السلام عليكم
بإختصار يابنات ويا حريم .. الفاضيات الغير موظفات .. اللي يبحثون عن وظيفه .. أو حتى اللي مايبون وظيفه
انا إنسانه توني متخرجه من الجامعه .. وقاعده في البيت .. يعني لو تجمعون أنواع الطفش في هالدنيا تلقونها مخاويتني .. والحمدلله على كل حااال
قعدة البيت مرررره مررره شينه .. صحيح راحه ومافي إرتباط بدوام ,, لكن ملل خصوصاً بالنسبه لبنت مثل حالتي ما أقدر أطلع ولا اتمشى ولا اخرج محكومين في ظل إخواننا الشباب .. اذا روق الواحد طلع أخته ومشاها << وقعد يمن عليها سنه بهالطلعه .. وإذا ما روق والله لو يشيب راسها ما التفت فيها
<<< قالت قصة حياتها
الله يعين بس على هالدنيا
الموهيم يا عزيزاتي .. كلمتني أختي المتزوجه من كم يوم .. وقالت لي : ليش ماتروحين التحفيظ بدال قعدة البيت ؟؟
قلت لها : رحت له مره من زمان وكان الفصل كله حريم في سن نهاية الثلاثينات والأربعينات
ويوم قالت لي الأستاذه اقرأي : قريت مع نفسي << ماحد يسمعني << بغى يغمى علي من الأحراج ولا عرفت أقرأ ولا شي
قالت لي اختي : هذا كله من الشيطان ,, روحي فصل فيه بنات .. أو ع الأقل ادرسي تجويد .. الموهيم تروحين هذيك الأماكن ,, وأكيد غير عن الفصل والحفظ ,, رح يكون فيه محاضرات
تقوووول أختي وإذكروا الله عليها : إنها راحت للتحفيظ كذا مره .. تقول والله إنه في كل مره ينفرج لي هم .. كان من ضمنها الحمل ..
وهي سبق وإنها حملت ويموت الجنين من ثاني شهر
بس يوم التزمت بالتحفيظ .. (وربي عالم بـ نيتها إنها تبي الأجر مو عشان تيسير أمور الدنيا بس) .. تقول يوم التزمت بالتحفيظ تثبت حملي ووصلت إلى نهاية الشهر الثالث .. وتركت التحفيظ << لظروفها الخاصه
يوم وصلت الشهر الرابع مات الجنين .. وبعد ماراحت المستشفى قالوا لها : هو ميت من الشهر الثالث في اليوم الفلاني << تقول والله العظيم إنه مات في نفس اليوم اللي تركت فيه المركز .. وشكلي يوم كنت بمركز التحفيظ كنت طارده الشياطين عني وعن بيتي وعن نفسي .. وسبحان الله هذا أمر الله لا إعتراض
وفي غير هالمره تقول حصل وتفرجت لي هموم خاصه <<< بس ماقالت لي إياها
ما شاء الله تبارك الله
والله من قالت لي كذا عزمت إني أروح للتحفيظ .. والله مابي إطراء ولا مدح ,, وانتوا لا تعرفوني وانا ما أعرفكم .. يشهد الله إني ما أبي من موضوعي هذا كله الا الفايده لكم وهو بمثابة دعوه لوجه الله وأمر بالمعروف
يكفي إنه تحفك الملائكه .. يكفي إنها تستغفر لك .. يكفي إن الله يذكرك في من عنده .. يكفي إن حتى الحيتان في البحر تسبح لك ..
حتى لو ماكنتي مو قادره ع الحفظ ,, حتى لو غبتي أيام كثير بسبب ظروفك .. أهم شي يكتب لك أجر النيه إن شاء الله
محاضرات دروس .. ممكن لو رحتي تكسبين أجر في حرمه كبيره تساعدينها ,, تسمعين درس وتتعظين ويفيدك طول عمرك
والله العظيم يا بنات خيرر كبير قدامنا ومضيعينه ,, مدارس التحفيظ وش كثرها .. وفيه الصباحي وفيه المسائي
<< عمركم شفتوا وحده تدرس بالتحفيظ والهم ذابحها والا نفسيتها شينه ؟؟
ومواضيع أقراها وش كثرها اللي تبغى وظيفه .. واللي قاعده في البيت تنتظر الزوج .. واللي مهجوره في بيت زوجها تنتظره يرجع لها .. روحوا لهالأماكن .. ربي بيفرجها عليكم بإذن الله
بس لا تنسون شي مهم .. روحي واحتسبي الأجر .. روحي وقولي ياربي إني تركت عرض الدنيا وتركت البحث عن وظيفه إبتغاء للأجر .. لا تروحين وإنتي نيتك إن الهم الفلاني يفرج .. لا .. روحي وانتي عازمه ومصفيه النيه .. وربي بيرزقك من حيث لا تحتسبين ..
انا والله كنت محتاجه وظيفه بسيطه .. بس قلت إذا قصدت هالأماكن إن شاء الله ربي يرزقني ويعوضني
والله يوفقنا ويرزق كل بنت مهمومه على نيتها
معينه خير @maaynh_khyr
عضوة فعالة
يلزم عليك تسجيل الدخول أولًا لكتابة تعليق.
لاتغرك
•
جزاك الله خير
الله يرزقني حفظ كتابه الكريم
ويشفيني ومرضى المسلمين اجمعين اللهم آمييييين
جزاكِ الله خير
ويشفيني ومرضى المسلمين اجمعين اللهم آمييييين
جزاكِ الله خير
الصفحة الأخيرة