تجربة الولاده في مستشفى الملك فهد التعليمي بالخبر

السلام عليكم عضوات منتدانا الغالي
وشخباركم وكيف أيامكم بنات تجمع يوليو وأغسطس وحشتوني جميعآ .
اكتب لكم تجربة ولادتي في مستشفى الملك فهد التعليمي بالخبر
بالبدايه انا متزوجه وعايشه مع زوجي في الجنوب ، حملت وصرت اراجع في مستشفى خاص عند دكتوره سودانيه ربي يسعدها اللي كل شهر تطمني ع وضعي ومهتمه في صحتي وصحة البيبي إلى نهاية الشهر السابع ..
رحت عندها وحسمت أمري انها آخر مراجعه وقلت لها ابغى تقرير طبي كامل عن حالتي لاني ماراح أولد عندك ، بسافر أولد عند اهلي ..
و طمنيني إذا السفر مسموح لي وماعندي مشاكل ..
طبعا ماقصرت كتبت تقريري وحطت بأي شهر حمل ، ووزن البيبي ونسبة الهيموقلوبين والكالسيوم وفيتامين دال وصور السونار وتاريخ كتابة التقرير يعني كامل ككككل شي .
سافرت ..
وبديت متابعة حمل عند المستوصفات الحكوميه .. وكل شهر يطمنوني عن البيبي
لآخر شهر .. طلبت سونار اشوف وضع البيبي وانه كويس وراسه تحت لاني مستعده للولادة واخاف بأي لحظه تجي .
حولوني ع مستوصف إسكان الخبر عشان السونار وكانت فيه أخصائية سونار اذكرها هههههه اسلوبها يضحك انهبلت ع البيبي وتصور معاه سناب 😂
وهي باين طيوبه وفرفوشه بس انا وقتها كان همي وضع البيبي وهي ماخذه الوضع ضحك ..
المهم طمنتني ان رأسه تحت ووزنه كويس وعطتني لسته صور من كثر ماصورته😂..


لكن ..


كتبت في التقرير اني بالشهر الثامن وانا كنت بالتاسع ..
قلت لها في خطأ انا متأكده اني بآخر الشهر . قالت كذا طلع لي بالسونار وكتبت زي ماهو موجود ..
انا طلعت مستاءه وخايفه .
المهم ..
جلست ل 22 شهر 10 وبدأ الطلق بالليل الساعه 8 ونص والطلق كل ماله يزيد لصار كل 10 دقايق
قعدت للساعه 11 بالبيت ، شميت حلتيته وطلعت شنطة المستشفى وناديت اخواني افهمهم أن التقرير فيه خطأ ولايسمحون لهم يطردوني .. رغم الطلق اللي فيني .
حنو علي اخواني وقالوا لاتخافين وشالوني سيده ع المستشفى..


في الطوارئ ..


دخلنا وسجلنا عند الرسبشن وانا دخلوني بسرعه لطوارئ النساء والولادة..
كانت معاي امي واختي ..
كلموا الدكتور قال هذي بالشهر الثامن تنتظر يمكن مو طلق حقيقي ..
وانا بموووت من الطلق 😢
من شدة الألم مو قادره اتكلم ..
امي صارت تقول له شوفها ، بس واحنا عندك جاه الطلق مرتين بخمس دقايق ..
وهو رافض يدخلني يقول يمكن طلق كاذب بالورق مكتوب بالشهر الثامن ..
آخر شي مع آلامي تكلمت بصعوبة وقلت له شوف تقريري اللي جبته من الجنوب فيه اول سونار ..
-و تعرفون اول سونار يحدد موعد الولاده وكل شي-
وقلت له وبصعوبه.. الخطأ من مستوصف الإسكان سونارهم خربان حدد وقت غلط ..
قال بكشف عليها واحدد ما قدر اطلعها تنويم وهي يمكن مافيها شي ..
امي واختي رفضوا كشف الرجال وطلبوا دكتوره قالوا مافيه ..
وانا من التعب قلت ماعليه اكشف ، ابغى الخلاص 💔
جا وكشف هو والممرضه ..
يادوب حط يده ع بطني إلا والطلق ينفضني نفض ويطلع بسرعه والممرضه تسحب الساعه من يدي وتقول قومي ولاده فسخي يالله ..😢💔
المهم طلعوني فوق غرفة الولاده .. منعوا اي احد يدخل معاي أو حتى يجلس برى الغرفه كلهم تحت ، وحتى جوالي آخذوه مني.
دخلت عندهم الساعه 1 وع طول مغذي وتخطيط واجراءات روتينية . ويصيحون ولاده ولاده ..
الرحم 10 سانتي ..
جلست اولول من الألم طبعا استخدم تقنية التنفس عشان يخف الالم ..
سبحان الله ألم لايطاق ولا أحد يقدر يفسره 😢
جو عندي السسترات وبدأت الاسئله انتي من وين وليش جايه تولدين هنا ووو وانا طلللققققق
اجاوب شوي واسكت
لين تأكدوا من وضعي واني بكريه ..
وجاك النكد ..
قلت للدكتوره الله يخليك مابغى شق العجان طالعتني وماردت ..
قالت لهم الدكتوره مارح امسكها إلا الساعه 3
وراحت..
وانا مفجوعه 10 سانتي يعني المفروض أولد الحين ليه الساعه 3 ؟ ؟ ؟
وهم صاروا رايحين جايين علي كل شوي يقيسون .
قالوا لي دفي إذا جاك الطلق وانا هنا بموت ادفع وابكي من غير صوت..
وكل ماشفت معاهم مقص أو ابره اصيح ..
الله يخليكم مابغى شق العجان يمكن البيبي صغير وما احتاج ..
جات وحده -الله لايبيحها ولايسامحها وتراني ادعي عليها ليل نهار وبإذن الله نتقابل عند ربي وخصيمتها يوم الدين بأخذ حقي منها عند الجبار - ..
قالت بنظرة احتقار ..
وش دراك ان البيبي صغير ؟؟
يالله بس دفي !!..
انا هنا انفجعت من الاسلوب ..
هذي الأولى..
بعدين جاتني طلقه وجات دخلت القصطره في وقت الطلق من شدة ألم الطلق صحت بس مو من الطلق من قوة ألم القصطره دخلتها بأقوى ماعندها
وصحت آآآآآآآآآآآآآآآآآآخ يادكتوره وش هذااااا
وش ذا اللي دخلته ياويلي 😢


طغى ألم القصطره ع الطلق وشققت المجرى..
هذي الثانيه ..


بعدها جابت ابره وخدرت الموضع وبدت تقص ع كيفهاااا ومن ككككلللل الجهات 💔
لا وتحش بانقليزي تفكرني ماأفهم ..
-ماتدري عندي بكالوريس لغه انجليزيه- ..
تقول اني مادخلت صفوف ماقبل الولاده عشان اتعلم !!
كان نفسي ارد عليها وقتها بس ما حبيت اخرب جوهم ابغى اعرف وش بعد بيقولون ..
هذي الثالثه ..
وصرت عطشانه واترجاها تجيب لي مويا رفضت ..
هذي الرابعه ..
سمعتني ممرضه فلبينيه وجابت لي وشربتني لين ارتويت..
نصرانيه بس طلع فيها خير أكثر من المسلمه الطائفيه !!! ..
جات الدكتوره زي ماقالت الساعه 3 ومسكوني الحين للولادة من جد ..
بديت ادف مره ثنتين ثلاث .. طلع ولدي ع الدنيا ..
اول ما شافوه صاحوااا ..
البيبي صغيييير..
نفس ما توقعت 😞!!!
طيب وخريطة العجان ؟ ؟ ؟ حسبنا الله ونعم الوكيل
الخامسه ...
جات تخيط الدكتوره وهي مصدومه تطالع في القابلة نفسها وتقول لها بانجليزي ...
Deep!!!
يعني الشق عميييق..
وانا اردد في نفسي حسبي الله ونعم الوكيل
ارتفعت حرارتي وزاد عندي الضغط ..
دخلت في حالة إغماء وكان يصحيني من الحاله ألم الخياط ..
خياط الخريطه اللي صارت.
جابت الممرضه النصرانية -هي نفسها اللي سقتني- ولدي بحضني ..
شميته وبوسته نسيت التعب ..
في لحظات هذيك تحتقرني وودها تذبحنا سوى ..
بس سؤال ..
ما أعرفك ولا تعرفيني ليه كل هالحقد؟ ؟ ؟ ؟ ؟ ؟
كملت خياط الدكتوره وهذيك في عيونها نظرات الانتصار والله وقتها انتبهت انها قاصده كل هالحركات اللي سوتها فيني من يوم دخلت عندهم ..
لا وازيدكم من الشعر بيت ..
أهلي يتصلون عليهم وهي ترد معصبه وتسكر السماعه بوجههم.. وكنت اشوفها ..
الغرفه مقابل الرسبشن ..
يوم خلصت ولاده قلت لهم بشروا اهلي..
قالت مافي احد برى عشان نبشره !!
جلسوا ع نار وانا اصلا والده من ساعه .
طلعت من الغرفه مو ع التنويم.. لا ع غرفة الإنعاش..
و عطوني مضادات ومحاليل..
جلست للساعه وحده الظهر وانا ولدت الساعه 4 الفجر ..
عشان بس يتأكدون ان وضعي مستقر ..
بس كل هالفتره ادعي عليها واتحسب ..
طلعت بعد يومين من المستشفى مع ولدي ..
بس حتى ولدي ماسلم منهم ..
طلعت في منطقة الحفاظ حبوب وبدأت تنتشر بجسمه..
20 يوم ورجعت المستشفى اتنوم بولدي والسبب ..
عدوى بكتيريه وقت الولاده ..
لكن انا بخير وهو بخير والحمد لله ازمه وعدت ..
انتي انتصرتي بحقدك الطائفي - بنظرك - ..
وانا انتصرت عليك بقوة صبري ودعائي عليك ..
وزي ماقلت لك ..
انا خصيمتك يوم الدين ..