تجاربي مع الإسقاطات

كيفكم كروشات... أسأل الله العلي القدير أن يحفظكن ويحفظ مافي أرحامكن وتلدون بالسلامه




أنا لي تجربتين إسقاط تنذكر ولاتنعاد يارب...
 لإن الإسقاط مؤلم نفسيا قبل مايكون مؤلم جسديا




التجربه الأولى بعد إنجاب بنتي البكر الله يحفظها حملت وماكنت ابغاه لإن بنتي صغيره واستسلمت للأمر وقلت كله خير ونعمه من الله وتم الحمل شهر ونص تقريبا وصار جماع وماكان عندي علم إن الجماع مضر وقت الشهور الأولى وصحيت الصباح على إفرزات ورديه خفت وعرفت إنه فيه شي رحت المستشفى وقالوا تنويم ونوموني 3 ايام عندهم ملطوعه .....في الأخير طفشت وخرجت على مسؤوليتي ورجعت بيتي جلست يوم ورحت تعشيت عندي أمي ويحوسني بعد العشا طلق خفيف زي حق الدوره وادخل الحمام ويقوى أكثر ونزل الجنين في الحمام طبعا انرعبت وماقدرت اشوفه كثير شكله لحمه ماتكونت ودقيت على زوجي وطيران على المستشفى وفحصوني وقالوا لازم تنظيف ودخلوني الفجر ونظفوني طبعا عملية التنظيف مرررره سهله تغمضين تفتحين تلاقين نفسك خلصتي وتنومت يوم وخرجت بعدها
هذا الإسقاط ماأثر علي نفسيا عادي 




طبعا جلست ثلاث سنوات وحملت في ولدي الله يخليه.... وبعد ماكمل ولدي السنتين قررت الحمل وحملت وكان كل شي تمام وكان. حملي وحامه شديد مررره كرهت نفسي اقوى من وحاماتي السابقه كلها وقريت مره معلومه انه كل مازاد عدد الحملات كل مازادت أعراض الوحام 
ونزل عليه خيوط بني وافرزات وخفت ورحت للدكتورتي وقالت ماعندك إلا العافيه وهذا تجمع دموي في المشيمه مامنه خوف وأعطتني مثبت وإستمريت عليه وانقطعت الإفرازات البنيه
ومرضت بعدها بفتره مرض شديد التهاب بصدري وزكاام ماكنت قادره انتفس مررره بسبب البرد الشديد وطحت في الفراش بسبب قلة الاكل وهبوط الضغط وطبعا رحت طوارئ الولاده أعطوني اكسجين وأعطوني مسكن مناسب للحمل وأعطوني مضاد قوته 500 وأدول خافض حراره وقريت عنها كلها قبل ماأبلعها  إذا فيها ضرر. وقريت حوامل إستعملوها وماسوت لهم شي وبلعتها وتعافيت




وبعدها بيومين إنقطعت أعراض الوحام فجأه وصرت خفيفه رجعت عاديه زي كأنه مافي حمل وماحطيت في بالي قلت أكيد إني دخلت الخامس وخفت أعراض الوحم
 وبعد إسبوعين رحت أكشف بنت ولا ولد ولما كشف الدكتور بالجهاز قال مافي نبض سبحان الله ربي ربط على قلبي وقلت الحمدالله على كل حال وقلي متوفي من فتره 
عرفت وقتها انه من يوم انقطع الوحم فجأه
ورحت المستشفى قالوا لازم طلق صناعي لإنه مي. عن طريق قسطرة يضخون فيها دوا الطلق ويربطوني وبيعزرون فيني وانا ماقد جربته الله لا يجعلني أجربه أكرهه وأنا ماعرفته..... قلتلهم أبدا ولاتحطون يديكم عليه... وخرجت على مسؤوليتي وانا خايفه وبصموني وطلعت واهلي وزوجي يهاوشوني ليش اطلع و يقولون لازم يخلصونك منه لانه ميت
طنشتهم ههههههههههه
ورحت لدكتورتي في مستشفى خاص وقالتلي لاتشيلين هم تعاليلي بوكره وانتي صايمه وبحطلك تحميلة طلق صناعي خفيفه في المهبل تفتح لي عنق الرحم شويه بس تساعدني وبعدين أخدرك كلك وتنامين وأكمل شغلي...... فرررررررحت بغيت أسلم عليها من الفرحه وقلت أخيرا بتخلص منه من غير ألم قوي
ورجعت بيتي مرتاحه وأدعي ربي يخلصني بالسلامه  ونصحتني وحده من صديقاتي الله يوفقها ياربي ويرزقها أشرب الحلبه وسويتها مع القرفه والزنجبيل وأنا أصلا من يوم عرفت إنه ميت شربت قرفه وزنجبيل لغاية مالاعت نفسي
وفي اليوم الرابع صحيت بنتي للمدرسة ولبستها وكنت أحس بألام خفيفه طنشت قلت خلاص الظهر موعدي عند دكتورتي بصبر ودخلت فراشي بنام وبردااانه وحنسيت بالألام تنتظم مثل الطلق وعرفت وقتها إنه ماعاد يمديني أروح لدكتورتي ورحت قربت ظهري وبطني من الدفايه ابغا الرحم يدفى ويفتح أكثر وبسررعه رحت تحممت والحمدالله كنت مجهزه أغراضي واتصلت في زوجي جا طيران وعلى الطوارئ بسرعه وتوني داخله عليهم وبعطيهم إسمي إلا يجيني ذاك السيل من بين رجولي دم كثيير وعلى طول نوموني على السرير واتجمعوا وفتحوا رجولي وأنا لسه بعباتي ومغطيه وجهي  وقلي الدكتور خلاص كل شي نزل أنا شايف البيبي في المهبل ساعديني أسحبه وطلعه صغيروون يهبل قد كف الدكتور زي اللعبه
 النيرسات مستانسين عليه ماقدرت أتأمله وقتها من الخوف والفجعه اللي جتني والنزيف استمر بشكل مرعب عددددددمت الدنيا وكل مالبسوني لبس نظيف وغيروا شرشف السرير والفرشه القطن اللي تحتي اعدمها مرره ثانيه بالدم يمكن اربع مرات يغيرون لي والدكتور خاف جسمي يجيه صدمه من كثر مانزفت وفحصني وقال لسه المشيمة مانزلت ولازم تنظيف ودخلوني العمليات ومثل المره الأولى غمضت فتحت قالولي خلاص خلصتي
طبعا كسرة النفس والحزن حسيتها بعد ما طلعوني الغرفه انه حملي مااكتمل وطلعت من غير ولدي وحسيتها اكثر وانا خارجه من المستشفى حسيت اني خاويه ولدي مو في بطني وكل وحده طالعه بمولودها إلا أنا والأيام اللي بعدها جاني بكا غير طبيعي دموعي تنزل غصب عني ونكداااانه عرفت إنه من الإجهاض وهرموناتي متلخبطه 
واللحين جالسه أراجع والدكتور قلي لاتحملين اللحين بعد ثلاث شهور لأنه الرحم مرهق. وبسسسسسسسس
وسلامتكم ان شالله أكون ونستكم وأفدتكم