تجربتين كل وحده اصعب من الاخرى

السلام عليكم ورحمة الله وبركاته
حبيت اشارككم اليوم قصتي لعلي اشوف آرائكم واتشارك معكم بالراي ( مع العلم اني متخذة قراري ومستخيرةاولاً ) لكن يمكن اكون غافلة عن شي واحد ينبهني او احد يواسيني بالنهاية ماخاب من استشار ..
اخواتي انا تزوجت وانتهى زواجي سريعاً بسبب خيانة للأسف من طرفه طبعاً ، تزوجت مره ثانية بعدها بسنتين ومن اول زواجي مارتحت لتصرفاته وكنت استغرب اشياء من شخصيته ولكن حطيت العلة فيني باني دقيقة ، زوجي للأسف يشرب وللأسف اكثر اني كنت اعرف قبل الزواج ، ولكن ماعرف ليه قبلت يمكن لاني حبيته ولم احب قبله ؟ يمكن لاني تعقدت من تجربتي الاولى والخيانة خصوصاً ان الاول كان يخاف الله لكن ماخافه فيني ، عشان كذا قلت مارح احكم بسبب هالموضوع وان شاء الله يتغير وربي يهديه .. اكتشفت بعد الزواج عدة خصال ، يكذب كثير حتى بتوافه الامور يعني طبعه كذا ، سبّاب وعند الانفعال يرميني بابشع الالفاظ وخصوصاً انني امرأة قوية ولست خاضعه او هادية اذا احد غلط علي ارد لاني ماتعودت بحياتي احد يعاملني كذا .. حاولت اغير طباعي واسكت بوقت السب لكن مافاد وكنت اتوجع زيادة على نفسي .. اكثر من مره نختلف ونتجادل ويطردني مثلا يقول : ( انقلعي ، ضفي وجهك ... الخ ) وبما اني ماتعودت اسمع كلام مثل كذا كنت اطلع فعلا لاني مارضاها على نفسي .. ويجي يراضيني وارجع .. زوجي ما اقول انه مو طيب ، هو طيب وحنون ولكن عصبي وبالنسبة للشرب حاولت انصحه وحاولت امنعه ولكن كان الشرب اقوى مني ولا نفع معاه اي اسلوب حتى اسلوب المهاداة مانفع .. صرنا نختلف كثير ويطردني كثير كله بسبب الشرب اللي اتحمل غلطي فيه طبعا .. قبل فتره اختلفنا بسبب اني فتحت معه موضوع الشرب وكان يهددني بالضرب وقالي هذا انا عاجبك او سوي اللي تبغينه وتعالت الاصوات وقررت اني ماقدر اتحمل وهو قالي اطلعي .. اخذت اغراضي وطلعت وماحاول يغير نفسه وخصوصا ان موضوع الشرب بدأ يطالني اذاه جسديا وليس فقط نفسيا لانه لما يعصب ممكن يرمي علي شي او يمسكني بقوة .. الحين انا تاركته توقعت منه عالاقل يحاول ( بحكم حبنا لبعض وبحكم اني ما انزه نفسي وفيني عيوب واخطاء لكني انسانة كويسه واخلاقي الحمدلله كل احد يشهد بها ) لكن اللي حصل اني سمعت انه يستعد لترتيبات الطلاق ..
عيوبي هي انني بسبب عقدتي من الخيانة تعبته معاي بالشكوك وخصوصا انه هو شخص غامض ويكذب مما زاد الطين بله ، ولكن تصرفت وذهبت لدكتور نفسي اعالج مشكلتي لاني احبه وابي اتغير عشانه واعترف بعيبي ..اكثر مايضايقني اني فشلت مرتين واتوجع لهالموضوع وهذا اللي كان يمنعني من اني اختار الطلاق حتى لما عرفت من اول الزواج باني مارتحت معاه ..
اعتذر عن الاطالة واتمنى منكم راي بدون تجريح مع العلم عندي منه طفل .