ســارينا :

السلام عليكم ترددت كثير قبل لا اكتب بموضوعكم .. ودي افضفض .. وبنفس الوقت اقول محد بيحس بجرحي الا انا بالأخير ماقدرت .. احس اني ابي اتكلم .. عيوني منتفخين من كثر مابكيت اليوم احس اني اتعذب انا توني مطلقه جديد .. اصلا مدري هو طلقني ولا لا كل اخباري اسمعها من الناس .. مره يقولون طلّق ومره يقولون رجّع بس المهم صار لي شهر ونص عند اهلي .. وطلعت انا بمزاجي السالفة ومافيها اني تزوجت قبل سبع سنوات .. وكان عمري وقتها 17 سنة تزوجت اخو زوج اختي .. عجبتهم اختي لأنها كانت ضعيفة وخدومة .. قاموا خطبوني من يوم عمري 13 سنة المهم لو اقولكم على المشاكل اللي صارت قبل الزواج وبعده يبي لي شهور لكن انا انظلمت كثير معه .. فعلا هو كان يحبني .. بس مايمسك اعصابه كان وجهي يصير كله خطوط لونها عودي وعريضه من ضربه .. وكنت اسامحه لأني كنت احبه اغيب عن الجامعة بالاسبوع عشانه احط اهله بعيوني .. وعايشه معهم .. لكن انا من يوم ما تزوجته ما دخل بيت اهلي وكل هذا لأني كنت احبه كان يسوي اشياء لو اقولكم عليها بتقولون ليه استحملتيه؟؟ باقولكم كنت صغيره واموت فيه مع الوقت تغيرت طباعي انكسر شي بداخلي كان كل شي يسويه اسامحه عليه .. لكن يقعد أثره بقلبي ويوجعني وما كنت اقول لأهلي اي شي .. لأني ادري انه مافيه علاقه بينه وبين اهلي اصلا صار هو يحس بهالشي .. يقولي انتي تغيرتي وكنت اقوله ايه فعلا انا تغيرت .. وانت السبب انا كنت طموحة .. لأبعد أبعد الحدود .. شاطرة بدراستي وذكية .. وهو عنده شهادة الثانوي .. وكان فيه فرق بمستوى التفكير بس كنت اخلي تفكيري مثله .. عشان لا اضايقه طبعا هو كان يكره هالشي .. كان يبي بأي طريقة اترك دراستي .. وانا رافضة والحمدلله كملت دراستي .. ونجحت بتفوق ولكن .. ماجاني عيال هذا لوحده موضوع طويل عريض .. انا سويت كل اللي اقدر عليه عشان احمل .. كان عندي تكيسات بالمبايض بس اخذت حبوب .. منشطات .. ابر .. سويت منظار .. طفل انابيب وبالأخير اكتشف انه عنده دوالي ومخبي علي ياللـــــــــــــــــــه رحمتك يا منان حسيت ان ودي اذبحه .. كرهت الحمل والادوية .. كرهت كل شي المهم مابي اتذكر سالفة الحمل لانها تعور قلبي تخرجت من الجامعة .. وعشان تخصصي كان مرغوب .. وربي كانت تجيني الوظايف وانا قاعده ببيتي وهو يرررررررفض كان قلبي يحترق .. لكن ارضخ عشانه قعدت تقريبا عشرة شهور بعدها جتني وظيفة بالجامعة .. طبعا ما رضى .. وقاموا اهله كلهم ضدي .. لكن سويت اللي براسي وتوظفت مع اني ما كنت مثبته لكن توظفت بعدها ساءت العلاقة بيني وبينه بشكل رهيب هو عايش بدنيا تجارته وفلوسه .. وانا لوحدي بالبيت .. لا عيال ولا زوج .. وفوق هذا محرومه اروح بيت اهلي تعبت نفسيتي .. صرت احس بفراغ كبير .. صرت اكــــــــــــــــــــــــــــــــــرهه مابي اشوفه .. ولا ابي انام معاه .. ماحب اسمع منه اي شي سبحان الله .. كل الحب اللي بقلبي انقلب كره الين قبل تقريبا 3 شهور .. جتني وظيفة ثانية ممتازة .. ونسائية كلموني قالوا تعالي مقابلة شخصية .. فرحت .. وقلت لأهلي وفرحوا .. اهله عرفوا بالموضوع وسكتوا ادري انهم عارفين انها وظيفة ما تتفوت .. بس بداخلهم عارفين ولدهم بيرفض جيت عنده وكنت فرحانة قلت جتني وظيفة .. وبكره المقابلة من دون ما يخليني اكمل كلامي .. قاللي والله ماتروحين انصدمت .. ليه يبي يستعبدني؟؟ زعلت منه وصرت ما اكلمه وقعدنا ما نكلم بعض لمدة شهر وشوي .. تخيلوا كنت اموت من داخلي .. احس اني وحيده .. وهو لاهي بشغله واصحابه وشوي تجيني وظيفة ثانية .. انا قلت بنفسي لا يمكن اتنازل عنها استخرت واستخرت واستخرت .. وبعدين قلت له عليها قاللي لاااااااااااااااااااااااااااا ارسلت له رسايل استعطفه .. كنت اقول لا تهدم اللي بيننا عشان الوظيفة .. وكان كلام كثير حلو اصلا مو من زين اللي بيننا .. لكن مابي اتطلق .. كنت اخاف يصير فيني مثل الحين المهم استخرت شلت شناطي ورحت بيت اهلي استقبلوني اهلي وكانوا فرحانين .. يبون يشيلوني من الارض وانا بداخلي جرح مايعلم فيه غير ربي طلعت من بيتي الثلاثاء ويوم الاربعاء بدأوا اهله يدورون له عروس قالوا عني كلام ما ينقال حطوا كل العيوب فيني .. وخلوا ولدهم ملاك تعبت .. بكيت .. انهرت كثير هددوني يفصلوني من شغلي .. وحرموا اختي انها تجينا .. حتى بالتلفون ماتكلمنا اوقات اقول مو انا اكرهه؟؟ ليش ازعل عليه؟؟ واوقات اتذكر ايامي الحلوة معاه .. والحب اللي كان بقلبي .. واقعد ابكي ليش سوا فيني كل هذا؟؟ الرسايل اللي ارسلتها له بالأيام الأخيرة .. راح مسح الكلام الحلو منها وارسلها لأمه .. وامه ارسلتها لكل اقاربها .. حتى اختي عشان تحرق قلبها ابي اعرف ليه؟؟ مو هذي اسرار بيننا؟؟ انا صح اني احاول اشغل نفسي بشغلي .. دوامي من 8 الى 4 لكن باقي الوقت لازم افكر .. غصب علي اوقات اقول الحمدلله اني عرفتهم على حقيقتهم .. واوقات اقول كان ممكن اصلح الوضع انا اللي اخاف منه الندم .. الشعور بالندم يذبحني يخليني اضعف وتصير حالتي يأس بيأس ابي اكون معكم احس انه فيه احد مثلي محتاجه افضفض واطلع اللي بداخي تحملوا كآبتي والله ينصر كل مظلوم

السلام عليكم ترددت كثير قبل لا اكتب بموضوعكم .. ودي افضفض .. وبنفس الوقت اقول محد بيحس بجرحي...