السلام عليكم ورحمة الله وبركاته .
اشلونكم حبيباتي الرشيقات العسولات
فحبيت أكتب تجربتي لكم عسا إن شاء الله تكون دافع لكل وحدة تسعى للنزول والوصول للوزن المثالي
حبيباتي طول عمري وأنا متينة ...طفولتي ومراهقتي وزواجي
سنة وترك كنت أسوي ريجيم .....ونظام تغذية
ياما رحت لدكاترة وكنت أفتح ملف عند كل دكتور ...وألتزم بالريجيم والوجبات الغذائية
سويت الريجيم الكيميائي ....ريجيم البروتين ....ريجيم السوائل .....وكل اللي يخطر على بالكم
مع المشي في الممشى ....بعدين أكفر بالأولي والتالي ....وأنهزم بسرعة وأرجع دبلات ...
طول عمري على هالحالة ....
ليما عزمت من صج اني أضعف وأصريت على الضعف ....واللي خلاني أصر ان عمر زوجي ماتكلم أو نغز علي بشي ...
كان مخليني على راحتي ومايتكلم .....23 سنة وأنا متزوجة ....وولدي البكر الحين عمره 22 اسم الله عليه موظف وعيالي أصغر واحد عمره 13 سنة ...
وقتها عزمت أسوي أي عملية من عمليات المعدة اللي نقرا عنها ....بس اللي رادني أني خوااااااااااااااااافة حدي ....
قلت خل أستشير دكتور ورحت حق الدكتور خالد العنزي اللي بالأميري وتكلم عن عمليات المعدة وشرح لي ووضحها لي ...ونصحني أسوي أي وحدة من هالعمليات ...وألحق عمري
طبعا أنا كبيرة بالعمر ( عمري بالأربعينات ) وقلت له أنا خوافة ...ومترددة وبصراحة أسمع وايد عن خطورة هالعمليات .....وسلبياتها وآثارها ....
رد علي يقول يامدام اللي انتي فيه من السمنة والضغط والسكر .... الأمراض ...والبلاوي الثانية أخطر بوايد من العمليات ......
رحت البيت وقعدت أفكر بكلامه وقلت خلاااااص مابإذني ماي ....لازم أسوي ريجيم وبأعطي نفسي فرصة 4 شهور ....إذا مانزلت فيها ...لابد أسوي عملية ( جذابة !!! )
وفكرت بأهلي ( زوجي وعيالي ) ....قلت إذا أنا طحت أو غشيت منو بيقوم فيني ...؟؟؟
منو بيشيلني ....؟؟؟!!! ....منو يقدر يتحملني وأنا متينة .....؟؟!!! ألحين أنا بصحتي الحمد لله وأقوم بنفسي .......لكن بعدين .....منو اللي يعبر علي ثقلي ...؟؟؟
ليش هالأنانية .....ليش ماأفكر فيهم ...كله أفكر بنفسي ..وببطني ....وبالأكل ....ليش !!!!!
وفيه سالفة قالتها لي وحدة من معارفنا ( يزاها الله خير ) ...واللي فعلا خلتني أصر وأعزم على الريجيم ......
تقول أكو وحدة متينة وااااااااايد ...واااااااااايد ......وهي راعية صلاة وصيام وقيام ليل وقرآن وعبادة ماشاء الله ....وفجأة طاحت من حيلها وماتعبر تتحرك ....وقاعدة طول وقتها بالفراش .....وحسرة عليها الحمام ( أكرمكم الله ) عشان تتوضأ للصلاة أو لقراءة القرآن ......!!!!!!!!!!!!
أنا سمعت كلامها ....كأن زلزال من داخلي انفجر ......حسيت نفسي مكان هالوحدة ....وان بيجي يوم حسرة علي الصلاة والقرآن ....!!!!!!!! وتخيلت نفسي ماأصلي أو أتعبد الله ......؟؟؟
وحسيت كأن طراااااااق قوي صحصحني وزال عني هالغشاوة ....صممت عقبها أبدأ بالريجيم
وفعلا ابتدأيت الريجيم 1/11/2008 كان وزني 125 كيلو ..!!!!
اشتركت في شركات التغذية ....واشتركت في نادي صحي
كنت أمارس المشي لمدة ساعة ....ومعاه جهاز القاري نص ساعة ....والرياضة المائية ( الأكوا ) لمدة ساعة
يوميا كنت أروح النادي ..ماعدا الجمعة والسبت ...
والحمد لله كل اللي حوالي بدأوا يشجعوني ...وكنت مع زميلتي بالدوام نشجع بعض ...ومانخربط ومانتريق ريوق خرابيط ...ونتكلم دايما عن الريجيم
وقمت كله أقرا عن الدايت والريجميات والأكل الصحي وشنو اللي يساعد على تخفيف الوزن ...من أعشاب ومن شاي أخضر
وبصراحة خليت جسمي تجارب لكل شي ...في سبيل اني أضعف وأكون رشيقة ....مابقا دهونات ...مابقا خلطات ....ماسويتها ...حتى القهوة دهنت جسمي فيها في سبيل الرشاقة
وكل شي أقراه بالمنتديات سيدا أسويها ضارة ...مو ضارة مو مهم أهم شي أضعف .....
وطبعا مرات كانت إرادتي تضعف ( بني آدم ...ضعيف ) ....بس كنت أرجع بسرعة وأتدارك
وأصبحت حياتي كلها مد وجزر ...بس الحلو اني ماتركت الريجيم ...في السابق كنت أسوي الريجيم ...وبعد 5 -6 أشهر أهده وأرجع دبلات ...وبعدين عقب سنة أو سنتين أرجع مرة ثانية
لكن هالمرة لا ........وقلت أنا قطيت فلوس وايد على شركات التغذية ..واشتراكي سنة بالنادي ...حرام
يللا هانت ....وبديت أحس بالفرق ...وهدومي وسعت علي ...وبدت ملامح وجهي تطلع ( أثاري أنا حلوة بس ماكنت أدري لوووووووووول )
والله ماأبالغ ...بدت عيوني تطلع ...أول الخدود مغطيتها ...بدت الغمازات تبين ....حتى حلجي صار حلو
بديت أحب نفسي ...وأشوف الملابس حلوة علي ....وقمت أحس روحي خفيفة وحركتي خفيفة .......سكري نزل ......ضغطي نزل .....لك الحمد والشكر يارب ....
وبعد خمس شهور من الريجيم ( شهر4/2009 ) زوجي شجعني وسفرني لندن لمدة عشر أيام ( بروحنا بدون أولادنا ) ....وهذه أول مرة نسويها نسافر من غيرهم .....تقريبا وقتها كنت نازلة 20 كيلو ( وصلت 105 كيلو )
واستمريت حتى شهر 5 ( مايو ) 2009
عقبها بدأت ترجع لي نفس حالة الملل من الريجيم ...وبدأت أخرب
قطعت شركات التغذية ...وماقمت أروح النادي ...بديت أمل ....
أحس نفس وعين صابتني ...وكل من يتحجى على ضعفي خاصة بالنادي ....يأشرون علي ...ويسألون المدربات عني
واستمريت في الخربطة ...حتى منتصف شهر 7 / 2009 ...وبدأت أزيد وأرجع الكيلوات اللي نزلتها ....( ورجعت 114 كيلو )
قلت خل ألحق عمري قبل رمضان
وفعلا ...كل الناس تخربط برمضان إلا قهوة عربية ....وبصراحة تبون الصج
حلفــــــــــــــت
اي نعم حلفت ....وأقسمت بالله إني ماأخربط ....كل مرة كنت أخاف أحلف لأني أدري بروحي ماأقدر ألتزم ....بس هالمرة حلفت
والحمد لله استمريت حتى بعد عيد رمضان .....ونزلت
ورجعت للنادي بشهر 11/2009...كان وزني 100 كيلو
وماتشوفون فرحة بنتي لما وصلت 99 .....ركضة يابت الكاميرا وصورتني على الميزان إني تخطيت الثلاث أرقام .....( هذا أحلى شعور )
واستمريت بالنادي والحمد لله مع ريجيم قاسي جدا ...كنت بالصبح أتريق بسكوت ناشف مع شاي وحليب بدون سكر أو كوب نسكافيه .....وأقعد عقبها بدون أكل حتى نهاية الدوام للساعة 2 الظهر
من بعد الدوام أواصل للنادي ماأروح البيت فألغيت وجبة الغذاء لأن ماكان عندي وقت آكلها
( أخاف آكل وجبة الغدا بعدين أسوي رياضة بالنادي ويمكن أزوع )
بعدها أرجع البيت هلكانة الساعة 7 ماكنت أقدر أتناول أي شي ...فكان عشاي كل يوم خيارة وحدة وروب قليل الدسم وتفاحة خضرا
وواصلت على هالمنوال ......
وطبعا شعور لايوصف ....لما سافرنا بعيد الأضحى لدبي ....كان وزني تقريبا 95 وركبت الطيارة .....
ولأول مرة يابنات .....أربط الحزام بدون الحزام الإضافي ......!!!!!!!!!!!
ولأول مرة أفتح طاولة الطعام كاملة ....العادة نصف فتحة ....وأضع الأكل بطاولة بنتي ....كنت أنتظرها تخلص وجبتها ....بعدين أحط وجبتي على طاولتها ....شعور مخزي ....مخجل ......
لكن الآن ......يافرحتي .........
واستمريت وتخطيت مرحلة التسعينات بسهولة ....وبدأت أدخل في الثمانينات ...وهدومي توسع ......وملامحي تصغر ..........
أصبحت معدتي صغيرة ومن أقل وجبة أشبع وامتنعت نهائيا عن العيش والمعكرونات والباستا والمعجنات والخبز
بصراحة ألحين أخاف أرجع نص كيلو ...وحبيت نفسي أكثر وزوجي مستانس ..حتى عيالي مفتخرين فيني ...
وقمت أحرص لما أطلع مع العايلة أخذ أكلي معاي ...... روب ...خيارة ...تفاحة ...أي شي ..بس ماآكل معاهم ولاأطلب من المطاعم شي
حتى لما انعزم عند أحد .......آكل قبل لاأروح أو آكل فاكهة عندهم فقط ...وقامت الناس ماتلزم علي إني آكل عندهم ...يخلوني على راحتي ...
ألحين وزني 77 ....أحيانا أكل حلو أو عيش ....بس ...عن خاطري قفشة ....قفشتين فقط ...
ومازلت ملتزمة ....وان شاء الله ناوية أصل ل 65 ...بإذن الله ...وعلى راحتي ..ماني مستعجلة ......أهم شي الالتزام حتى لو آخذ سنة ثانية ( مر علي ألحين سنة وسبع شهور من بدأت الريجيم )
مقاساتي والله بدون مبالغة .....كنت ألبس 64 .....ألحين ألبس 44...!!!!!!!!
قسما بالله كنت ألبس الحذاء ( أكرمكم الله ) قياس 40 .....ألحين ألبس 37 ....!!!!!
قياساتي بالسم :
الخصر كان 125 ....ألحين 85
الصدر 137 .....ألحين 90
الأرداف ....145....ألحين 100
الزند ...51 ...ألحين 30
قولوا ماشاء الله ....تبارك الرحمن ....
طبعا .....كان فيه سلبيات كثيرة من هالريجيم القاسي ...
شعري طاح .....بشرتي أصبحت باهتة .....الترهلات كثيرة ....مع إني أسوي رياضة وماهدتيها ...بس لأن حجمي كان كبير والدهون كثيرة ...وهذه الضريبة ....لكن كله يهون في سبيل الرشاااااااقة .....
وناوية أسوي عملية شفط وشد إن شاء الله بعد ماأوصل 65 ....أدعوا لي
طبعا مع فيتامينات ورحت لدكتورة جلدية مع ابر وامبولات وشامبوات وسيروم يالله قدرت أعالج شعري ...ومستمرة
حبيباتي انتوا أهم شي خلوا عندكم هدف للاستمرار والنجاح
طبعا ماأنصح أي وحدة تسوي ريجيم قاسي مثلي
ماشاء الله قسم التغذية بالمنتدى .....متروس من الريجيمات طبي وتخيري ...اشكال وأرناق ...
ريجيم عبدالله المطوع .........دشتي ...ريجيم الدكتورة هدى الدويسان ( هذا عجيب )
كثروا من السلطات والفواكه ....وشرب الماء بكثرة
وخل أكلكم كله مشويات ومسلوق ....
و اذا قدراتكم المالية تسمح لكم اشتركوا بشركات التغذية ( أكلها ناطع ولذييييييييييييذ ) ويشبع وينوعون بالمنيو على كيفج ...( والله ماكو مثل دايت كير
أهم شي لاتشربون ماي أثناء تناول الأكل ...( قبل الأكل بساعة أو بعد الأكل بساعتين (
عدم النوم بعد الأكل مباشرة ...لابد من ساعتين حتى ينهضم الأكل ....
وآخر وجبة الساعة 7 مساءاً ....لا أكل بعدها أبدا
الخبز الأبيض والغازات والباستا والمعكرونية والمقالي ممنوعة منعا باتاً
هالله هالله بذرة الكتان ( طحنيها وحطيها مع السلطة يومياً )
وعليكم بالروب يومياً والله يحرق الدهون حرق
كذلك المرامية والشاي الأخضر يومياً يزيل الكرش نهائيا ....
وأهم شي الاستمراااااااااااااااااااااار .........والإصراااااااااااااااااااااااااار ........
مـنقـوْوْل للتشجيـع و إثـآرة الحمـآس
ألم الطفولة @alm_altfol
عضوة نشيطة
يلزم عليك تسجيل الدخول أولًا لكتابة تعليق.
ام رغد وراما
•
ماشاء الله عليها الله ينحفنا زي مانحفها بعافيه
ماشاء الله عليها الله ينحفنا زي مانحفها بعافيهماشاء الله عليها الله ينحفنا زي مانحفها بعافيه
الصفحة الأخيرة