تجربة ولادتي في السعودي الالماني بجدة

تجربة ولادتي في السعودي الالماني بجدة

اول شي السلام عليكم
انا اهلي من جدة تزوجت وسكنت مكة طبعا لما حملت كنت اراجع ف مستشفي صغير ف جدة اسمه مستشفي الظافر وكانت دكتورتي جيهان هلال ، الصراحة دكتورة شااطرة وفاهمه شغلها لولا انها ماتولد الا ف هذا المستشفي الصغير ولا كان ولدت عندها طبعا الولادة في مستشفي الظافر ب 4500 وكان عندهم نظام متابعة شامل للتحاليل والاشعة من اول شهر لحد الشهر التاسع ب 1800 وسوت لي الدكتورة خصم ب 1400

المهم اني كنت منتظمة فالمتابعة ووضعي كان طبيعي وقالتلي الدكتورة ان شاء الله تولدي طبيعي

كانت الدكتورة تقول ولادتك راح تكون 25 / 4 / 1435 وطبعا بحكم اني كنت بكرية كملت الشهر التاسع ويوم 25 بحساب الدكتورة بدأت احس حركة الطفل نقصت وهي كانت تقولي راقبي عدد حركاته ما تقل عن 10 حركات فاليوم ولاني بكرية ما كنت اعرف ان الطفل ف الايام الاخيرة قبل الولادة حركته تقل وتضعف لانه يكون نازل بالحوض ف ع طول رحت عند جيهان اكشف واتطمن سوت لي اشعه وقالتلي كل شي كويس الاكسجين واصل للطفل ونبضات الطفل طبيعيه قلتلها طيب وحركته قالت انتي لو مقررة تولدي عندي اولدك الان ب طلق صناعي
طبعا خفت وقلت لها لا وطلعت من عندها خايفه ع البيبي وعطول رحت مستشفي المساعدية للولادة والاطفال اللي بجدة وجلست حدود الساعه انتظار قبل ادخل للدكتورة المستشفي وضعة مقرف وزحمة واللي بتولد تودعها امها من عند باب المستشفي وتروح ما تجيها الا اليوم الثاني وقت الزيارة وهذا طبعا حال كل المستشفيات الحكومية
نرجع للمهم كشفت الدكتورة وقالتلي الرحم فاتح 2 سم بس لسي مافي طلق ومافي ولادة قلتلها وحركة الطفل ؟ قالتلي طبيعي تقل حركته قبل الولادة بيوم او يومين وتقول لي وضع المشيمة كويس ومافي خطر ان الطفل يكون مختنق بالحبل السري
بعد كلامها ارتحت ورجعت بيتي ف مكة ، جلست امشي يومين في مكة ومع زوجي لاني خلصت التاسع وابغي اولد طبيعي
يوم 27 المغرب كنت حاسه بمغص خفيف وكنت مفكرة انو من الاكل الهندي اللي كنت متوحمه عليه
كلمتني اختي ع الجوال وقالتلي كيف حاسه قلتلها مغص خفيف من الاكل قالت بسرعه انزلي جدة ولادة وقفلت منها وانا اضحك عليها وبس قفلت المكالمة تتصل امي تقول معك مغص الحين تعالي جدة قلتلها طيب لبست وكلمت زوجي ونزلت عند اهلي جدة وصلت الساعه 9 العشاء زوجي راح مكة وانا اقترح علي اخوي نطلع نتمشي وانا امشي قلت فكرة
طلعنا مكان قريب من بيت اهلي وفية رمل نزلت جزمتي الله يكرمكم وجلست امشي في الرمل وماكنت اعرف ان المشي ع الرمل يفتح الرحم سبحان الله
مشيت حدود الساعه ولما جات الساعه 11 رجعت بيت اهلي ودخلت الحمام وانتو بكرامة الا شفت السدادة خيوط من الدم ع طول رحت اعلم امي ، قالتلي بشارة خير امشي ف البيت عشان يحمي الطلق وسوت لي شاهي قرفة بالعسل وصرت اشرب وامشي لما جات الساعه 12 كلهم دخلو ينامو الا امي كانت قلقانه علي
علي الساعه 1 قلتلها خلاص روحي نامي انا معي مغص خفيف اذا زاد صحيتك وراحت بتنام وقلب الام كانت قلقانه مانامت
وانا كنت اتقلب في الفراش احاول انام لان ع كلام امي انو اذا في ولادة لازم يكون عندي طاقة وقوة ف كنت احاول انام ماقدرت مع المغص وع الساعه 3 الفجر جات امي قالتلي مانمتي قلتلها لا وجلست تحسب معي بين الطلقة والثانية وكان 5 دقايق بس الطلق بارد قالتلي خلاص كلمي اخوك يجي يودينا المستشفي
وع الساعه 4 نزلت موية الطفل بغزارة وجا اخوي مرعوووب يقول يللا بسرعه قبل تولدين وصار بسيارته يمشي 180 وانا مع فجعة السرعة نسيت الطلق
لين وصلت مستشفي السعودي الالماني الساعه 4 ونص
وانا ف الطريق اتصلت علي دكتورتي الله يسعدها دكتورة عفاف قلتلها انا جاتني ولادة وانا رايحة للمستشفي قالت خلاص روحي وكلمي القابله قوليلها استدعو لي الدكتورة عفاف قلتلها طيب لما وصلت سوو لي اشعة وقال الدكتور الموية نقصت ع الطفل خلاص لا تمشي وانتظري دكتورتك طبعا دخلوني غرفة الملاحظة وماخلو ولا احد يدخل معي
جاتني الدكتورة عفاف ع الساعه 5 ونص وكشفت علي قالت الرحم لسي 2 سم واخذو مني دم عشان التحليل وركبو لي المغذي وخلوني لوحدي الي الساعه 9 ورجعت دكتورة عفاف كشفت علي وقالتي لسي الرحم 3 سم وقالتلي انا بروح وقبل ولادتك بجي وراحت وانا جلست كل ساعة تجيني امي وتصبرني وتكلمني لين اهدا وتروح وانا صرت ابكي اقولها كل هالوقت ولسي كم باقي
طبعا كان دخول امي عندي وخروجها رحمة لي لاني كنت راح انهار
جلست الي الساعه 11 ونص بعدين رجعت انكبت موية الطفل وناديت القابلة جات كشفت علي قالتلي لسة الرحم تو صار 4 سم قلتلها طيب اعطوني مسكن او شي تعبت قالت طيب نقلوني غرفة الولادة واعطوني ابرتين ومن بعدها نمت ماحسيت بشي
اتوقع ان وحدة طلق صناعي ووحدة ابرة منومه
ع الساعه 1 حسيت بالممرضة تقيس قلتلها كم قالتلي 7 وانا اقول الحمد لله وصرت ابكي من الفرحة ورفعو رجلي وشوي صرت اصرخ قمت احس بالدفع والقابلة تقولي لا تدفعي وحاطة يدها وتقول دكتورتك جاية واسمعها تكلمها ع اسبيكر الجوال وتقول لها انا قريبه عند العمليات دقايق وجات الدكتورة وانا احاول ما ادفع وفوق راسي ساعه كانت الساعه 2
لبست الدكتورة لبس العمليات وع طول شقت ونزل الطفل بسرعه وحطوه علي صدري اول ما شفته بكيت ومع تاثير الكمامة والبنج جلست اقول للدكتورة الله يعطيك العافية وجلست اقول الحمد لله وانا ابكي
اخذو الطفل والدكتورة كانت تخيط وانا صاحية ماحسيت ولا بشي لانهم اعطوني ابرة العضل والكمام
طلعوني ف غرفة الملاحظة وخلو زوجي واخواني وامي وابوي يدخلو عندي اول ما شفتهم ارتحت نفسيا وجلست اهرج واضحك وابكي امي تقولهم ماعليكم تاثير البنج بس
خلوني ف غرفة الملاحظة ساعه وحدة وجابولي ولدي شفته وبعدين اخذوه وطلعوني غرفتي
المستشفي كان جايب كيكة هدية مكتوب فيها ولكم بيبي بوي ومن الفرحة ماقدرت انام الا ف الليل
ثاني يوم طلعت من المستشفي الظهر بس الصراحة زعلت من ان الدكتورة ماكانت موجودة معاي والغبيه القابله كانت تقولي لا تدفعي ايش تنتظر الجنين ينفجر راسة جوة الرحم وبنفس الوقت حمدت ربي ان الدكتورة عفاف جات لان كانت معي وحدة ولدت قبلي تقولي اللي ولدتها القابلة شقتها شقين وتقول لها لان طفلك راسة كبير
يللا الحمد لله علي كل حال
انا نقلت تجربتي لاني شفت وحدة منزلة موضوع تسال عن مستشفي السعودي الالماني
والصراحة المستشفي كويسة ودكتوراتها كويسات فيها تشكر واميرة وعفاف وانا ارتحت لعفاف لانها حنونة وخبرة وخياطتها روووعة حتي ف نفاسي كنت ما اقدر اجلس مضيقه المنطقة تمام
طبعا بالنسبة لاسعارهم حسيتها معقولة بالنسبه لمستشفيات جدة
بكج الولادة الدرجة الأولى بغرفة خاصة مع الحضانه و التنويم ب 6500 بدون التحاليل طبعا
والدرجة الثانية بغرفة مشتركة مع الحضانه والتنويم ب 5500 بدون التحاليل طبعا
التحاليل والاشعه اللي قبل الولادة كلفت حدود 700
بالنسبة لابرة الظهر موجودة عندهم بس ما اعرف سعرها لاني ما اخذتها ف ولادتي الاولي