الأخت ترانيم ( جزاها الله خير ) من منتديات عروس
فأرجو من الجميع بالدعاء لها)
نبتدي بعون الله ...
إلي عندها جهاز كي الملابس هذا او اي ماركه ثانيه نفس هالجهاز البخاري للكي
شوفوا الصوره ...
أشتريت هالجهاز وانا يدور في بالي ان هل ممكن اني اقضي وقت أقل بالكي ؟
لكن للأسف هالجهاز مثل ما الكثير اكتشفه ان ما يصلح لكل الملابس يعني
مهما استخدمتيه ....
بيظل عندك ملابس تحتاج لكوي بالمكواه العاديه خصتا للأكمام وغيره
ظليت فتره وانا ما استخدم هالجهاز إلا لكوي البدلات الرسميه او التي شرتات
الي فيها رسوم تلتصق بالمكواه العاديه ....
لكن استخدامه مهما يكون جدا قليل ...
وبعد تفكير اني كيف استغل هالجهاز ؟؟؟
أكتشفت انه مناسب جدا لتنظيف الحمام :ss:
رشي من البخاخ الي علمتكم اياه على اسطح الحمام
خصتا الجدران وبعدها وجهوا فوهة البخار على سطح المراد تنظيفه
تعقمون الحمام من الفطريات بالحراره ..
البخار يزيل التراكمات السوداء او البقع المستعصيه خصتا مع مفعول البخاخ الخاص بالكلوركس
حتى الاماكن الضيقه الي ما توصل له الفرشاه تصل له البخار
وبالتالي ينظف مع الحراره ..
أكيد شفتوا إعلان المكنسه البخاريه للحمام الي الكل استجن عليها
ليه تشترينه وهي مكلفه
وانتي عندك هالجهاز بالبيت ... حتى المطبخ والسيراميك بالبيت ما يحتاج تدعكين البقع
وجهي الفوهه والبخار يسوي العجايب ...
نفعتني برضوا بحاجه ثانيه تعالوا اقول لكم بأيش ..
ما يحتاج تدخلين وجهك بهذا الجهاز الممل
خلي فوطه على بخار الكوي
ووجهيه لوجهك اشوي بعيد
وحطي الكريم الي تبينه للفيشل
واستمتعي بالنعومه بكل اسبوع مره وحده
وقشري بشرتك بالطريقه الي تعجبك قبل البخار وبعدها حطي الكريم المرطب
الي يغذي البشره وبعدها شغلي جهاز الكوي
وبتحسين ان بشرتك تشفط المغذي بشكل اسرع ..
وبتلاحظين الفرق من أول استخدام
انصحكم انكم ما تقربون الفوهه مره من الوجه لأن البخار جدا حار
ولا تنسون الفوطه لازم تحطينه على الفوهه علشان تخفف من درجة البخار ...
::::::::::::::::::::::::::
الكثير أعجب بهذي الحافظات لحفظ الأغراض
سواء للأحذيه او الأكسسوارات أو لقطع الصغيره أو للقبعات
والله ما يستاهل تبحثون عن هالاشياء وتصرفين فلوسك عليها ..
هاتي المسدس والنايلون الي عندك
جيبي بطانه متينه
وسوي المربعات
وألصقيهم بالطريقه الي تبينهم
وحطي أغراضك ورتبي دواليبك على أحسن وجه
حتى تقدرين تسوين لك حافظات للرموت الكنترول
وحافظات للشنط ...
::::::::::::::::::::::::::::::::::::::::
آخر صيحات تعطير دواليبي للملابس
أكيد لاحظتوا لما تفتحون الدولاب الي تخزنون فيه البخور تلاقون الدولاب
ريحته عجيبه ومعطره الدولاب كله
خلاص بكل دولاب رزي آخر شي علبه من البخور كمخزن لك
او طلعي قطعه من البخور وحطيها بآخر الدولاب يعني ورااااء الملابس
وبصراحه زوجي سئلني كم مره تبخرين الدولاب باليوم علشان الريحه تكون ثابته؟؟؟
::::::::::::::::::::::::::::
معطرات الجو
اذا عندك أحد بالبيت عنده حساسيه
او عيالك مرضى ما انصحك ترشين من هالبخاخات
ولا تسوين عطور
استخدمي الاشياء الطبيعيه لإزالة الروائح الكريهه او روائح الطبخ ..
كل الي عليك جيبي كوبين من الماء الدافئ
وحطيه بمرش خاص مثل المرشات الي حق منظفات الزجاج
إن كانت عندك وحده فاضيه استغليها ...
وحطي ملعقتين من حجم ملاعق الطعام الي ناكل فيه من ...
بكربونات الصودا ...
هذي صورته
واعصري ليمونه وحده فيها ...
ورشي وراح تلاحظين ان زالت الروائح الكريهه
ممكن تستعملونه بأي وقت ما له مضار صحي أبدا
وبالعكس هالخلطه صديقة البيئه ... يعني تقللين من مخاطر التلوث البيئي
ممكن ترشينه على الكنب او الفراش او على السجاده على راحتك وطبعا بجو الغرفه ...
::::::::::::::::::::::::::::::::::
اليوم بعلمكم كيف تسون صابون الجلي بالبيت بدون مواد كيماويه
تروحين العطار تقولين له ابي صابون بلدي في انواع واشكال
شوفي الريحه الي تعجبك
تبشرينه وتخلينه في قدر وتملينه ماء نصف حجم القدر وتخلينه
على نار هادئه الين ما يذوب كل الصابون بالماء
ويمتزج مع بعض ويتكون لك خليط متجانس مثل صابون الجلي العادي
بعدها تحطين فيه خل أبيض مقدار أربع ملاعق طعام جدا مهم راح ينظف لك كل الدهون
حتى كاساتك بيصير فيه لمعه ....
وآخر شي حطيه بعلبة للأستخدام
ممكن لما يخلص من عندك صابون الجلي تستخدمين نفس العلبه لتخزين الصابون الي
عملتيه بنفسك ...
لو كنتي حابه انك تعطرين الصابون على حسب رغبتك
ممكن تضيفين ماء الزهر او ماء الورد
او تعصرين ليمون او برتقال ...
::::::::::::::::::::::::::
أنا احب الاكسسوارات الفضه الأصليه
مهما تنظفينهم ما راح يرجع لونه مثل ما شريتيه بالتأكيد
تعالي اقول لك كيف انظفهم
خلي الماء يغلي بالقدر
حطي ملعقه من الملح
وملعقه من الصودا الي صورته فوق
وقصي من ورق القصدير الي تغطين فيه الفرن البعض يسميه ألمنيوم
وكرمشيه وخليه بالجدر وحطي قطعة الاكسسوار معه
وكلها عشر او ربع ساعه على نار هادئه
تلاقين ان حتى الفتحات الضيقه نظفت كأنك شاريته اليوم
ممكن تستخدمين هالطريقه للتحف الفضيه ....
::::::::::::::::::::::::::::::::
موفقين إن شاء الله ...,,,
تــــــــــــــراينم
جزاكي الله كل خير