ضوء حلم :

شوفي اختي . انتي لو سالتي جداتك مو الامهات الكبيرات ماراح تقول لك تفاصيل لان هالامور الكلام فيها عيب . الامهات الكبيرات لحقو على المستشفيات لكن اغلبهم يخاف يروح لها .. ويستمرون يولدون في بيوتهم لين انجبرو عشان تسجيل الاطفال والشهادات . هم بشر مثلنا عانو وتعبو وشقو في حياتهم مايعلمه الا ربي ،، مو عشانهم يمشون فهم بخير . اكبر دليل ان اهل افريقيا لايزالو عايشين مثل عيشتهم وتعالي شوفي مشاكل النساء الصحيه وازواجهم اللي يتركوهم بسببها قسم بالله يشيب لها الراس وتحمدين ربي بكل وقت انك ماعشتي في زمانهم . ما انكر ان المشي والشمس ونوعية الغذاء لها دور ، لكن ماكان يعيش بذاك الوقت الا القوي واللي يتحمل ويصبر . الضعيف والمريض اذا ماعولج صح راح عليهم واحيانا تكون مشاكلهم الصحيه بسيطه لكن بسبب الجهل والجوع والمعاناه يتوفون . لو تسمعين عن قصص الوفيات للحريم والاطفال والله شي يوجع القلب لان حلها كان بسيط جدا لو فيه احد متمرس او يعرف للطب. لو احد ولد قبل وقته وربي كاتب له يعيش راح يعيش والا فمصيرة يموت ،، وبوقتنا تزيد فرص عيشه بسبب الحضانات والعزل والرعايه الشديده له. لو الطفل معترض اما يلحقو عليه بقيصري او بالشفط واول يتركونه لين يتعدل لحاله او يتوفى ببطنها وتولده ميت مخنوق ،، بعضهم يظهر جزء من الراس ويوقف الطلق ويجلس الطفل معلق تحتها يومين ثلاثه لين تولده متوفي او تتسمم هي من بقاء جزء من المشيمه . بعض الحريم دفعها غلط للطفل ويطلع رحمها مع الدفع اما جزئي او كامل .. اذا جزئي تورطت بعدين بهبوط الرحم والالتهابات وسلس البول والروايح الكريهه . واذا كامل لو اللي قابلتها شاطره ترجعه بسرعه وتربط رجليها وتعلقها بالمقلوب . هذا كله كوووم والجهل بالدين والاحكام كوووم ثاني ،، يطلقها رجلها وتجلس كم يوم وتتزوج الثاني ،، والله العظيم وحده من عماتي الكبار مره تعلمنا انها لما كانت شباب زوجها اتفق مع صديقه انهم يطلقون حريمهم ويجرب كل واحد زوجة الثانيه لانهم يتكلمون عنهم وش يصير بغرفة النوم ،، وفعلا صار وجلسو كم يوم ولا اعجبتهم حرمة الثانيه ورجعو طلقوهم وكل واحد اخذ مرته مره ثانيه . اقول لك قصص مخيييفه الله يحمانا من الجهل والمرض .. تبين قصص اشد من كذا فهي موجوده انتي بس اسالي صح واسمعي البلاوي اللي كانت تصير . الاغلب حاطهم اقوام طاهرين من كل الامور السلبيه اللي نسمع بها الان لان اخبارهم ماكانت تنتشر مثلنا الان وان حياتهم حلوة وبسيطه ومدري ايش . لكنهم بشرررر بشر مثلنا بعضهم يسوي اللي اشد من اللي نسويه لكن اغلبهم يمشي على نظام عيب واسترو ماواجهتو عن هالامور والاخبار ، واللي لسانه طويل او جريء هو اللي يحكي لك اللي صار .. بعضهم يسافر او يطلع من بيته مايدري بيرجع لهم او لا . معليش كلامي طويل وطلعت برا الموضوع شوي لكن ماحبيت اطلع وانا اشوف الاغلب يشوف ان الاولين ابطال مامثلهم وان اجسامهم تختلف عننا واننا خرطي ومرضى بالنسبه لهم بسبب اكلنا وهم ماكان عندهم الا الجوع والفقر . قسم بالله اننا في عز وغنى وراحه يتمنون ربعها ولايشوفون عيالهم يبكون من الجوع او يدفنونهم كل فترة وفترة من الامراض اللي تفتك بهم . كل زمن له سلبيات وايجابيات ،،وكل واحد يتاقلم مع ظروفه والحمدلله على كل حال .

شوفي اختي . انتي لو سالتي جداتك مو الامهات الكبيرات ماراح تقول لك تفاصيل لان هالامور الكلام...