقتي حاولت اعرف اخبارج انتي اختفيتي مادري وين رحتي لين شفتج فجأه وقدرت اجيب رقمج الحين بعد مالقيتج تبيني اخليج .. ولأني غبيه صدقته لاتلوموني حبيته وقلبي موبيدي تنازلت عن اشيا وايد من شروطي عشان اعيش معاه قلت مايهم اكون زوجه ثانيه بس اعيش معاه وتميت انطر وعده لي لين فجأه اختفى ادق عليه مايرد ادزله مسجات مايرد قالي اتركيني لاتخربين حياتي سبحان الله انقلبت الايه صرت انا اللي بخرب حياته نسى كل شي نسى ان اهو اللي ركض وراي نسى انه كان يبكي عشان اكلمه نسى كل شي صدمتي فيه كانت قويه ماقدرت اتحملها بعد فترة تقدم لي شخص معروف جدا من عايله كبيره جدا جدا دزيت له مسج اقوله دق علي واحد من طرفه يعرف بقصتي معاه قالي اذا تبينه ارفضي هالشخص اهو يحبج ويبيج بس عطيه فرصه لما يرد من الحج طرت من الفرحه رفضت الريال عشانه وتميت انطره رد من الحج نطرت شهر وشهرين ماسأل ولاعبرني حتى الريال اللي من طرفه مايرد علي دزيت له مسج ( احلفك بالله وبشرفك وستر خواتك دنيا واخره ماتبيني تكلم خلني اشوف نصيبي ) مارد علي كرهت حياتي وكرهت كل شي تقدم لي كثير من الناس لو تعرفون منو بتقولون اكيد انتي خبله وماعندج عقل شلون ترفضين ناس كل بنت تتمناهم عشان شخص غدر فيج كرهت شي اسمه رجاجيل تعبت نفسيتي حيل صرت ماانام الا على حبوب مهدئه امي تعبت معاي حيل كنت لما اشوفه بالليل تصلي وتدعي لي واهي تبكي اقول اسفه يمه سامحيني مو بيدي احبه ابوي احتار معاي مايدري شفيني ماقمت اطلع من البيت قاطعت العالم كله بس قاعده بغرفتي وابكي ومعظم وقتي نايمه كانوا رفيجاتي يزوروني ماكنت احس فيهم لين مره تهاوشوا معاي وانا ادري من حرتهم على حالي قالوا كلمه صج حسيت انها صحتني قالوا اهو عايش حياته ولاهمه وزوجته حامل وانتي ذابحه نفسج عليه على شنو من حلاته شنو فيه شي مميز يخليج تحبينه كنا دايم نحسدج على حياتج الله عطاج كل شي جمال واصل وغنى موناقصج شي كل من يتمناج واحسن الناس طقوا بابج وانتي تفكرين بواحد على قد حاله كذب عليج وغدر فيج كلامهم جرحني كثير بعد ماطلعوا رفيجاتي صليت ركعتين وقررت اسافر لمكه وفعلا سافرت اعتمرت بكيت بحرقه عند بيت الله قلت يارب ريحني اذا مالي نصيب معاه شيله من قلبي برتاح بعدها رجعت وسافرت مره ثانيه لعمتي بالرياض عشت عندها هناك كذا شهر لين حسيت نفسيتي ارتاحت الحمدلله نسيته او بمعنى ثاني خلاص اقتنعت ان مالي نصيب معاه رجعت ديرتي رجعت لحياتي قبل ماعرفه اطلع مع رفيجاتي اروح دوامي اروح النادي اروح سينما مرتاحه جدا ماافكر فيه لين شفته صدفه وياليتني ماشفته انا مابي اطول عليكم بس حابه اقولكم ترى التجربه اللي انا مريت فيها ممكن اي وحده منكم تمر فيها او اي وحده من اهلكم لاتظلمون بختكم وتقولون اني مو متربيه او ماعندي اصل اللي صار كان غصب عني
بس ابشركم انا الحين ابتعدت عنه ( من ترك شيئا لله عوضه باحسن منه) وانا ابتعدت عنه لوجه الله قربت من ربنا حيل صرت استغفر وايد واصلي القيام والفجر صرت اشارك بأعمال الخير حبيت ربنا والله ان اعظم حب هو حب الله التزمت باللبس الشرعي
ماكذب عليكم واقولكم نسيته اهو للحين بقلبي وبس المحه او المح سيارته من بعيد يفز قلبي واشتاق له بس ارجع واستغفر الله صعب انساه صعب انسى انسان عاش بروحي صعب انسى كلامنا وضحكنا وسوالفنا صعب انسى انسان ماكنت احس بجمالي وانوثتي الا معاه صعب انسى انسان على ايده عرفت الحب ياالله شكثر حبيته يووووووووووه مهما قلت لكم ماراح تصدقون
بتقولون الوقت بينسيج صعب اذا اهو جارنا واذا بنات عمه صديقاتي واذا دوامه يم دوامي شلون تبوني انساه حتى لما بنات عمه يجيبون سيرته جدامي احاول اسوي نفسي عادي مو مهتمه بس الصج ان قلبي يغني لما اسمع اسمه واتمنى الكلام مايخلص حتى بنات عمه احيانا يتأسفون ويقولون ماكنا قاصدين نجيب سيرته اضحك واقولهم عادي انا نسيته والصج محد حاس فيني الا ربنا ثم مربيتي
الكل قالي مايحبج كان متراهن عليج مع ربعه الكل قالي اهو يتكلم عنج بمجالس الرجاجيل وزوجته بعد جزاها الله خير ماقصرت ماخلت مخيم ماتكلمت فيه عني
بس الله يعلم بكل شي ويعلم من فينا الظالم والمظلوم
اهو تكلم عني كذب علي غدر فيني انا ماقول الا حسبي الله ونعم الوكيل
هذي قصتي بختصار بس بالله عليكم قبل ماتحكمون علي حطوا انفسكم مكاني
انا اعترف غلطت لما سلمت قلبي له بس الله هو الغفور الرحيم انا مااطلب منكم المغفره الغفور هو الله بس ابيكم ماتتهموني بأشيا مو موجوده فيني
شكرا لكم مره ثانيه من كل قلبي شكرا
وشكرا لأختي تعبت احبك انها سمحت لي اتكلم معاكم
وجزاكم الله عني كل خير