هذه تجربة اخت مصريه بلسانها وكيف فرج الله عنها
دعواتكم اخواتي
السلام عليكم
انا باوجه كلامى للى متأخرة ف الحمل بس.. لانى مش باكتب موضوعي بس للفضفضة او الرغي.. و خايفة انى اكون بارتكب ذنب ان اكون و العياذ بالله باشتكى.. يا رب انت عارف نيتى..
انا بجد نيتى ان المتأخرة ف الحمل.. تستفيد من تجربتى.. اما انها تساعدها ع الصبر.. او ربنا يكرمها و تعمل زى ما انا عملت..
هاحاول احكى باختصار..
انا اتجوزت شهر و نصف و بعدين زوجى سافر.. شهرين و بعتلي و رحت..
كملنا سنة زواج.. من غير حمل.. بعد السنة بدأت اروح للدكتورة.. طبعا التحاليل المعتادة لي و لزوجى.. مفيش حاجة بانت غير شوية التهابات عندى..
عملولى كى عنق الرحم.. جابولي فيها نزيف و العياذ بالله يوم كامل..
بعد كدة متابعة تبويض.. اكتشفت الدكتورة ان عندى كيس على كل مبيض .. واحد صغير و واحد كبير..
كتبتلى حبوب منع الحمل.. تخيلوا عاوزة احمل و باخد حبوب منع الحمل..
فضلت اخدها 9 شهور...
طبعا كان غلط.. المفروض كنت اخدها 3 شهور بس.. و مادامت مش راحت يبقى دة دليل انها مش هتروح غير بعملية..
لان دة دليل انه كيس دموى مش مائي..
المهم الدكتورة قالت لازم عملية.. انزلي اعمليها ف مصر احسن..
حجزت للسفر.. و قبل السفر بحوالي شهر.. حسيت بالم رهيييييييييييييييييييييب ف جنبي اليمين....
بقييت باصرخ باعلى صوت.. و تخيلوا ف كل الالم دة.. بقيت اقول يا رب اطلع حامل...هههههههههه
قال يعنى الحمل بيبقى كدة... بس طبعا باتعلق بقشاية
المهم رحت المستشفي قالوا اشتباه زايدة.. عملوا التحليل لقوها مش زايدة.. عملت اشعه.. اكتشفت ان كيس من الكيسين انفجر.. الكبير اللى كان ع المبيض اليمين..
طبعا كان خطر فظيع لان السائل اللى كان جواه انتشر ف كل جسمى.. و كان ممكن يسبب لى اضرار كبيرة.. بس ربنا بيحبنى و حمانى..
بس الام كان رهيب.. ف بطنى و ظهري و صدري.. مكنتش باقدر اتحرك و لا اتنفس الا اتألم.. لو كحيت او عطست احس انى باموت..
الحمد لله عدت ع خير..
نزلت مصر .. رحت للدكتور حددلي معاد العملية بعدها باسبوع عشان اشيل الكيس التانى.. عملية منظار بطن..
عملت العملية بما فيها طبعا من الام فظيعه.. و الحمد لله عدت ع خير..
استنيت الحمل.. فاتت سنة .. خلال السنة برضو اشعات و متابعة تبويض..
الحمد لله التبويض كان عندى ممتاز و مفيش اى عائق..
عملت اشعة صبغة.. برضو سببت لى نزيف.. بس الحمد لله الانابيب كانت سليمة..
المهم بعد السنة.. حصل ايه..
ظهر لى كيس تانى ع نفس المبيض اللى عملت فيه العملية.. الدكتور قال لازم عملية تانى..
المرة دى انهرت.. و حلفت ميت يمين ما انا عاملة عمليات تانى... انا شبعت م الالم.. و مش قادرة..
اتحايلوا على اهلى .. و كفرت اليمين... و رحت تانى اوضة العمليات...
كانت عملية اصعب... و الالم اكبر... بس الحمد لله عدت ع خير...
خلال الفترة ما بين العملية الاولى و التانية... كنا استقرينا ف مصر.. و ساكنة ف بيت عائلة..
و طبعا حماتى اشتغلت الشغل المعهود ع زوجى...
و للاسف بعد ما كنا سمن ع عسل... بدأ يسيئ لي و يجرحنى...
و بدأ يلمح بانه من حقه يتزوج تانى...
حالتى النفسية بقت زفت...
بعد العملية التانية...
المشاكل زادت جدا جدا... لدرجة انه راح لامى و سمعها كلام من دة.. و بدأ يشتكى منى ف حاجات هايفة... كأنه بيتلكك... و انا و امى كنا منهارين...
حسيت الدنيا بقت سودا ف وشي...
كمان تم تشخيص حالتى ببطانة الرحم المهاجرة... المرض دة بيسبب تأخر الحمل ف بعض الاحيان... و سبحان الله علاجه الحمل
قلت خلاص اعمل تلقيح صناعى قبل ما يتكون كيس تانى بسبب المرض دة
قلت لامى هابيع دهبي.. و انت تدينى و اخواتى يدونى... مش عاوزة حاجة من زوجى عشان لو لاقدر الله فشلت المشاكل هتزيد
و اتوكلت ع الله و رحت للدكتور بعد شهر من العملية..
قلت له اعمل تلقيح..
سبحان الله الدكتور دة مش سنى يعنى و لاشيخ... بس ربنا فتح عليه بالكلام معايا..
قالى هاكلمك زى بنتى
انت فاكرة انك هتدفعى عشرين خمسة و عشرين الف و ترجعى معاك بيبي؟؟؟
خدى بالك نسبة نجاح العملية مش بتزيد عن 30% زيها زى الحمل الطبيعي..
و لو فشلت المشاكل الاجتماعية هتزيد...
قلت له بس المرض دة مش خلاص الحمل ضعيف معاه؟؟
قالى مين قال كدة؟؟ قلت له زوجى ليل و نهار بيقول كدة..
قالى هاتيهولي و انا افهمه...
المرض دة عادى مش بيمنع الحمل.. ستات كتيرة عندهم و بيحملوا ع طول.. و بنكتشفه بالصدفة لما ييجوا يولدوا...
قلت يعنى تنصحنى بايه؟؟
قالى انت لسة صغيرة.. و زوجك صغير.. انصحك تصبري..
اعرفى ان الحمل دة رزق من ربنا.. زيه زى اى رزق.. اتوكلي ع الله..
احنا داخلين ع رمضان.. خدى وقت تفكري .. و بعد رمضان لو لسة عاوزة تعملى التلقيح تعالى..
سبحان الله كلامه نزل ع قلبي برده.. فكرنى ان ربنا وحده هو اللى يقدر يعمل كل حاجة..
مهما لفيت او عملت عمليات او اخدت دوا.. برضو ربنا اللى يريد
روحت البيت و قررت انى اصحح الموضوع من جوايا..
جبت زوجى و قلت له بحزم و يقين: انا عارفة انى ربنا هيرزقنى قريب.. بس هو بيختبرنا انا و انت.. هل متمسكين ببعض.. و عاوزين نخلف مع بعض و لا لا؟؟
الحمد لله بيننا تفاهم و مودة و رحمة.. هل انت عاوز تهدهم.. عشان اربع سنين تأخير بس؟؟ مش عاوز تصبر معايا.. براحتك.. هتهد البيت المسلم اللى فيه حب و انسجام و تفرح فينا الشيطان براحتك..
انا عارفة ان ربنا هيرزقنى... ان مكانش معاك يبقى مع غيرك..
قررت ايه؟؟
الحمد لله قالى لا قررت اكون معاك .. و هاصبر.. و باذن الله ربنا هيرزقنا..
دخلنا ع رمضان.. و بفضل الله كان عندى قوة ايمانية رهيبة..
عبدت ربنا كما لم اعبده من قبل..
صلاة التراويح ف المسجد.. و بدون تعب.. ارجع كمان اكمل قيام الليل ف البيت..
ادعى ربنا و ابكى و ابتهل..
كنت قبل كدة بادعى و بابكى و بابتهل.. بس من غير يقين..
اول مرة اعرف يعنى ايه: ادعوا الله و انتم موقنون م الاجابة..
و الحمد لله كانت حالتى النفسية ف اعلى حالاتها..
كنت متأكدة ان ربنا هيرزقنى قريب..
حتى لما البيريود جاتلى ف رمضان مزعلتش..
و سبحان الله العظيم..
كانت اخر بيريود.. و اللى بعدها مجتش..
حملت ف شهر شوال...
و طبعا كانت احلى لحظة ف حياتى...
ياااااااااااااااااارب يرزقكم كلكم بيها... و متتأخرش عنكم ابدا...يارب
عشان تتعلموا الدرس اللى اتعلمته...
ربنا سبحانه و تعالى قادر يشفينا من العقم..
بس بيختبرنا عشان نقرب منه... و نفهم انه هو بس اللى بايده انه يرزقنا..
عليكم بالدعاء مع اليقين...
كل موقف اجرحتى فيه من زوجك او من حد احكيه لربنا و انت ساجدة.. و خلى الموقف دة يشفع ليك عنده سبحانه و تعالى
و اكثري م الاستغفار
و ياااااااااارب اكون افدتكم
يلزم عليك تسجيل الدخول أولًا لكتابة تعليق.
الله يجزاك خير الله يرزق الجميع ويفرح قلبنا وعقبال مانفرح بكل وحده متأخر حملها في هالقسم بقصة حملها قريب يارب
yasmona
•
الله يجزاك خير على نقل هده التجربة
ما شاءالله تبارك الرحمن
الله يتمملها حملها على خير ويرزقنا جميعاً
ما شاءالله تبارك الرحمن
الله يتمملها حملها على خير ويرزقنا جميعاً
الصفحة الأخيرة
الله يتمملها حملها على خير يا رب
ويرزقنا جميعا الذرية الصالحة المعافاة يا رب