اليوم بنقل لكم تجارب رقم 5
وبما اني انقل لكم تجارب
الأخت ترانيم ( جزاها الله خير ) من منتديات عروس
فأرجو من الجميع بالدعاء لها
نبتدي بعون الله ,,,
شفتو هذي العلب لحفظ الملاعق بأدراج المطبخ
جدا عمليه وجميله وفي منها نوعين بلاستيك و خشب
بالنسبه للمطبخ عندي خذيت منها من النوع البلاستيك ينظف تنظيفه ومسحه ,,
مو هذا موضوعنا ....
انا خذيت وحده ثانيه من نوع الخشب
تدرون ليش ,,,
حطيتها بدرج من الدروج بغرفة نومي ( درج المكياج )
كثير ارتحت من الاقلام الكحل ومحددات الشفايف والمسكرا
وصارت دروجي مرتبه وبالعكس حطيت فيها اكثر شي من مكياجي
من العلب الصغيره من الشادو وغيره ....
وراح تلاقون الي تبونه بأسرع وقت ما تدرون على قلم وتضيعون وقتكم
طبعا في بعض البنات يمكن ما يعجبها لون الدرج
ممكن ان هي ترش عليه من بخاخ الالوان ويصير اللون مناسب
لغرفة نومها ...
::::::::::::::::::::::::::::::::::::::::
كان عندي ألبوم قديم بس شكله حلو
وما فيه عيب اني اقطه قلت استفيد منه
رحت قسم الطبخ بالمنتدى
وعملت برنت لكل الطبخات الي حبيت اني اطبقها
طبعا في بنات ما قصروا ربي يعطيهم العافيه
كانوا مصورين كل طبخاتهم وبالتفصيل
وقعدت يوم وانا فاضيه
اقص الصور واحطه بالألبوم وتحته حطيت التفاصيل الكتابيه
وبكذا استفدت من الألبوم القديم سابقا
واصبح جديد ,,,
وحطيته بالمطبخ وازيد عليه كل الطبخات الحلوه من المنتدى
طبعا دام الالبوم حافظ للصور فهو حافظ للأوراق من الماء وقت الطبخ
يعني اثنين في واحد
:::::::::::::::::::::::::::::::::::::::::::::::
الخـــــــــــــــوخ
لما نزور الناس دائما يقدمون لنا الفواكه لعل بعض
الفواكه سهلة الأكل
ولكن شفت كثير من البنات الي تاخذ الخوخ وتقضمه نفس التفاحه
قدااااااااااااام الناس ,,,
ما ادري ليش استحي من هالحركه خصتا ان فيها كميه من السوائل الي
ممكن تحرجنااااا بتساقطه على نفسنا ,,,
طيب بعلمكم طريقتي بأكل الخوخ
اول شي اجيب السكين واقصه
من النص لكن ما افتحه لأن البذر يمنع انك تقصينه بسهوله
نفس البرتقال مجرد انك تحددين القصه حوالين البذره
تمسكين الخوخ كأنك تفتحين برطمان
يعني تفرينه كل نص عكس الثاني
بيطلع لك بهذي الشكل
والباقي انك تاخذين ملعقه وتطلعين
البذر من النص الثاني وبس ....
وبلا احراج وبالبيت عاد سوي نفس الشي قدام عيالك
علشان يتعلمون ونفس الوقت ما يوصخون روحهم
في فواكه ثانيه كثيره على نفس طريقه الخوخ يتبع نفس الطريقه بالأكل
:::::::::::::::::::::::::::::::::::::::
كثير من البنات او الرجال يستخدمون ممسحة الاحذيه
وبصراحه اكثر العلب مكتوب عليها يستخدم لـــ 100 مره
وكل ما اقرأ هذي الملاحظه على العلبه
اتذكر زميلة الدراسه كانت تستخدم الممسحه
وتقول باقي 70 مسحه ويخلص مدتها
وكنت اضحك من كلامها بس كانت تتكلم جد هههههههه
المهم اختي لما يخلص مدته الي ما اعتقد انه بيواصل للمره 100
كل ما تحسين ان الممسحه ما عادت تمسح بنفس الفعاليه بالتلميع
كل يومين او ثلاث رشي من زيت الزيتون او الزيت العادي المستخدم بالطبخ
وبس سكري العلبه
وما يحتاج انك تشترين مليون علبه من المماسح
وكل ما تشوفينه وسخ ممكن تغسلينه وبس ينشف من الماء حطي الزيت
وخليه لتلميع الأحذيه .....
::::::::::::::::::::::::::::::::::::
عيالكم لما ياكلون يوصخون السجاد
اكثر الاطفال والافضل لهم الجلوس والاكل على الارض
افضل من الطاولات والكراسي
لأن الشغل بيصير شغلين
بتنظفين الطاوله ونفس الوقت الكراسي
وبعد السجاد او الارضيه يعني ثلاث شغلات بكل وجبه
فالافضل الجلوس على الأرض وفرش سفره الاكل امامهم وياكلون
طيب لما ياكلون دايما يوسخون السجاد او الارضيه
كنت اخلي لعيالي قطعه من الموكيت مثل هذي
كان يسهل علي عملية التنظيف بشكل سريع
يعني عمري ما قدمت لهم اكلهم او العصاير مع البسكويت الا حطيت
لهم هالقطعه مكان ما يجلسون وبعد ما يخلصون اشيل السفره
وامسك الموكيت وانفضه بسلة المهملات كرمكم الله
حتى غسيله سهل جدا يا انك تحطينه بالغساله لأن حجمه صغير وعملي
او انك تفكينه بالحمام وبعدها تعرضينه للشمس واليوم الثاني بيكون جاهز لهم
افضل من انك تقعدين تفركين البقع من على سجادتك بكل البيت ...
:::::::::::::::::::::::::::::::::::::::
علمتكم اكثر من طريقه لتعطير الدواليب
واليوم بعلمكم طريقه لتعطير الحمامات بشكل حلو وجميل
وتقدرون تعلقونه حتى بأي مكان
احيانا من زود ما اسوي اكثر من وحده اعلقهم على الشماعات
او احطهم على مقابض البيبان بكل البيت
شوفو ا شنو نحتاج ....
بودرة اطفال بيبي جونسون ( متواجد اكيد بكل بيت )
زيت عطري اي نوع تحبينه او دهن عود او اي شي متوفر عندك بالبيت اهم شي
ان يكون دهني ما يكون عطر عادي لأنه بيتبخر بأسرع وقت اما العطر الزيت فمدته تدوم اكثر
حطي البودره بصحن بلاستيك
وحطي الزيت العطري تدريجيا
اهم شي انك ما تخلينه سائل
علشان طريقتي اني اكوره يعني اسويه زي الكوره
يعني عجينه يابسه
ولما تسوينه مثل العجينه
اخذي ....
شيفون ( ممكن تستخدمين الشرابات النايلون القديمه او الشيفون من الملابس القديمه )
حطي فيه الكوره المعطره
ولفيها كأنك تلفين الحلاوه
وآخر شي زينيه بالاعلى بالورود الصناعيه
ولا تنسين انك تعملين له تعليقه حلوه
من الشرائط ...
:::::::::::::::::::::::::::::::::::::::
استوحيت الفكره الجميله كيف ارتب البيض بمطبخي بشكل حلو
ونفس الوقت بديكور حلو جذاب
رحت شريت عش من اماكن بيع الطيور
طبعا هذي الاعشاش خاصه بالاققاص
نفس الصوره
وخذيت من حديقتي بعض الاغصان الجافه وحطيتها بالسله
وجبت عصفورين وخليتهم على الاطراف ومليت السله بالبيض
وصار شكله حلو كثير حتى عيالي رايحين جاين يقولون لي نبي بيض
:::::::::::::::::::::::::::::::::::::::
كثير من الرسائل وصلتني من الامهات
الي يشتكون من عيالهم وعدم ترتيبهم لاغراضهم الخاص
هذي الفكره حلوه وجميله
عيالنا اشبعوا من الهدايا واللعب ....
وما عاد يغريهم لو قلتوا لهم انكم بتشترون لهم هدايا وقت ما هم
يساعدونك بترتيب غرفهم الخاصه
فخليهم يشتغلون بأجور
أيه ليه لا
علمي كل واحد من عيالك على هذا الشئ
لا تجي وحده تقول ( لا هذي الفكره راح تعلمهم انهم يكونون انانين وبعدين كل شي بيسونه بحساب )
يا اختي احسن ما يطلعون عيالك إتكالين
خليهم وعلميهم ان كل شي بحسابه
بكره لا كبر يعرف ان لما يشتغل بيكون له دخله الخاص
وبدون ما يشتغل بيكون عاطل عن العمل وما عنده ما يسد حاجته
كم بيت دخلتيه والولد رافض انه يشتغل
تدرون ليه ؟؟
لأن علموه انهم يصرفون عليه ومن الدلع الزايد
علميه ان من يشتغل يقبض فلوسه الي له الحريه بتصرفه
راح تعلمينه ايضا ان يفكر مليون مره بشنو يبي يحط فلوسه
لأن تعب عليه يوم بعد يوم
عدل سريره
نقل ملابسه الوصخه لسلة الغسيل
شال جزمته من على الارض وحطاه بالدولاب
ما كركب لك البيت باللعب
ما كركب ملابسه النظيفه الي تعبتي وانتي تغسلينه وتكوينه وتعطرينه
كل هذا راح يتعلمه ولما يكبر ان شاء الله راح يطبق من غير ما تدفعين له شي
حطي وخصصي لكل واحد حصاله وعطيه
يوميا مبلغ عادي ممكن يكون شي رمزي الاطفال يفرحون بأقل شي
وخليهم يحطونه بالحصاله
وقولي لهم لما تمتلي الحصاله
كل واحد يفكر من الحين شنو خاطره فيه علشان
اخذه واوديه وهو يشتريه بفلوسه ...
::::::::::::::::::::::::::::::::::::::
تـــــــــــــــــــرانيم
ما شاء الله تبارك الله