تتمنين الطلاق تعالي شوفي قصتي/ استوفى الرد

السلام عليكم ورحمة الله وبركاته




اليوم انا ما فتحت لكم قلبي الا ابي منكم
الدعاء لي بأن الله يعوضني بالزوج الصالح
وابي اذكر البنات ان مو كل زواج رح يتم بالطريقه اللي تبينها وتتمنينها ولا كل زوج راح يسعدك زي مانشوف في الافلام




انا قصتي تبداء من اول مره اهله دخلو فيها لبيتنا طبعاً كانو محددين قبل يجون ومنسقين مع الوالده شافوني وسولفو معي ومع امي بعدها اخوي راح يسأل عنه والناس اللي بالعمل يمدحون فيه خصوصاً ان اغلب شغله مع هنود و عمال ورحنا نسأل عنه في حارتهم الاغلبيه ما يعرفونهم
وافقنا عليه وامه اتصلت تحدد النظره الشرعيه حددناها والمصيبه ان امه تقول انا بجي معه في النظره الشرعيه !!!!؟؟؟؟!؟!؟!
اخواني بيكونون معه شلون امه بتكون موجوده مافهمت؟؟
امه غير سعوديه وغير عربيه فما اخذنا الموضوع بجديه منها وقالت لها امي انه ما يصلح واخوانها موجودين كيف بتكونين انتي معهم
وكان جواب امه (ولدي يستحي)
راح اخوي دق عليه وقال له النظره الشرعيه لك لوحدك وما ينفع حضور احد غيرك قال الرجال طبعاً مافيها كلام واللذي منه.
وما دققنا كثير بهذي السالفه
جا يوم النظره الشرعيه و اتكلت على ربي ووافقت عليه بس للأمانه ما قدرت اشوفه زين تعرفون الوحده تتوتر وتخاف وكل شي ملخبط فيك هذاك الوقت الملكه طبعاً تملكت في 11 رمضان واهلي سوو لي ملكتي في استراحه وماكان في غير اهلي واهله اول ما دخلت ع اهله سلمت عليهم كانت نظرات خواته مو زينه لي و بعدها يناظرون بعضهم
انا قلبي نغزني منهم حسيت فيني شي ولا عجبهم
تمت الملكه ووقعت وبديت تصوير معه
بصراحه كان هو جداً سمين واسمر و تقدرون تقولون اني ما تقبلته
ولما افكر اقول لا انا بعد فيني عيب (حفر حبوب شباب)
كنت اقول في نفسي خلاص عمري 27 لين متى بقعد مو متزوجه
وياما حريم تزوجو وبعدين حبو ازواجهم مع الوقت
المهم حددنا الزواج وانا ما كنت ابي زواج كبير وزوجي كان موافق ع الفكره بعد كم يوم تغير الكلام




دقت امه على امي وقالت نبي زواج انتم تعرفون هو مسكين ما يقدر و ماله ابو ولا اخوان يساعدونه




امي قالت والله حنا ما طلبنا زواج .. امه قالت هذا ولدي الوحيد نبي نفرح فيه
بعدها امي الله يهديها ارتفع ضغطها وقالت هذا زواج ولدكم تبون عرس سووه انتم








وتجيني وحده من خواته ع الواتس اب تقول تقول سويتي ليزر؟؟
قلت لا والله ما سويت ماني من النوع اللي شعره كثير
قالت اها طيب معناته بإمكانك تجيبين طقاقات لأن امك قالت عرس ولدكم مو عرس ولدنا .. انا ما ادري وش دخل الليزر والطقاقات في رد امي بس اللي فهمته ان كلام امي قهرهم








حسيت الموضوع مو بيده بصراحه كل شي خواته اللي يسوونه ويضبطونه وهو يمشي على ما قالو




قلت لها شوفي انا ما طلبت منه يسوي زواج لأني عارفه إمكانياتي وإمكانياته




قالت لي اجل معناته الزواج بيكون طافي ومافيه طقاقات




قلت لها والله الموضوع طلع من يدي ولو باقي شي من المهر مابخلت والله




قالت الله يعين وقلت ماعليه بنقضيها بالديجي حق القاعه




قبل الزواج بأيام دقت علي اخته الثانيه قالت لي معليش دقيت عليك بهذا الوقت بس بقولك وش بتجيبين فطاير او شكولاته؟؟




قلت والله مدري بعدها قاطعتني على طول قالت ردي لي برساله اذا قررتي وش تجيبين منهم
قلت اوكي




وارسلت لها بجيب فطاير وشعبيات طبعاً مو من مهري من فلوس امي الله يخليها لي لأني كنت مزنوقه وقتها




دق علي الرجال قال حجزت استراحه فيها قاعه في المكان الفلاني ان كنتي تبين تشوفينها




قلت خلاص بروح اشوفها وفعلا رحت القاعه ماشي حالها بس اللي صدمني شي غريب ان اهل زوجي حاجزين 11 طاوله ومزينه بأغلى الشمعدانات ودافعين فلوسها




وقالو للرجال تبع القاعه قول للي بتجيكم تبي تكملها ع باقي الشمعدانات خلها تدفعها او تكملها بالنوع الرخيص الثاني
انا كنت احسب اي قاعه تنحجز بكل اللي فيها




وقتها كان مافي يدي شييي
اخترت النوع الرخيص للاسف وكنت مستغربه انهم ما كملوها
رجعت للبيت كلمت اخته عن سالفة الشمعدان الغالي اللي حاجزينه قالت اي حجزنا 11 طاوله عشان معارفنا وتراهم قدام ع اليسار حاجزين لهم يعني اذا جو معارفنا قعدناهم ع طاولاتنا




سكت وما قلت شي ماقلت لاهلي ولا خواتي هذا الموضوع عشان ما ابيهم ينتبهون وقت العرس ابيهم ينبسطون




طبعا وقت زواجي على نهاية الصيف




وكل مره الرجال يأجل يأجل يأجل
ومع ان مكالماته لي مو كثيره ولا امون عليه الا اني قلت له البرد بيدخل وانت تأجل الزواج صعبه الناس يحضرون في برد




قال انتظر اختي لين تولد
؟؟؟؟؟؟؟؟؟
قلت تحضر وهي حامل احسن من انها تحضر وهي نفاس
ولا سمع لي وفعلا حضرت الزواج وهي نفاس لها اسبوع




ماعلينا




تزوجنا و بعد اسبوعييييين بسسسس الرجال يقول لي احملي
قلت له ترا مالنا الا اسبوعين متزوجين وش فيك
قال حبوب منع الحمل مضره وتجيب العقم ووووو
قلت هذول للناس الي ياخذونها مده طويله بعدين اللي يسمعك يقول
وبعد كلمة الي يسمعك يقول ما كملتها
لأني بكر وهو ما قدر ولا ودي ابين له




رحنا بعدها ع شهر العسل وطبعاً تعرفون دوله فيها اجانب يلبسون شورتات واللذي منه




كنت اتابع عيونه وين تروح وماكان يغض البصر ابدد




قلت في نفسي اجل الموضوع مو عضوي اكيد نفسي
لأنه ما قدر وكل مره يفشل
وهو منقهر اني بكر وما يبيني انتبه للموضوع هذا ابد




اللي لاحضته واحنا بشهر العسل انه يشتري هدايا لأخواته
وانا ودي اشتري لأهلي بس صعبه فلوسه مو فلوسي وهو بعد ماعرض علي احس عيب اقول لا وبعد يقول لي اختاري لهم وش احلا شي<بجح




قبل جيتنا ع السعوديه بيومين كان بنص الليل يصحيني من النوم عشان يحاول وانا استسلم ابي ارتاح بعد وافتك
وقال لي انتي ما تساعديني يابنت ال..... كله منك وعطاني بوكس مع كتفي على ترقاتي
احس اني اشوف نقط سودا بعيوني
بعدها رحت اركض اصيح في الحمام
تحسبونه جاني يقول لي معليش
يتأسف ع الاقل
لا يتأسف طيب لو يبتسم لي او يجيب هديه لو ورده مقطوعه من الرصيف




ولاااا شيييي تركني اصيح لما طلع النور من بكره




وطلعت نمت ع الكنب وبعدها صحاني قال يلاه ننزل للفطور قلت ما اشتهيت
ونزل لحاله




طبعاً الفندق اللي انا فيه مافيه بالشقه الا شاهي وقهوه وبيبسي مافيه ولا نوع اكل
ووقتها انا صاده نفسي وخايفه منه تخيلو رجال مايرحم وانتي في غربه




رجع من الفطور اللي تحت وجلس ع الكنب وانا قاعده ع السرير
صار يطالعنيييييييييييييي طول وهو يناظر




قال اللي امس سويتيه رح انساه لك




قلت وش سويت لك؟؟
قال خلي اهلك يعلمونك كيف تسوين
اسألي خواتك وش يسوون لرجالهم








انا حسيت وقتها اني سويت شي غلط
او فيني ريحه او اي شي
مع اني انا انظف منه كل مره ارجع فيها من الطلعه اتحمم كلللللي واسشور شعري وافرش اسناني و احط كريم بجسمي وداخل فراشي انام هذا نظامي حتى قبل اتزوج




وهو مو كثير يتحمم و الفرشايه ما يعرفها ولاحظت انه مايفرش اسنانه واشتريت له فرشاة معي ايام كنت اتجهز ولما طلعتها له قال الدكتور يقول لاتفرش اسنانك
وان كل مافرشت اسناني تطلع منها دم وكذا




شفتو هذا اللي ذكرته كله عندي ولا شي قد البخل البخللللل فيه بخل مو طبييييعي يعني قدام عيوني سخي ع اهله و هداياهم واشترا كام لأخوه كلفته حوالي 11 الف ريال وهو يضحك دفعها
وانا لما احتجت اعالج بمستشفى قال ماعندي تأمين
وانا كنت نازفه من الدوره لأني مشيت حافيه في ملكة اختي ووقفت وبعدها صارت تضرب معي دم كثير وانا نايمه صحيت منهبله وانا تحتي بقعه كبيره حمرا
وهو جمبي وشافها بس تحسبونه يرحم!!!




رحت اتحمم واغير ملابسي لقيت اخته تدق علي تقول لي ترا عادي هذا الشي يصير اشوف انه مو لازم مستشفى انا قد صار معي كذا وعادي مارحت مستشفى




ليش يقول لأهله وانا توني مابعد قلت ابي اروح مستشفى؟؟




كل اللي سواه وداني لأهلي
بس ماقلت لأهلي ولا كلمه ولا قلت ابي مستشفى ولا شي لما اخذني للبيت ومن بكره جاني نوووووم نوووووم فضيييييع ما اقدر افتح عيوني زين وراسي ثقيل
قال لي وش جاك الحين بعد




قلت مافيني شي ابي انام




نمت من رجعت من اهلي الساعه 2 لما بكره المغرب
وهو قاعد بالصاله
حسيت فيه يصحيني ع اذان المغرب
قال امشي اوديك للمستشفى قلت اوكي




رحت البس شوي وتدق اخته علي تقول ترا ماله لزوم المستشفى ترا جاني من قبل وعادي
واذا تبون تروحون مستشفى خذو بطاقتنا حقة التأمين وادخلي بأسمي




هنا تأكدت ان اي شي نسويه لازم نشره مفصله عندهم واذا قررو قرارهم هو اللي يتم




المهم ركبت للسياره ووداني مستوصف قريب ولما جيت انزل قلت ترا اختك والده طبيعي وانا اذا كشفو علي بيلاقوني بنت




قال خلاص افتحي ملف لك و طلع من جيبه ثلاث ميه
اول مره اشوف فلوس من يده من شهر العسل لليوم
ولما دخلتها بالشنطه تتوقعون وش قال!!!!!!
قال (قولي للدكتوره ابي توأم)




نعم؟؟؟
شلون الله اعلم




ما دققت معه اصلاً تأكدت ان اي شي يقوله يكون مدروس ومتكتكين له خواته




فتحت ملف وسوولي كشف حمل وانا اقول للدكتوره ما يحتاج تقول لازم وصار النوم الكثير هو علامه من علامات النزيف وانا مدري




رحنا لبنده تقضينا للبيت وهو ينزل الاغراض انا ابي اشيل اكياس خفيفه بحكم اني تعبانه وهو عارف هالشي




يحملني كرتون عصير سيزر القزاز تعرفون وش ثقله؟؟؟؟ ثقيل مره
ولا تقولون لي يمكن ناسي لانه قال هذا حق المشوار تحملي ماجاك




والله العظيم اتحسر على نفسي واقول انا الغبيه كنت اسمع الكلام ولا اراده ولا شي








رجعت للبيت نمت صحيت وجانا بكره رحت لأهله سولفنا انا واخته اللي دايما تدق وتقول وشوله وشوله وشوله




اتذكر اني من اول ماتزوجت كانت تقول اني مافرحت كثير بزواجي بسرعه حملت




وفجئه سبحان الله قالت لي انا تراني قعدت سنه كامله مع زوجي وانا بكر وصبرت عليه عادي لأني××××××××
عبارة غير لائقة.. تم الحذف
الإشراف
وصارت تعلمني وضعيات




هنا عرفت ان اخوها كب العشاء كله عندهم وصار في نظري زي البعوضه (نكره)




تخيلي زوجك يشرح لخواته تفاصيل جسمك ووش سوا لك ووش سويتي له




قسم بالله جتني صدمه وكرهت الرجاجيل كلهم بسبته
صحيح ان مجتمعنا معطي الرجال الحق وكلمة الرجال مايعيبه شي في امور كثير وفيه حريم يتحملون ما شالله
لكن اتوقع في حد للبجاحه اللي يقولها لأهله هذي




من اول ما رجعنا من شهر العسل وماتمينا اسبوووع بالرياض لينه يقولي اجمعي عفشك انا بروح مع اخوياي للبر ثلاث ايام




قلت اوكي (اصلا ابي الفكه وابي اشوف اهلي وامي)




قلت له دامك بتروح مع اخوياك انا بجتمع بصديقاتي في الملاهي
ويقعد يكشر بوجهي يعني لاتروحين وانا سافهته ولا كأني شفته اصلاً




اخذت اغراضي وطلعنا وصلت لباب بيت اهلي قعدت اناظره
ويناظرني يقول وش فيك
قلت مارح تعطيني شي ؟؟ انت بتقعد ثلاث ايام بعيد
قال بس اصرف واجيك قلت اوكي




نزلت
انتظر انتظر انتظر
ماجاني
ارسلت له رساله
كتبت فيها
وش فيها لو قلت انك مزنوق حبتين وماتقدر تعطيني ترا انا زوجتك سترك وغطاك




رد علي وش دعوى ما اجيك بس نسيت




امي عرفت بالسالفه وعطتني بيدي 500 وقالت ولا يهمك محتاجه شي اصرفي ع كييفك
رحت للملاهي وصرفت اللي صرفت قلت برجع الباقي لأمي وعيتني قالت ابد ما آخذها




بعد كم يوم دق ع اخته اللي برا الرياض ورد ولدها بالتمهيدي




صار يصارخ عليه لأن الولد قال كلمه مو زينه
وصا يتوعده والله لأجيك اطقك حسبته يخوف البزر
و من بكره قال يلاه نروح
قلت وين
قال لبيت اختي اللي ساكنه برا الرياض




يعني بنطق هالمشوار عشان يضرب بزر تخيلو لوين وصل صغر العقل




لميت ملابسي و ركبتها بالسياره و قبل نمشي قلت ابي اسلم ع امي قبل وكنت لي اسبوعين ما شفتها
والله العظيم في نفس اليوم كانت داقه علي ولما سكرت منها قعدت ابكي اشتقت لأمي ولحنانها علي الله لايحرمني منها




مرينا امي نسلم عليها ولما جينا نطلع امي قالت محتاجه شي؟




حسيتها زي السكين في قلبي امي تدري انه بخيل
يبي اهلي يصرفون علي وانا على ذمته والله ما اخليها تصير وليتها على اخلاقك الزينه او اهلك الحبيبين




ولما ركبت السياره معه قلت امي عطها اللي لها




قال بعدين
قلت مو بعدين لنا اكثر من شهر




قال اذا صرفت او اذا رجعنا




قلت تراها عيبه عليك اهلي يصرفون علي وانا على ذمتك




صار يصااارخ
انا قصرت معك ثلاجتك مليانه




يعني التقصير بس بالاكل؟؟؟؟
شفته يصارخ التفت عليه فجئه طلعت من جيبه 500 وهو توه يقول اذا رجعنا اذا صرفت




يعني موضوعه لعانه




قلت له لاترفع صوووتك ترا ملابسي معي




قال انزلي




وانزل بسرعه اخاف يهون
واخذ شنطة ملابسي من ورى وادخل البيت واعلم اهلي انه مو رجال
وكل البلاوي اللي سواها معي بشهر العسل والكلام اللي قالوه لي خواته كللل شييي




اخواني قالو مفروض من قبل تتكلمين




قلت لهم انتم تقولون عيب البنت تقول اسرار بيتها صح؟
وقلتو البنت تصبر صح؟
وانا سويت الاثنين وشفت الرجال مامنه فايده وعلمتكم








عاد هم اغبياء بصراحه صارو يرسلون مسجات لجوال امي فيها سب وشتم وانا ارسل لي مافي بينا نصيب بتجيك ورقتك ومن بكره قطع جوالي




بعدها صارو يجوني بأرقام غريبه ع الواتس حقي ويسبون تراك بتكونين معلقه يا ام وجه محفر يا شبشب الحمام المحفر








وانا بس اصور اورسل لصديقاتي ولأخواني هم ع بالهم اني بتضايق من كلامهم
ومايدرون اني استغليت هذا الشي لصالحي الناس اخذت عنهم فكره




والكل يقول لي احمدي ربك اللي الله نجاك من هذي العائله ولا تورطتي منهم بأطفال كان غصب ترتبطين فيهم للابد




وانا من عرفت شي اسمه قانون الجذب وانا بي اتخيل اني سينقل زي اول واسافر مع اهلي زي زمان وان في ناس جايين يخطبوني وكذا
طبقت كل شي ممكن تتخيلونه عشان اتطلق
خلال ثلاث سنوات




طبعاً ماطلقني الا بعد ثلاث سنوات و كان مطلق ولا علم احد من النذاله اللي فيه والنجاسه واعطى المحكمه رقم غلط ووصف غلط




بس بغيت اشارككم تجربتي الفاشله بس الحمدلله طلعت منها بفائدة التجربه ودروس كثير
وادعو لي بالزوج الصالح