مرحبا
اخوات ابي اطرح عليكم تجربتي مع 40 خطابه وانتم احكمو
قصتي اني كنت ما انخطب ابدا ففكرت اني اكلم خطابات صدق اني كنت ادعي واستغفر ومتوكله على الله ولكن قلت خليني افعل الاسباب فكنت اجمع ارقام خطابات من النت ومن الجرايد وكل خطابه تدلني على خطابات مثلها فكنت كل يوم ادقدق على 2 او 3 منهن وهذا كان قبل العام كان عمري 28 او29 وكانت اقول للخطابه شرطي ابي يا اعزب او مطلق بدون اطفال واهم شي اذا لقيتو لي واحد كلمي على جوالي وشاوريني اولا اذا اقتنعت عطيتك رقم الوالده الثابت وتعطينه اهل الولد وهم يكلمون امي اما انتي يا الخطابه لا تكلمين امي ولا ابي الناس يدرون اننا موصينك ابي الامر بسريه تامه المهم شوفو تجاربي معهن
1- وحده جابت لي واحد ماهو من ثوبنا ابد ففكرت وقلت لازم اتنازل وعطيتها رقمنا الثابت وعطته ام الولد وجو تقدمو لنا وشافه الوالد ولما سئل عنه طلع سكير ورفضناه وكلمتني الخطابه وقالت ليش رفضتي قلت السالفه كذا وكذا تدرون وش سوت راحت اخطبت له وحده ثانيه ويوم تملك دقت علي تبشرني وتبيني اتندم عليه وما الى ذالك قلت لها سبحان الله قلت لك الرجال سكير وبعدين تخطبينله ما تخافين الله ردت علي قالت انت يمكن اهللك يكذبون عليك ما هو سكير ولا شي وبعد شهر كلمتني وقالت ان فيه ارمل عنده كومة بزران وما يدري وش يلحق وعنده عيال يدرسون ويبي وحده ترعاهم معه انا رديت عليها قلت انا ما ابي احد معه عيال وانت عارفه رايي من البدايه قالت خلاص وبعد اسبوع كلمت قالت عندي واحد مطلق وعياله كبار وبعظهم متزوجين انا عصبت قلت لها الحين اقولك ما ابي احد عنده عيال وكل مره تجيبين لي اردى واردى وش الله حادني على الشيبان لا وبعد جد وعياله متزوجين قالت لانك كبرتي وما الى ذالك المهم وبكل وقاحه سكرت السماعه بوجهي
2-ووحده كلمتها وقالت لي بكل وقاحه يوم عرفت عمري قالت لي عمرك مره كبير ما اضن احد يرضى فيك الا المتزوج انا سكرت السماعه وان ودي ابكي بس قلت الله ياثرني
3- ووحده كلمتني قالت فيه واحد على قد حاله قلت خليهم يكلمون الوالده وهذا رقمنا الثابت بس هاه لا يدرون اهل الولد اني اعرفك ابي الامر بسريه تكفين المهم جو الحريم وكانو سمر مره مره مره وبعدين راحو ولا حس ولا خبر ودقيت على الخطابه قالت ان ام الولد واخته يقولون ما اعجبتنا البنت لو انها حاطه كريم مبيض
انا وانا والله يا اخوات ما امدح نفسي انا بيضاء مره بياض حلو انا انقهرت مو عليهم لا والله ما هموني الي قهرني الخطابه ليش تقولي الي قالوه عني اني فيني كذا وماني حلوه يعني مالها حق والادهى والامر انها قايله لهم قبل ما يزوروننا اني اكلمها واتواصل معها واني طالبه منها تدور لي على رجال وانا كنت امنتها على سري وشوفو راحت وفضحتني وبتفضح بنات غيري
4- ووحده كلمتني وقالت فيه واحد متعلم بس هو كلمني وقال لازم اكلم البنت قبل ما اكلم اهلها انا قلت للخطابه وانت عادي عندك اي واحد تعطينه ارقام بنات المسلمين صاحيه انت قالت ما فيها شي
والله اني سكرت منه وانا متضايقه وبغيت ابلغ عنها الهيئه بس قلت الله بيحاسبها
5- ووحده قلتلها ما ابي اخت الولد تدري
اني انا الي مكلمتك وطالبه منك تدورين لي وبكل غباء كلمت اخت الولد وقالت لها انا صراحه ماقد شفت البنت بس البنت يوم كلمتني قالت لي انا بيضاء ومواصفاتي كذا وكذا
6- وحده كلمت امي على الثابت وقالت لها عندي واحد كذا وكذا ويوم جاء المغرب وكانو ابوي واخواني مجتمعين الا كلم الرجال والحمد لله اني انا الي رديت عليه كان صوته مره مخيف كنه مو صاحي تدرون وش قال ياليته قال وين الوالد لا قال الو وين امك انا صرفته وبعد ما نزلت السماعه قلت الحمدلله ان مو احد من الاطفال رد عليه وبعدين جاء لم امي وقال لها فيه رجال يبي يكلمك وابو جالس كان امي انهدم بيتها لا والرجال كلامه مو صاحي
7- كثير تكلم وتجيب لنا رجال واذا كلمو الوالد وقال لهم حياكم الله اختفو ويطلعون لعابين قلت بنفسي زاد ياربي انا كنت استغرب انهم هم بنفسهم يكلمون الخطابات كنهم مقطوعين من شجره ليش ما عندهم امهات او خوات
8- وحده كلمتني وقالت فيه واحد عمره 23 وعاطل ولا يدرس وهو صحيح شوي وامه تقول ابي بس وحده تساعدني عليه انا قلت لها وين اول شي فرق السن وياليته بس هذا العيب صحيح وعاطل ردت علي قالت بس شكله حلو قلت لها لا ما ابي وخلاص
وبعدين قالت لي اجل وش رايك واحد يوم كان صغير طاح من السرير على راسه وصار مختل بس عايلته غنيه
وبعد ايام جابت لي واحد مسجون طبعا مجرم وهي عارفه ها الشي قالت لي عادي تتملكين وتترددين عليه في السجن
انا عصبت ورديت عليها قلت لو انها بنتك ما رضيتي لها زي ها الاشكال
9- وحده قالت لي عندي لك اما مسجد قلت طيب وما دريت الا ويوم اذن المغرب و اقيمت الصلاة في المساجد الا وهذا الامام يكلم ورديت عليه قال وين امك وكان صوته صغير مره انا قلت للخطابه بلله عليك هذا امام مسجد يكلم والناس يصلون لا ويقول وين امك لا وصغير وهو الي يكلم ويخطب لنفسه قالت عادي وش فيكم على الرجال
وغيرها كثير من مواقفي مع الخطابات الي جابو لي العقد النفسيه وخطير ما يصيبني امراض وضغط وسكر وكرهة الساعه الي كلمتهم فيها لا وكل وحده تقولي عمرك كبير كبير كبير وقلت خلاص توبه ما اكلم اي وحده حتى لو ايش وجلست سنه مرتاحه ومتوكله على ربي وادعو وارتاحت نفسيتي
والي قاهرني اليوم يوم نامت امي رن الهاتف الثابت ورديت وكانت خطابه قلت امي نايمه قالت انا خطابه ادور لولد اخوي
بعدين جلست تهذر معي وبعدين قالت والله انه اجودي فيه وحده جنوبيه ذكرته لي قلت كيف اول شي تقولين ولد اخوي بعدين تقولين وحده ذكرته لي بعدين قالت عمره 29 وانت كم عمرك قلت انا اكبر منه انا 31 هي طيرت عيونها وصرخت قالت واو كني قايله لها 60 او 50 قلت خلاص اذا لقيت لك مناسب ابتصل على امك قلت لا تدورين ولا تدقين الله يستر علينا وعليكم
بعدبن سكرت وانا اقول يارب اغنني عن ها الخطابات الي جابو لي العقد
كل ما ارتاح كل ما تطلع لي وحده وتجنني
ظلع @thlaa
محررة برونزية
هذا الموضوع مغلق.
أغلى شهد
•
الله يوفق بنات المسلمين
الصفحة الأخيرة