تجربة صديقتي مع الخطوط البيضاء

السلام عليكم

خواتي العزيزات ودي اقولكم عن تجربة صديقة لي مع التشققات البيضاء وهالانسانة انا اثق فيها وفي كلامها وما اشكك في اللي قالته لي ابدا ..

بس ليش ودي اقولكم عنها ؟ لانها تجربة غريبة وحلوة وصراحة فرحتني يوم سمعتها وقلت افرحكم معاي ...

القصة باختصار ان صديقتي هذي كانت حامل وفي شهرها الثامن بدت تعاني من ألام في ريولها
الام شديدة لدرجة ان الدكتورة قالت لها ما بينفعج في هالحالة غير التدليك والمساج المستمر

هذا كان تقريبا من سنة
وهي الخطوط اللي فيها كانت قديمة من قبل حتى ما تتزوج وبيضاء وعريضة شوي

المهم هي سمعت كلام الدكتورة
وخذت مجموعة من الكريمات
منها كريم زبدة الكوكا واللوز وكريمات ثانية
وفي فترة من الفترات استمرت على زيت الزيتون الاصلي


تقولي ان خواتها واهلها كانوا كل يوم يسوون لها مساج على ريولها
وما كان في بالها أو بالهم إلا تخليصها من الاوياع اللي كانت تحس فيها
ما حد منهم كان حاط في باله يركز على الخطوط أو أنه يعالجها


المهم البنت استمرت على هالوضع شهرين
إلا أن ولدت

من كم يوم تقولي تصدقين ذاك اليوم اطالع جسمي واكتشفت ان الخطوط اللي كانت فيه راحت بالمرة ولا تام منها ولا خط !!
وتحلف ان مكانها صار شكله نفس شكل ايدها وباقي مناطق جسمها يعني ولا خط !!

هي مستغربة
وزوجها مستغرب
واختها
قالت كلهم يقولون لي اعترفي انتي تعالجتي من ورانا شو سويتي
وهي تحلف بالله العظيم انها ما سوت اي شيء غير المساج اللي كانوا يسوونه لها

وهذي القصة وبس
انا عني كنت من زمان اسمع عن فايدة زبدة الكاكاو بس ابدا ما تصورت انها ممكن تشيل الخطوط بالمرة
أو يمكن انه من زيت الزيتون
بس الاكيد ان التدليك والدهن المستمر بهالكريمات والزيوت مفيد جدا ومن تجربة شخصية لصديقتي هذي.

وسلامتكم