تجربة اختي بالداخل

السلام عليكم ياحلوين
زي ماوعدتكم اني انزل تجربة اختي من بعد 85الئ 60يعني اللحين يمكن زادت عليها شوي مو كثير
المهم ياطويلات العمر اختي كانت سمينه مره وكانو يعلقون اخواني انها برميل متحرك ولا تقدر تلبس اي شي يعني بالعزره نلقئ لها لبس يناسبها واكثر شي كانت السمنه في وجهها وجسمها من فوق
وفي يوم من الايام كنا عند خالتي وكانت خالتي تبي شي من فوق الدولاب وركبت اختي فوق الكرسي وانكسر واساسا هو كان مكسور بس البنات استلموها تعليقات يادبه كسرتي الكرسي ....الخ
اختي تحطمت وجلست طول الوقت لحالهالما رجعنا البيت قعدت تبكي وكانت في قمة التحطيم بس كان لصالحها لانها قوة عزيمتها ونوت النيه هي عمرها 16سنه
المهم انها بدت بس برجيم قاسي الظاهر شهر 7,عام 1430وكانت ابدا ماتاكل شي الاخبز برمع جبنه قليلة الدسم او بيض او سلطه او فاكهه او ورق عنب وتمر وعصير المراعي فواكه مشكل مع الخلطه اللي هي زنجبيل وكمون وشاي اخظر صيني قسم بالله كان هذا اكلها واستمرت عليه لحد رمضان وهنا الطامه الكبرئ تصدقون كانت ماتتسحر الا ع كاسة مويه والفطور تمره وقشطة التمر بس مع القهوه والمويه وتقعد عليها لوقت السحور اللي هو كاسة مويه يمكن بعض الاحيان تشرب صحن شوربه والله يابنات مابالغت
استمرت كذا لنهاية رمضان ولما جاء العيد ماعيدنا زي الناس صارت كل ماكلت شي استفرغته وطول الوقت دايخه علينا الله يعظم اجر امي كانت طول الوقت موديتها للمستشفئ عشان تاخذ مغذيات لانها كل ماكلت شي استفرغته سوت لها امي تحاليل طلع كل شي سليم المهم وحده من خالاتي قالت لامي وديها عند حرمه معالجه خليها تكشف عليها
وفعلا راحو لحرمه وكشفت عليها قالت المعده عندها صارت متلاصقه من قلت الاكل يعني صغرت بس لدرجة ان كاسة المويه ماتتحملها ومرختها يمكن يومين اوثلاثه المهم انها حالتها تحسنت ورجعت تاكل بس مو زي اول يمكن لقمتين ثلاث ع طول تشبع اختي مو سايعتها الفرحه لانها وزنت لاول مره من بعد مانقص وزنها وطلع 60كيلو في تقريبا 3شهور استمرت ع نظامها خضار توست بر وجاء عيد الاضحئ والله يابنات من فرحتها بجسمها اشترت يمكن 5او6بلايز وتنانير وجزم دلع حقة بنوتات غير فستان فصلته عشان تتدلع فيه صارت واثقه من نفسها وزاد جمالها وجهها صغر وطلعت ملامحها وصارت بنوته كيوت مع ان اللي كان يشوفها يعطيها اكبر من عمرها
واللحين لها سنه جسمها زي ماهو يعني مره يرتفع مره ينقص بس مايتعدئ 65
الزبده يابنات من تجربة اختي
1- ان التحطيم في بعض الاحيان له دور ايجابي في حياتنا ولا كان ماتحركت اختي من مكانها وظلت زي ماهي
2-ان اختي ابتعدت عن كل شي كان منهي عنه بتاتا البته من شوكلاتات شيبسات اللي كانت تاكلها بالهبل ارز خبز ابيض مشروبات غازيه بانواعها دايت اوغيره حلويات فترة الرجيم ابتعدت عنه نهائي هو والفطائر حتئ برمضان مشاء الله ع قوة ارادتها اما اللحين بعد ماوصلت لوزنها صارت تاكل بس شوي قطعه اوقطعتين مع حبتين فطاير وع طول تحرقها بالمشي
3-العوامل المساعده اللي خلتها توصل لوزنها حاليا وكان لها مفعول معها وخلتها تخسر وزنها بسرعه هي:1-المشي كانت تمشي طول الليل قبل ماتنام يمكن ساعه ساعتين في الحوش لدرجة ان اهلي سموها الموسوسه ماتمشي الا في الليل والنور طافي بعد ههههههههههه
-شرب الشاي الاخظر الصيني مع الزنجبيل والكمون كانت تشرب منها ثلاث ترامس في اليوم
-خل التفاح الرمحين كانت تاخذ ملئ الغطا حقه وتحطه ع كاسة مويه وتشربها
-ويبنات اذا قللتي من الاكل المعده بتتعود ع القليل وبتصغر زي ماصار مع اختي كانها مسويه عملية ربط ماتتحمل اكل زياده بس لاتسوون زيها بعدين تخيط عندكم المعده وتتعبون يعني خلوه ع خفيف
والنتيجه يابنات غير خسارة وزنها الدوره ماكانت منتظمه معها وانتظمت بعد مانزل الوزن وكان عندها تكيس في المبايض ابشركم راح هي بنت بس لانها دورتها ماكانت منتظمه اكشفت عليها الدكتوره بالسونار وقالت ان عندها تكيس بالمبايض واعطتها ادويه مانفعت وبعد الخساره راح ولله الحمد..
تصدقون يابنات ان في الفتره اللي كانت اختي تسوي رجيم فيها كنت في نادي ومانزل وزني الا كيلوين بس وزوجي شافها بالعبايه مره وهي طالعه من عندي وانفجع قال هاذي فلانه قلت ايه قال وش هالنحف وقلت له عن انها مسويه رجيم ...وقصيت عليه القصه قالي انتي داخله نادي ماستفدتي شي واختك فالبيت ونقص وزنها اكثر منك (قمة التحطيم صراحه)وهو صادق السالفه ماهي نادي ورياضه السالفه عزيمه واراده...
شعرها ماتاثر من الرجيم ابدا بالعكس احلو زياده بشرتها صح بهتت في البدايه بس اللحين تهبل مع عنايتها بنفسها صارت تهتم بنفسها وتدلع عمرها خلطات كريمات لوشنات يعني عكسها اول لما كانت سمينه مع الرجيم يابنات استخدمت خلطه فتحتها كثير وهي خلطة بياض الثلج والله صديقاتها في المدرسه وزميلاتها كل يوم واحده جايتها تسالها وشلون نحفتي ووشلون فتح لونك حتئ المدرسات الله لايضرها صدق السمنه تغطي جمال الوحده وتسمرها وعمرها ماكانت رمز للجمال جمال الوحده في رشاقتها عقبالي ان شاء الله افرح اهلي زي مافرحنا لاختي وصارت حديث مجتمعنا ..
انتهت اتمنئ يااخواتي انكم استفدتو من تجربتها
وادعو لها يابنات بالصبر والسلوان لانها من يوم مات ابوي وهي صايره مكتئبه وتحب تجلس لحالها واذا جلست معنا وجاء طاري ابوي تبكي بصوت عالي يقطع القلب مع انها ملتزمه بس ماتنلام موت ابوي فجاه ومحد يستوعبه في لمح البصر راااااااااح الله يرحمه ويغفر له ..
سلام ياحبايبي..:27: