لون جسمى ابيض فكان باين الفرق واستخدمت كريم طبى مقشر لتفتيح الابط
كتبهولى الدكتور وجاب معايا نتيجة لوقت بسيط بس بعد فترة رجع السمار
تانى واختى كمان استخدمته قبل زواجها ورجع السمار تانى
ولما جيت اعيد استخدامه حرقلى الجلد وعملى سمار اكتر من الاول
لانه كان بيقشر الجلد وكمان استخدامه كتير غلط لانه فيه كورتيزون
الكلام ده كان الشتاء الماضى ولما دخل الصيف قلت لازم اواظب
على الليمون لانه بيفتح وااصلا كنت بستخدمه من فترة للتانية
كمزيل للعرق.. ولون الاكواع كان اغمق من لون جسمى بشوية صغيرة
حوالى 3درجات والركبة والمنطقة الحساسة من 6 الى 7 درجات
بالنسبة للإبط:
بستخدم الليمون بدل مزيل العرق يعنى بيزيل ريحة العرق ويطهر
ويفتح اللون انا بقالى سنييييين مبستخدمش مزيلات العرق
لانها السبب فى السمار وكنت بستخدم خلطة الشبة والمسك
بس بعد اما واظبت على الليمون بطلت استخدم الشبه
و بقيت اديها لماما واخواتى
الطريقة :
كل يوم اشطف تحت الابط بماء دافى وبعدين انشف كويس
واجيب نص ليمون وافرك بيها على المكان الغامق بلطف لحد ما ينشف وبعدين ألبس
ولو مبتحبيش ريحته استنى لحد مينشف وبللى بميه ونشفى بس الافضل انك تسيبيه.
وطبعا بعد كل استحمام بحط الليمون قبل ما البس هدومى..
وساعات كنت بحطه مرتين فى اليوم الصبح وبالليل بس بعد فترة بطلت
احط بالليل لانى بدأت احس ان ده كتير على الجلد وكل 3 او 4 ايام
فى الشتا بستخدم اليوكو سبا ملح الحليب
كمقشر للابط اما فى الصيف ممكن استخدمه كل يوم
الاحتياطات:
1.فى ناس عندها حساسية لليمون فلازم تجربيه الاول على ناحيه واحده
لو حرقك بشكل بسيط ده عادى مفيش مشكلة بتبقى زى غزات كدا لمدة ثوانى
او اول دقيقة وبتروح اما لو حرقك جدا اشطفيه وحطى كريم للحساسيه
وجربى بعدها بيوم او اتنين بس بطريقة تانية فى ناس بتحب تخلط الليمون
مع كريم مرطب بس انا بحطه كدا من غير حاجه نادرا لما احط كريم مرطب
وكل بشرة غير التانية فعلى حسب نوع بشرتك فى تانى مرة اخلطى نص الليمونه
مع نفس المقدارمن الكريم المرطب اللى بتحبيه وحطيه
لو حرقك تانى اشطفيه فورا ويبقى بشرتك حساسه لليمون..
بطلى تستخدميه لانه هيجيب نتيجه عكسية
.
2..لو مش عندك حساسيه واستخدمتيه وجيتى شلتى شعر الابط بالحلاوة
بطلى استخدام الليمون لمدة يومين بعد الازالة تجنبا ً للاحمرار او الالتهاب
وبعدها ارجعى استخدميه عادى تانى..ولما تعملى تقشير باليوكو سبا متحطيش الليمون
بعده علطول لانه ممكن يحرقك شوية ..حطيه بعدها بساعه مثلا
النتيجة:
انا مازلت بستخدمه و اخد معايا وقت كتيييير شوية لانى كان الجلد عندى محروق
من المقشر الطبى ودلوقتى الابط فتح بنسبة 80%
ولما بزيل الشعر بالحلاوة بيبقى المكاااااان تقريبا نفس لون الجسم
لان الحلاوة بتشيل كمان الجلد الميت فالمكان بيبقى نضيف قوى.
مهما اخد معاكى وقت متبطليهوش بجد النتيجة تستاهل..
فى ناس قرايبى كمان جربوه وقالولى انه فتح لهم المكان.
.وبقيت انصح بيه كل صحباتى وقريباتى
بالنسبة للركب والاكواع والمنطقة الحساسة:
الطريقة
بجيب كريم جليسوليد الاحمر
اخلط منه مقدار عقلتين اصبع مع ليمونة كبيرة او ليمونه ونص
واخلطهم كوييييييييييييييييييس لحد ما يتجانسوا تماما
ويكون القوام مش سميك يكون خفيف ولو عوزة تزودى فى المقدار زودى براحتك
والجليسوليد لما بتخلطيه مع الليمون بيزيد فى الحجم وبيديكى نفس كمية
الترطيب وبعدين احط على الركبة والكوع والمنطقة الحساسة ولما احس
ان البشرة اتشربت الليمون شوية من الخلطة اكون مجهزة
البلاستيك الشفاف اللى هما بيغلفوا بيه اطباق الجبنة واللانشون والحاجات
دى فى السوبر ماركت
واقطع منه اجزاء الف بيها ركبتى والمنطقة الحساسه الفها كويس
من قدام والخلف والبس ملابس داخليه قديمة وبنطلون قديم تحت اللبس
عشان مش ابهدل هدومى ..وانام بيها بس غالبا بعدها بساعة
او اتنين اقوم بشيل البلاستيك الاكياس واكمل نوم والصبح ادخل بقى الحمام
اشطف بماء دافى كويس وممكن أأقشر بعدها..
والتقشير فى الشتا بعمله مرتين بالاسبوع بملح الحليب وفى الصيف
ممكن كل يووم بشيل بيه الخلطة من على جسمى بعد الشطف بالماء الدافى
.((بلفهم بالبلاستيك عشان ترفع درجة حرارة الجسم فيتشرب الخلطة وبنفس الوقت
مش ابهدل هدومى واللى متجوزة تقدر تعملها الخلطة الصبح لما جوزها
يروح الشغل وتلفها بالرول البلاستيك وتشتغل فى بيتها عادى وهيا حاطاها
وتشطفها قبل ما يرجع.
حاجة كمان انا مش بعمل كمية وبعينها فى التلاجة ..لأأ انا بعملها فى وقتها لانى بحب
كل حاجة تكون فريش وعموما الليمون مع اى مرطب ينفع لتفتيح
اى منطقة غامقة فى الجسم واقوى المرطبات هو جليسوليد ..و
على رأى اللى
قالت (( اعصرى لمونة وابتسمى للحياة)) )) .
النتيجة :
لون الأكواع عندى بقى نفس لون الجسم بالظبط وكانت اسرع نتيجة احصل
عليها كانت فى الاكواع لانها كانت غامقة على خفيف
والمنطقة الحساسه من فوق فتحت بدرجة 90% ومن تحت بدرجة 60 %
ودلوقتى الركبة فتحت بدرجة 80%
ومازلت بستخدم الخلطة ...
طبعا بنصح ان فى اول فترات من الاستخدام تعمليها كل يوم او مثلا 3 ايام
ورا بعض وتبطلى يوم وهكذا عشان تبقى النتيجة اسرع ولما تحصلى على النتيجة
اللى ترضيكى ممكن تعمليها كل يوم ويومين او مرتين فى الاسبوع عشان تحافظى
ع النتيجة اللى وصلتيلها..انا الموضووع اخد معايا فترة طويلة
لانى مكنتش بعملها بشكل مكثف وبانتظام بس لما انتظمت من شهرين
كدا لاحظت النتيجة بقت اسرع
الاحتياطات :
المنطقة الحساسة برده جربى على جزء منها واتأكدى ان مش عندك حساسية..
وانتى بتحطى الخلطة عليها خلى بالك لا تدخل للمنطقة الداخليه حطى فوق وعلى
الاشفار الخارجية واتأكدى انها مش هتدخل للمنطقة الداخلية
عند الغشاء او ما يحيط بيه ولا حتى تلمسه.
وانا بزيل شعر المنطقة الحساسة برده بالحلاوة وهيا افضل وسيلة
بستخدم الحلاوة لكل جسمى بس بشترى الحلاوة
اللى هيا بالفاسوخ والمستكة من رقة المشاعر اللى بتخففف الشعر
وتمنع ظهورة مرة تانية..
دى خلاصة تجربتى مع السماااااااااااار
هحطها فى كل الاماكن اللى استفدت منها
اتمنى اكون افدتكم
اى سؤال تحت امركم ..
