تجاربي مع طفل الانابيب

السلام عليكم

شخباركم بنات شمسوين شخبار الأهل ان شاءالله كلكم بخير؟؟

المهم مابي أطول عليكم بس أنا وحده أحب اقرا التجارب الناجحه في طفل الانابيب واتفائل فيها بقوه ومنها استفيد عن اشياء انا غافله عنها

علشان كذا قررت اكتب لكم تجاربي مع طفل الانابيب يمكن تتفائلون وتتحمسون :35:


بعد زواجي بثلاث سنوات واخيرا استوعبنا ان تأخرنا ماجبنا عيال ولاحظنا ان اللي متزوجين بعدنا اشوي ويصيرون جدات >> وتونا نلاحظ بعد

المهم رحنا كشفنا اول شي هو سوى التحليل قبلي وجاني وانا نايمه قال لي بقولش خبر كئيب نتيجة تحليلي طلعت صفر:44::06: وان الدكتور قال صعب الحمل بالادويه والمقويات يعني النتيجه صفر مالكم الا طفل الانابيب
قلت له شلوووون بسوي طفل انابيب والحاله الماديه رديييه ؟؟
قال مالنا الا الصبر قلت له يللا الحمدلله والا في ذمتك وجهي وجه وحده ممكن انها تصير ام وتربي ؟؟:biggrin2:

المهم بعدها انا سويت كشف والحمدلله كل شي سليم وباحسن مايكون وطبعا لأني مابي ان زوجي في لحظه يحس انه ظالمني اياه وكذا ماجبت له طاري للعلاج كلش وهو بيني وبينكم انا ماعمري مسكت طفل او لعبته يعني كلش ماعرف لهم علشان كذا ماتأثرت حيل
بعد فتره اخوي كلمني قاللي مافكرتوا في طفل الانابيب؟؟ قلت له عطني 20 الف واوعدك من بكره اسويها:icon28:
قال انا ماعندي فلوس بس بساعدكم انكم تتعالجوا في حكومه >>طبعا اخوي متأخر بعد ماجاب عيال وهو في ذاك الوقت كان يتعالج في التخصصي في الرياض
قال انا عندي واسطه في التعليمي في الخبر يحولونكم للرياض وهذا اللي صار

رحنا التعليمي انا سوولي تحليل دم بس وزوجي بس تحليل للسائل المنوي وحولونا للرياض على طول
بعد ثلاثه شهور دقوا علينا المستشفى وعطونا موعد ورحنا اول موعد ومن اول موعد سوولنا تحاليل وكذا وقالولي بس تجيش الدوره سوي بعدها اشعة الصبغه والموعد اللي بعدها بنسوي العمليه يعني من اول موعد قررولنا عمليه >>اللي يضحك في الموضوع ان في كل موعد ادق على اخوي اغش منه وش بيسوولنا لان هو سابقنا بموعد:hahaha:

بعد التحاليل وكل شي عطوني ابره تحضيريه وبعد ثلاث اسابيع بديت في المنشطات عطوني عشر ابر منشطه اول 6 ايام ثلاث ماي وثلاثه بودره وبعدين يومين بودره وحده وماي وحده وبعد يومين نص بودره وماي وحده بعدها الابره التفجيريه

بعدها السحب في السحب عطوني بنج موضعي ماحسيت بألم كلش واصلا ماحسيت الا بمقتطفات من العمليه قالولي انهم سحبوا مني 10 بويضات بعدها بيومين الترجيع وتلقحوا ثلاث اجنه ورجعولي اثنين من الدرجه الاولى

بس العمليه فشلت للاسف وقالولي دقي بعد الدوره الثالثه
ودقيت بعد الدوره الثالثه وعلى طول قبلوني >>استغرب من اللي يقولون مواعيدهم تطول انا حسيتهم بسرعه قبلوني

المهم الحين جينا للمهم الفرق بين العمليه الاولى والثانيه
في العمليه الاولى عطوني 10 ابر منشطه وفي العمليه الثانيه عطوني 9 ابر منشطه نصيحه للبنات اللي بويضاتهم سليمهفي فترة التنشيط لا يفكروا ياكلوا او يشربوا شي ينشط لان الابر كفيله بالتنشيط انا ما استخدمت شي ينشط ومع ذلك صابني فرط في التنشيط

عطوني حبوب نسيت اسمه علشان فرط التنشيط وسبب لي غثيان وترجيع وصرت من الابره التفجيريه الى بعد العمليه باسبوع مادخل بطني شي من اكل شي ارجعه وغثيان ماعرف انام ايام مأساويه:44:

المهم في وقت السحب البنج ما أثر فيني يمكن لاني كنت تعبانه مدري صراحه ليش يعني تألمت الم مو طبيعي الله يكتبه لنا في ميزان حسناتنا

طبعا قبل العمليه زوجي استخدم خلطة عسل من عطار وقال الدكتور مابيحتاج عمليه هو يكفي اللي في التحليل الحمدلله
وصج في هالفتره وصلنا خبر حلوو ان زوجة اخوي اللي يراجع في المستشفى حامل والحمدلله حملت طبيعي يعني قبل موعد العمليه بشهر وكنا طايرين من الفرح وتحمست اكثر للعمليه علشان نصير ثنتينا حوامل ونتابع جميع

المهم سحبوا مني 18 بويضه ماشاءالله وتلقحوا منهم 7 بويضات وكلهم ممتازين
ورجعولي اثنين بس رجعولي ومثانتي فاضيه لاني زهقتهم ماني جايه انحسر:35:

علشان كذا هذي نقطه مهمه بعد في عمليتي الاولى كنت حسرانه بقوه علشان كذا على طول رحت الحمام بس هالمره ماني حسرانه فمارحت الا بعد فتره طويله

ارتحت اسبوعين ماحد عرف بالعمليه الا اختي واخوي وامي بعد عشره ايام سويت تحليل منزلي وطلع خط غامق وخط فاتح رحنا المستشفى سويت تحليل دم ورجعني زوجي البيت بعد نص ساعه راح لحاله ياخذ النتيجه >>اتمنيت كنت معاه صراحه بس مارضى هو يقول ماابيش تشوفي الدرج كلش

راح واتأخر علي ابو الشباب من راح لا حس ولا خبر وانا طول الوقت ادعي يارب ماصابه حادث لو صابه حادث شلون بعرف النتيجه >> هذا كل همها يعني:icon19:

دقيت عليه قلت له هاااااا بشر؟؟

قال فيه حمل ببرووود قالها حتى شكيت اني ماسمعته عدل الكلمه اللي قاللها فيه حمل والاسلوب يبين انه كلش مافيه حمل بعدين قال حاااامل بعدين قال خلاص سكري ماني قادر اتكلم >>اثره كان يصيح حبيبي

المهم على طول دقيت على اختي قلت لها هااا شنو بتجيبي لولدي هديه قالت حلللللللللفي قلت لها والله قالت بنشر الخبر >>ماعندها وقت

قلت لها انشريه بس انا اللي بقول لامي وبسررررعه انتشر الخبر وصارت فرحه كبيره وابو زوجي كل مافضى جابلي اكل يقول ابي ولدي يطلع متين علي

وبعدين عرفت انهم توأم وفي وسط فرحتنا كذا ومن غير سابق انذار اجهضتهم :44:

بنااات بقوللكم شي انا العمليتين سويتهم في نفس المستشفى وعند نفس الدكتور بس وحده نجحت ووحده لا والعمليتين كل وحده مالها علاقه بالثانيه في كل شي تختلف

يعني لو ماصار حمل معناها ان الله ماكتب مو معناها ان المستشفى فاشل

واللي ناويه تسوي العمليه ومتردده ابد لا تتردد لان كل شي فيها حلو انا اذا اذكر ذيك الايام اتمنى انها ترجع صراحه


اي سؤال من البنات انا حاضره