السلام عليكم ورحمه الله وبركاته
حبيت حبيباتى احكى لكم حكايتى المؤلمه مع الشرخ الشرجى لعل وعسى واحده تستفيد منها
انا من صغرى عندى امساك
يعنى لا ادخل الحمام الا كل كم يوم
وكنت عند اشتداد الامساك اخد مسهلات وينتهى الامر
ولان وزنى زايد بدات بعمل دايت وكانت الطامه الكبرى
جالى امساك فظيع مع انى كنت بشرب ميه كتير ومنظمه اكلى
المهم بداء الامر اى لاقيت وجع شديد انثاء دخولى الحمام اكرمكم الله
وحرقان فظيع كانى فى المنطقه دى اشواك
والالم يستمر طوال اليوم وحتى النوم مكنتش عارفه انام ولا اجلس ولا امشى
والحكايه زادات لما بدات الاقى دم اثناء التبرز لدرجه مفزعه
دا غير الالم الرهيب لدرجه انى كنت اعيط وانا فى الحمام واصرخ
وكنت مكسوفه جدا انى اروح لدكتور
الامر زاد ولاقيت انه فيه زايده لحميه عند الشرج افتكرتها بواسير وكنت معتقده ان الى عندى دا بواسير سالت فى المنتديات على علاجها وقلت الواحد لازم يتطور ويستفيد من الانترنت
وفعلا جبت الكريمات وبدات احطها
ومفيش اى فايده الامر زاد
وبدل نقاط الدم بقيت اجيب دم متجلط زى قطع الكبده الصغيره
والالام الله لايوريها لمسلم
لدرجه انى فضلت تلاته ايام ما اكل عشان ما ادخل الحمام وكنت اذا اشتد على الجوع اكل شيىء وبعدين اشرب ميه وملح عشان ااستفرغ
لغايه يوم زاد الدم فيه لدرجه مفزعه والالم
والدتى قالتلى غصب عنك لازم تروحى لدكتور
وسالت فعلا قالوالها دكتور جراحه وكان الامر صعب على جدا خاصه انى منتقبه
لكن الالم كان اقوى
وفعلا رحت للدكتور وقلتله
قالى ان الامساك الى من الصغر دا راجع لعيب خلقى عندى فى القولون اسمه القولون التقلصى
وكان لازم يتعالج قبل ما اتم تلات سنين بجراحه لتعديله
وطلب منى انه يفحصنى
وقالى ان عندى شرخ شرجى مع التهاب فى الشرج
وقالى ان الشرخ مضيق الشرج ومصعب التبرز
وقام بقطع زى جلده على الشرخ كانت مضيقه الشرج عندى
ودا بجيل موضعى
ويبعدها كتب لى على علاج
ملح فوار لاكسيل اخده مره الصبح على الريق
ومره مساء قبل النوم
ودا منشط للكبد ومنظم للهضم ويمنع الامساك وبيلين البراز بحيث انه ميجرحش الشرج ولا الشرخ مره تانيه
وادانى مضاد حيوى اسمه رانسيف 205
تلات مرات يوميا
ومضاد للالتهاب ومسكن اسمه بوتافين50
تلات مرات ايضا
وكريم مسكن ومخدر للالم اسمه ايزانال
احطه طوال اليوم
وفعلا الالم نزل للنصف تقريبا والهضم انتظم
ورحتله بعد خمس ايام
قالى ان لسه فيه التهاب
فقالى استمرى على لاكسيل والكريم المخدر
وبعد ما يخلص بوتافين ورانسيف
غيريهم
ب سيتافين مسكن ومضاد لللالتهاب
وايرمزول مضاد للبكتريا اللاهوائيه
والحمد لله النزيف قل خالص
والالم بقى مختمل واثناء التبرز فقط دقايق وينتهى
وان كانت مرات التبرز تصل الى خمس مرات احيانا نظرا للعيب فى القولون عندى
وان شاء الله اروح للدكتور كمان عشر ايام
بنات انا كتبت تجربنى عشان لاقيت ان الشرخ والبواسير منتشرين جدا
وكل البنات زى مكسوفين يروحوا لدكتور وسايبين نفسهم
بنات لازم تروحوا لدكتور هو الادرى بالمرض وبعلاجه بعد الله تعالى
والامر صحيح محرج لكن افضل من الالم
ومتنسويش ان الدكتور دى مهنته وان الامر ليس فيه حرمه
وان وجع ساعه ولا كل ساعه
والوصفات الى بتتكتب على النت وعلاج الاطباء بدون فحص امر خاطىءؤ جدا
فياريت كل بنت ربنا اختبرها بالمرض ده تكشف وتروح لدكتور
لام الامر قد يتطور ل امر خطير
وكمان بنيه كل ام عندها طفل دايما عنده امسك انها تكشف عليه وتعمله اشعه على الجهاز الهضمى
لانى لاقيت الامساك الى عندى سببه تشوه فى القولون اصبح علاجه صعب
المحنه دى اثبتت لى ان الصحه اكبر نعمه فى الحياه
وصدق قول المصطفى نعمتان مغبون فيهما الكثير الصحه والفراغ
دلوقتى بقول عنى ما خسيت المهم بس انى اعرف امشى على رجلى وادخل الحمام
وعرفتنى ان فيه نعم كتير الواحد فيها مش بيشكر ربنا عليها
اتمنى انكم تستفيدوا من تجربتى
وبالله عليكم
ادعولى يا بنات ان ربنا يشفينى وما يرجعش تانى لى الشرخ دا تانى
ويشفى لى القولون ويمتعنى بالصحه انا ووالديا واخوتى
هذا الموضوع مغلق.
أغلى ناس في العالم
•
الحمد لله على السلامة
الصفحة الأخيرة