فى البداية الحمد لله حتى يبلغ الحمد منتهاه
أناحبيت اشارككم معايا تجربتى اللى مريت بيها خلال الثلاث شهرو اللى فاتوا لأنى لما فكرت اعمل العملية كنت محتاجة اسمع و اعرف من ناس كتير لأنها عين مش لعبة يا جماعة
انا عندى 39 سنة طبعا عمليات الليزك موجودة من زمان و انا كنت الصراحة خايفة منها ما احنا قولنا دى عين ...كنت طبعا من زماااان باستخدم العدسات اللاصقة الطبية مع النظارة بس فجأة زهقت و زى ما تقولوا كده ربنا اراد و أن الأوان ان اتغلب على خوفى طبعاً سألت اصحابى اللى عملوها من فترة و قرايبى و اطمنت و شوفت دكتور ثقة و متجرب
رحت مستشفى الرواد للعيون اللى فى الدقى يوم 8/4/2018 و عملت ال pentcam و ده فحص القرنية استرخمته شوية عشان حسيت انى دخلت فى الجد بس لما الدكتور شافه قاللى القرنية فى العينين فيها اماكن مش مستوية مش عايزين نخاطر و نعمل ليزك يعمل مشاكل قدام يا اما هانضطر نعمل عمليتين مع بعض التصحيح و بعدها تثبيت قرنية و كان رأيه ان أنا استنى شهر كمان و كتبلى على قطرة مرطربة اسمها systane ultra و جل للعين مرطب برده لسمه Thilo tears و قالى ممكن يعالجوا فى الفترة دى موضوع القرنية ده و طبعا فى الفترة دة استخدم النظارة الطبية بس ممنوع نهائى اللينسز هو كده كده قبل اى عملية ليزك باسبوع المفروض ما تستخدميهاش.استنيت حوالى شهر على القطرة و الجل و رجعت ليه يوم 15/5/2018 عملت تانى فحص القرنية لاقاها الحمد لله زى ماهى ما اتحسنتش
بنفس نقط الضعف اللى فيها قاللى هانعمل ايه لو عايزة تصحيح يبقى لازم بعده على طول عملية تثبيت قرنية عشان ما نتعرضش لاحتمالات مش كويسة او القرنية تتحول لمخروطية مع الوقت ( العمليتين مع بعض كلفونى معاه 6000 ج طبعا سعره كويس اوى بالنسبة لاماكن تانية)كنت طبعا مستخيرة الله كذا مرة قبل ماروح قولتله خلاص اتكل على الله و دخلت اعمل التصحيح طبعا اى اوضة عمليات و سرير ليهم رهبة بس الموضوع ما اخدش اكتر من 15 دقيقة للعينين عملت ليزك سطحى PRK عشان زى ما قولتلكم سمك القرنية مش كبير و دى بيحصل فيها كشط للقرنية و توجيه الليزر للتصحيح بتشمى ريحة شياط شوية ما تخافيش هى حاجة تخوف بس بتعدى نصيحة ما تتفرجيش على اى فيديوهات لعمليات فى العنين نهائى قبل ما تدخلى .
بعدها قومت و دخلونى اوضة تانية عشان اعمل تثبيت القرنية cross linking دى بتاخد وقت عشان بيحطولى قطرة و تفضل فى عينى شوية و يفضلوا يكرروا ده تقريبا 20 دقيقة او حاجة كده و بعد كده بيوجهوا اشعة على كل عين و لما خلصوا حطلى عدسات حماية شفافة على عنيا ...طبعا كل العمليات دى بتتم بقطرة مخدرة موضعية.
خرجت من العمليتين بعد حوالى ساعة و كنت شايفة طبعا و فرحانة بس كأن فيه ستارة بيضاء او شاش قدام عينى الدكتور شافنى تانى و كاتبللى القطرات اللى هامشى عليها و قاللى تعالى كمان 4 ايام يطمن على و يشيل العدسات و طبعا ممنوع فى الفترة دى مايه تدخل عنيكى تاخدى شاور او تتوضى و تحافظى على عينك ... لحد كده تمام اهو
ركبت العربية و عنيا فضلت تدمع بشكل رهيييب لحد ما وصلت البيت اتوضيت و صليت و نمت طبعا الدكتور كان مدينى مسكنات حقن عشان العمليات بتفضل تألم أسبوع او 10 ايام غير الليزك العادى بس برده عدت و المسكنات عملت نتيجة و ربنا رحمنى لأننا كنا فى رمضان .
روحت للدكتور اشيل العدسات و كانت طبعا الزغللة شديدة و هو كان بصراحة قايللى انها هاتفضل شهرين او تلاتة و هتقل بالتدريج كنت مخنوقة جدا و حاسة نفسى مش شايفة كويس و فيه ضباب ابيض على عنيا و مش عارفة اكتب و لا اقرا و لا اشوف التلفزيون و لا امسك الموبايل الدنيا كانت بايظة قولتلله قاللى عادى هايروح ... اول ما شال العدسات كأنى حاطة رمل فى عينى و بشوف كل حاجة كأنها فى مياه طبعا شعور يضايق و احساس بالعجز رخم اوى. استحملت لانى عارفة ان عملية ال PRK بتاخد وقت اكتر من العادى شوية لكن مع الوقت بقيت احس ان فيه عين افضل من عين واحدة يعنى نوعا ما ممشيانى و التانية دى عليها ضباب رهييييب معتمة و ما بقدرش افتح عينى فى النور
و خصوصا لما رجعت شغلى كانت نفسيتى تعبانة جدا مش شايفة حاجة على شاشة الكمبيوتر و الكتابة فى الورق مزغللة و برده الضباب مش مخليها واضحة اصلا كان بقالى 15 او 20 يوم بعد العملية المهم كلمنا الدكتور و روحتله كنت فى اليوم ده بدأت احس ان العين الشمال بدأت تتحسن شوية و اشوف بيها افضل لكن اليمين لآ ...اول ما شاف عينى اليمين و انا لسة بقوله العين دى مش كويسة لاقيت وشه اتغير و قلب حسيت عينى راحت و قاللى فى تقرح فى القرنية اللى هو فعلا 
و سألنى انتى اتخبطى فيها قولتله لا خالص و باستخدم القطرات و الجل فى مواعيدهم المهم طبعا انا حسيت الدكتور هايعيط و الله بس انا كنت مش خايفة مش عارفة ليه ربنا نزل البرود على كده يمكن عشان انا كنت متأكدة ان ربنا هايشفينى و مش هايضيعنى انا صليت استخارة و كل ركعة بدعى بدموعى انى اخف و انا واثقة فى ربنا انها هاتعدى فايه بأه اللى هايحصلى انا سيبتها لله و اكيد مش هايخذلنى 
.... الدكتور وقفلى قطرات من اللى كنت باستخدمها ساب بس القطرة و الجل المرطب و كتبللى قطرة تانية مضاد حيوى اسمها Vigamox و ادانى مضاد حيوى hibiotec كبسولات و قالل اشوفك ضرورى كمان اسبوع و هو متنكد كده .. عملت اللى قاللى عليه و رحتله كنت حاسة انها اتحسنت شوية صغيرين و هو قاللى كده برده لما شافها تخيلوا كان بيخلينى استخدم القطرة دى لمدة اسبوعين كل ساعة يعنى تقريبا معلقاها فى رقبتى و المرطبات كل ساعتين لما رحتله بعد اجازة العيد قاللى الحمد لله اتحسنت اكتر و فى الفترة دى كانت عينى الشمال بقت تمام و شايفة بيها كويس و الزغللة بتيجى اوقات و تروح انما العين اليمين كان عليها سحابة بتعتم اوى فى الشمس او النور حتى مع نظارة الشمس تقريبا كنت مابقدرش افتح عينى فى النور .روحتله بعد كده باسبوع كمان فى مستشفى الرواد للعيون عشان الآجهزة المتخصصة و يعمل فحص القرنية و عملته فعلا طبعا العين اليمين التعبانة لسة ظهر فيها شوية نقط و العين الشمال بقت ماشاء الله تمام دكتورين كمان شافونى معاه و حطلى عدسة طبية شفافة على العين اليمين قاللى دى هاتسرع شفائها شوية و كنت مستمرة لسة على نفس القطرات بس بقت كل 4 ساعات و قاللى تعالى تانى كمان اسبوع ... فى خلال الاسبوع ده حسيت انى بدأت اتحسن و بقيت اقدر افتح عنيا فى الشمس كان الموضع ده تاعبنى جدا نفسيا تخيلى نفسك انتى لا عارفة تسوقى و لا حتى تنزلى تركبى مواصلات لوحدك كأنك ما بتشوفيش محتاجة حد يبقى معاكى كنت بشوف فى الضوء العادى او الضلمة شوية احسن من النور و الله . رحتلله كمان اسبوع زى ما قاللى و انا مبسوطة كشف على عينى عشان يشوف اخبار السحابة دى ايه لاقاها اتحسنت ادانى عدسة تانى و قاللى حطيها اسبوع كمان و ارميها و ادانى قطرة جديدة عشان تقلل الزغللة الكلام ده كان عدى على العملية حوالى شهر و نص او اكتر شوية .
و أول مرة بأه يقوللى و يصرح لما لقى الحالة اتحسنت و بقيت اشوف بالعين التعبانة بنسبة 80% قاللى انا ماكنتش متوقع انها تتحسن كده و مارضيتش اقولك ان انتى حالة نادرة ماشوفتهاش بعنيا قرينا عنها فى الكتب بس لكن الحمد لله انا قولتله انا عارفة لآنى بحثت فى موضوع عينى ده و عرفت انه نادر انه يحصل كده بس ماكنتش عايزة اصدق ان انا ابقى من الحالات النادرة دى . تخيلوا قرحة القرنية دى خطرها ممكن يوصل انك تفقدى العين لا قدر الله لو ما تعالجتش صح و السحابة البيضاء العجيبة دى مانعرفش ايه سببها الادوات معقمة و دكتور متجرب و أمين و مستشفى متخصص يعنى أخدنا بالأسباب لكن ربنا اكيد ليه حكمة يمكن انا كنت محتاجة ادعيه اكتر و اكفر باللى حصللى ده عن اى ذنوب عملنتها انا بشكر ربنا فى كل وقت انا جربت شعور العجز و دا خلانى اقدر النعمة اللى ربنا مديهالى و افكر ان ممكن فى لحظة اللى انت متعود تعمله ما تقدرش تعمله ( فكرة اعتياد النعمة ) الحمد لله حمدا كثيرا .
أنا دلوقتى بقيت افضل بفضل الله و نعمته عينى دى بقت شايفة بنسبة مثلا 85% و الزغللة بتروح منها بالتدريج لسة فيها سحابة شوية بحسها فى ضوء الشمس بس احنا كنا فين و بقينا فين بمارس حياتى عادى و شايفة و بكتب اهو مش عشان اخوفكم لآ عشان احكيلكم ايه ممكن يحصل فمتخافوش لآنه بيعدى ان شاء الله .
طبعا يفضل لو حد هايعمل العملية دى تكون خلصت دراسة او فى اجازة و لو بتشتغل زى كده اسبوع او 10 ايام اجازة يكفوا و ان شاء الله يبقى وضعكم افضل من اللى حصل معايا و تتحسنوا اسرع العملية نتيجتها جميلة و النظر نعمة كبيرة .
دعواتكم لى بتمام الشفاء و بوصيكم اوعو تبطلوا دعاء لربنا ابدا قادر كريم يبدل من حل لحال
دمتم بخير و بصحة و ربنا يمتعنا جميعا بالعافية
والله يتمم عليك الصحة والعافية..ولا يضيع لك تعب
وشكرًا غاليتي لمشاركتنا تجربتك .