ازيكم ياحبايبى يارب تكونو كلكم على عرفه السنه الجاية اللهم امين
هدخل فى الموضوع علطول لان بنتى عماله تفرك جنبى ومش هتهدا الا لما تقفلى الصفحه
انا بعد ما ولدت وبدات ارضع وشعرى بقا بيقع خصل والحمد لله ده شىء طبيعى بسبب الرضاعه جربت حجات كتيره اوى للتساقط منها زيت انوب ولوسيون روتاج وشامو تريسمى لتساقط الشعر بالمعنى الاصح صرفت بس سبحان الله العظيم احنا دايما بنحب نخسر عشان نعالج ومبنفكرش ان ربنا ادانا حجات طبيعيه ممكن نعالج بيها بس البنى ادم بقا
المهم دورت كتير عالنت ولقيت ان الكل متفق ان البصل بيوقف التساقط وبصراحه كنت طماعه حبتين قلت طيب منا عاوزه اتقل جبت التوم وبالمره اطول بربطة جرجير
وفعلا جبت :
عدد 2 بصله
عدد 1 راس توم بلدى
عدد 1 حزمة جرجير
وحطتهم فالخلاط مع نص كباية ميه وفرمتهم
وبعد ما اتفرمو خلتهم نص ساعه ينزلو ميتهم وبعدين صفتهم بالمصفه واخدت ميتهم ودخلت الحمام استحما وبعد ما خلصت كبيت ميتهم على راسى وحطيت طشط تحت راسى علشان اللى يقع احطه تانى على الفروه وبقيت بفرك وادعك فى فروة راسى كويس وبعدها بقا عصرت شعرى ولبست بونيه بلاستيك وبنام بيه زى مهو معلش لازم تستحملى الريحه
انا عن نفسى كنت متردده جدا بسبب الريحه بس بصراحه خفت على شعرى واستحملت وكانت النتيجه اكتر من رائعه
انا عملت الوصفه دى حوالى سبع مرات لحد دلوقت كل اسبوع كنت بعملها مره وبجد اللهم صلى على خاتم النبيين سيدى وحبيبى محمد عليه افضل الصلاة واتم التسليم
مقلكمش شعرى اتغير وبطل يقع بقا يقع بالمعدل الطبيعى وما شاء الله تبارك الله من مميزات الوصفه دى واللى لحظتها كمان
1- بتدى الشعر لمعه جميلة
2- بتوقف التساقط لا جدال
3- بتطول الشعر ااااه والله بجد
4- بتنعم الشعر سبحان الله
5- انك مش هتتعبى فى غسلها لانك بتستخدمى ميتها بس
بس احب انبه لحاجه الريحه مبترحش بسهوله بتاخد وقت وكل ما تعرقى ممكن تحسى بريحه بصل فى شعرك فانصح اى وحده متجوزة بلاش وهى مع جوزها توزعه وتعملها ..
بس السر اللى قضيت بيه على الريحه انى جبت معلقتين نسكافيه ودوبتهم فى ميه وبعد ما غسلت شعرى بالشامبو والبلسم حطتهم على شعرى ونشفت وخلاص وجابت نتيجه هايله وبجد انا كان نفسى اكتبلكم تجربتى من زمان بس قلت لازم اجربها اكتر من مره عشان احكيلكم اللى لاحظته فعلا
لو عجبك موضوعى قيمى
ولو كسلتى هكب عليكى ميه البصل دى انتى فاهمه منك ليها لوها لاهاليها
يلا اشوفكم فى تجربتى الجاية اللى بعملها حاليا لنعومة وتطووويل الشعر
ملحوظة : ممكن وحده تيجى تقول المكونات دى هتبقا حاميه على الفروه وهتسبب تساقط بزياده لاه طبعا لانى هنا انا مخففه التركيز بنص كباية ميه وغير كده كمان انا مش هحط الالياف على شعرى انا بس اكتفيت بالميه بتاعتهم فمفيش منها ضرر لما تعمليها كل اسبوع لحد ما تلاقى التساقط خف وتوقفيها بس انا بانت النتيجة معايا من اول مره ..
وياريت اللى تجربها وتجيب نتيجة معاها تيجى تبشرنى وتفيد اخواتها باللى حصلها
فى امان الله
اختكم
ياسمين
بسالك يالغلا كم صارلك تستخدميها يعني اسبوع اسبوعين شهر؟؟؟