تتميلح عند زوجي واهله وتحاول تطلع نفسها دايما احسن مني.. كيف اتصرف معها../ قديم

السلام عليكم بنات... زوجة اخو زوجي كبيره بالعمر وعندها بنات بالجامعه... تدور المدح وتحب تصير اسنع الحريم بعيون الناس وكل اهل زوجي يحبونهاااا ويحترمونهاااا ومايسمعون فيها... وزوجي من ايام الملكه وهو يمدح فيها وانها نموذج للسنع لدرجه انه سبق وقال لي ليتك تصيرين مثلها!!!.. المشكلة انها بكل اسبوع تدق تعزمني ببيتها وانا مو دايما اروح وصرت اتعذر كثير لاني استصعب رد العزيمه لان هي عندها شغاله وبنات يساعدونها وانا ماعندي الا بنتي اللي عمرها سنه... وزوجي ماخذها من ناحيه انها تقدرني وانا ما اقدرها...!!!!!

الشي الثاني في رمضان كل يومين ترسل لي صحون وانا الحمدلله دايما ارجعها لها مليانه وصرت بفترات اطبخ وانفخ لبيتهم بس.. ولو يجيني منها حتى لو صحن تمر ادق اتصل اشكرها وهي ولاعمرها شكرتني او ارسلت لي مسج.... حتى بصبح العيد شريت لها صينيه شوكلاته فخمه وارسلتها لها وكاتبه عليها عيدك مبارك يا ام فلان.. ولا حتى ارسلت لي مسج شكرا.... واشياء ثانيه كثيره، وزوجي تفسيره عشان العمر ولان هي الكبيره واللي لها الحق..!!! 

حتى لما تعبت وحده من بناتها ارسلت لها بوكي ورد لحد البيت... وبرضو مافكرت تشكرني... وزوجي اي شي اسويه لهم يشوفه عادي وبسيط... وهي اي شي تسويه يقول واااااو هذي وحده عظيمه وفلانه مافي مثلها.... 
حتى ام زوجي ماتثق الا فيها.... يعني تقول لها اسرارها واذا احتاجت شي وصتها عليه... وانا علاقتي مع زوجي ممتازه ماشاء الله بس برضو بعيده مقارنه بزوجه اخو زوجي.... ودايما اعرض خدماتي على خالتي وهي تقول شكرا ماتقصرين ماله داعي وبسسس...

تخيلوا مره كنا طالعين وسويت كيكه جزر صغار بصينيه.. واخذتها مع زوجي لبيت اخوه... وهي اول ماشفتها ضحكت و قالت: ياحليلك يافلانه تعرفين تسوين هالشغلات!!!
انا انقهرت وسكت.. وزوجي ضحك وقال لها منكم نستفيد..!!!!
بالله عليكم مو شي يقهر.. يعني مدري شايفتني طفله عشان تستغرب اني اطبخ كيك.. والاردى رد زوجي عليها... طبعا هي تتغطى عنه بس هو يتعامل معها كأنها ام او اخت كبيره... ويشوفها معصومه من الخطأ...!!!

ماراح اطول عليكم.. اهلي مسافرين للمدينه وتركوا شغالتهم عندي.. وثاني العيد قال لي زوجي ايش رايك نروح دبي نغير جو يومين.. قلت اوكي بس الشغاله؟؟ قال نخليها عند زوجه اخوي... وكان زوجي مصر على ان بيتهم احسن شي واقرب شي لنا وقلت اوكي دامها يومين... ولما رجعت واخذت الشغاله لقيتها متغيره 180 درجه!!! كل شي عندنا مو عاجبها وتقول ان بيت اهلي شغله كثيره وان بيت اخو زوجي كل وحده من البنات تشتغل فيه شوي واكلهم كثير ومدري ايش... الاردى من كذا ان زوجه اخو زوجي طلعت السوق وراحت اشترت طقم ذهب لشغاله اهلي..!!!!!
يعني مدري تبي تخربها والا ايش.. طقم ذهب مره وحده!!! يعني لو معطتها 100 ريال والا 200 معقوله.. بس كذا سخافه واحرجتيني مع امي والله... لكن انا سويت نفسي ماسمعت ولاشفت شي... وزوجي اليوم صاحي يضحك ويقول عسى ماهجت الشغاله؟!! قلت ليش؟؟... قال مدري يمكن انحاشت لبيت اخوي... انا طنشته وقلت له اذا مرت اخوك عجبتها شغاله اهلي وقالت لها انحاشي فمدري والله.. وجلس يضحك ويلعب مع بنته....!!!!

مدري كيف اتعامل معها...
حطيت حدود بس زوجي داخل بالنص..