تجاربي الرمضانيه

بسم الله الرحمن الرحيم

والصلاةوالسلام على اشرف الانبياء والمرسلين سيدنا محمد وعلى اله وصحبه وسلم اجمعين


اقدم بين ايديكن احبتي تجاربي الرمضانيه اسأل الله ان ينفع بها ولا ارجو منكن الا دعوه بظهر الغيب بالستر والعافيه وان يحفظ اسرتي الصغيره وحسن الخاتمه<< طماعه




طبعا مين منا مايحب السمبوسه واللقيمات وطعم السمبوسه مايحلى الا بالقلي بس تشرب زيت واللقيمات تشرب نص الزيت ومن ضمن مقاضي رمضان تكتبين رول مناديل بالدرزن
عن نفسي نادرا ما استخدم مناديل القلي عند الضروره الي استخدمه للقلي فوط مناشف صغيرة الحجم ومخصصتها للقلي عندي خمس قطع اذا سويت اي مقالي اجهز قبلها فوطتين على بعض في زبديه اغطي الزبديه بالمنشفه نصف المنشفه داخل الزبديه والنصف الثاني برا الزبديه اذا قليت كميه وغطيتالقعر حطيت عليها النصف الثاني الي برا واحط الدفعه الثانيه هالطريقه مريحتني كثير اقتصاد في المناديل وتمتص الزيت كله





السمبوسه لما تقلينها تفرط منك الحشوه وتعدم الزيت !! بكل بساطه عندك طريقتين اما انك تسوين عجين سائل دقيق ومويه وتدهنين اطراف الرقاق قبل تحطين الحشوه وفي اخر لفه تقفلينه بعد

او انك تقلبين السمبوسه في البيض بعدين في دقيق وتقلينه





اللقيمات تحبينها صح !! بس تشرب زيت !! الحل من خلال خبرتي في طريقتين ملعقة نشاء مع العجين والطريقه الثانيه في الزيت لازم تنقلي في زيت غزير وساخن شفتي القدور الصغيره الي تجي مع طقم القدور !!استخدمها لقلي اللقيمات اعبيها زيت لنصف
بعد ما اخلص الكميه الي عندي اخلي النار متوسطه مو واطيه انتبهي تمتص زيت كذا





خاطرك في سمبوسه رقاق في الفرن بس المشكله ماتكون لينه صح!! افضل طريقه هي بخطوتين الاولى تدهنين السمبوسه قبل تدخلينها الفرن بحليب وشوي بيض والخطوه الثانيه بعد ما تتحمر تحطينها على طول في حافظه او قدر يكون مغطى بمنشفه وتغطين عليها والسبب من تغطية قعر القدر بمنشفه عشان مع الحراره راح يندي القدر وتعجن السمبوسه بس كذا افضل يمتص اي ندى .وهالطريقه استخدميها مع اي معجنات عشان تبقى طريه





اذا بتفرمين كميه كميه كبيره من الثوم او البصل لاتنسين تسوين هالخلطه زيت زيتون عصرة ليمون وتحطينها عليها عشان ما تخرب وتظل اطول مده






الشوربه عشان تكون نكهتها قويه وحلوه افرم شبت وكزبره وارش عليهم فلفل اسود واحطهم بحافظه ولما اغرف الشوربه في الزبادي ارش عليهم من فوق هالخلطه جربوها طعمها لذيذ





الفيمتو مايحلى الفطور الا فيه وما نذكر الفيمتو الا نذكر رمضان فيه ناس شفتهم يحطون سكر عليه !! الفيمتو مايبي له سكر يبي له وزنيه انا وزنتي بأي كوب اهم شيء نفس الكوب تقيسين عليه مثلا لكل كوب فيمتو تحطيه في الجك خمس اكواب مويه وزنيته كذا ممتازه اذا تبينه ثقيل زيدي فيمتو واذا تبينه خفيف زيدي مويه بس بطريقتي وزنيته وسط



بالنسبه لمقاضي رمضان عمري ماشريته دفعه وحده !! كل اسبوع له قائمه وبكذا اللهم لك الحمد مايبقى عندي شيء زايد واعرف وش خطتي للاسبوع بدال ما اقوم الظهر افكر وش بسوي!! ويضيع وقتي الي المفروض اقضيه في قراءة قران او صلاه



الاغلبيه خاصه الي ماعندها شغاله تشيل هم المواعين بعد المغرب والكركبه وقت الفطور صح !!
انا سبق وذكرت طريقتي ولا زلت اتبعها ومريحتني اللهم لك الحمد اني اجيب طشت اعبيه لنصف مويه وشوي كلوركس واي شيء استخدمه ع الطشت على طول وبكذا يظل المطبخ نظيف بس ماعليك الا تغسلين مواعينك بسرعه وخلاص وغالبا استخدم صحون وملاعق واكواب بلاستيك ولو فيه ترمس قهوه بلاستيك شريته هههههههههههههههه





طبعا الاغلبيه الحين يفرز لرمضان خاصه الي ماعندها شغاله بس التفريز يبي له فن لانك لو حستي التفريز انتي بتتورطين !!
اولا لازم تشترين ورق زبده ينباع في رول مثل القصدير .. ليه ورق زبده !! انا اقول لك لانك لما تفرزين وتحطين بين الطبقات مناديل احيانا ماتفك المناديل وممكن تتشرب مويه بس ورق الزبده مرييييييح تشيلينه بكل سهوله مايلصق ولا يتعب
وطريقة التفريز الصحيحه مثلا بتفرزين سمبوسه تجبينها وتحطينها في تبسيه وسط وتدخلينها الفريز حتى تجمد قطع السمبوسه اذا تجمدت ترصينها في علبه للحفظ وتحطين ورق زبده وترجعينها الفريز وتجيبين الدفعه الثانيه من السمبوسه وتجمدينها بنفس الطريقه السابقه وتجيبين الحافظه البلاستيك وتحطينها فوق السمبوسه الي تحت بس طبعا بينهم ورق زبده بكذا تقدري تاخذي سمبوسه بالعدد الي تبينه بدون مايكون ملصق في ببعض



الخبز . الرقاق . التوست . اذا بقي عندك كميه ماتبينها رصيه في صحن كبير وحطيه تحت المروحه او في الحوش وحطيه في كرتون او كيس والي بيرمي الزباله وانتوا بكرامه خليه ياخذ الكيس ويعلقه ع الزباله على جنب !!ليه !!
انا اقول لك الي يشتغلون في البلديه يدورون مثل كذا ويبيعونه للي عنده حلال وبكذا كسبتي اجر في العامل وما رميتي النعمه
ونفس الشيء برضوا لبقايا الخضار والاكل جمعيهم في كيس لا ترميهم وعلقيهم برا والي عندها شغاله تعلمها انها تفرز الاكل الباقي في كيس تراك مسئوله عن النعمه الله لايغير علينا





اذا عندك خادمه مسلمه تذكري انها صايمه مثلك !! مدي يدك معها لاتنهكينها من الصباح حتى المغرب واذا جا وقت الصلاه ذكريها واعطيها وقت تصلي وخلي لها وقت تقراء قران اكسبي اجرها جيبي لها كتيبات عن فضل رمضان وكيف تصومه صح ترى بعضهم عندهم خزعبلات وتقاليد منافيه لدين وان شاء الله تكسبين الاجر



لاتنسين اجر تفطير الصائم فيه طرق كثيره من ضمنها ترسلين فطور للمسجد ..تدورين عائله فقيره واذا عندك مواصلات ترسلين لها من فطورك اليومي .. ابواب الاجر كثيره بس يبي لنا ندور وبنلقى


صواني الفرن غلفيها بقصدير قبل ماتحطين فيها شيء وبكذا تشيلين القصدير وترمينه وتبقى صوانيك نظيفه بدون دعك ولا فرك


اللحمه والدجاج قطعيهم قطع صغيره لشوربه وقطع كبيره للكبسه ومفروم لسمبوسه وفرزيهم في اكياس على قد طبخاتك ولا تنسين عزيزتي اي شيء مفرز خاصه اللحوم طلعيها من الفريز لثلاجه من اليل عشان تفك على مهلها او برا الثلاجه من الظهر كذا اصح ماتفقد كثير من فوائدها




واخيرا اذكر نفسي واذكرك رمضان شهر عباده وليس شهر فضائيات واكل استغليه بقدر استطاعتك ولاتنسي احتساب اجرك في كل شيء حتى لا يضيع تعبك