تجربتي : أشعة الصبغة بالتفصيل الممل

حبيت اكتب لكم تجربتي بالتفصيل عن اشعة الصبغة وكم سعرها وايش اخذت من علاجات بعدها ومتى سويتها واي افضل وقت لها ..
طبعا انا متأخرة بالحمل وعندي تكيسات واكثر من كورسات تنشيط اخذت وماصار حمل ، وزوجي سليم فحص اكثر من مرة ..
انا صراحة ماكنت اعرف عن اشعة الصبغة ومن قرأت عنها قلت لازم اسويها حتى لو فيها أوجاع ...
قرأت تجارب كثيرة عنها وفي من قالت ماتوجع وفيه من قالت توجع كثير والتجارب متفاوتة ..
بعد كورس تنشيط قلت للدكتورة اذا ماحصل حمل راح اعمل اشعة الصبغة الشهر اللي بعده ..
وفعلا ما حصل حمل ..
توكلت على الله وقالت لي تعالي اول ماتطهرين من الدورة مباشرة لا تتأخري ..
وفعلا جيتها ثامن يوم من الدورة ..
وقالت لي قبلها لا تشربي منبهات كالقهوه والشاي عشان يستجيب جسمك للمسكنات قبل الاشعة ..
جيتها الصباح ، واخذت مسكن فولتارين حقن عن طريق العضل وجلست تقريبا ثلث ساعة ..
دخلوني غرفة اشعة وكأنها غرفة عمليات .. والله جدا ارتعبت فوق ما أنا بالأصل مرعوبة ..
وحاولت ما اشوف الأدوات مو ناقصة رعب والله ..
بس اكثر شيء رعبني وجود الدكتورة واخصائية اشعة عند الجهاز الثاني وثلاث ممرضات ومعقمات وادوات وكلهن لابسات لبس عملية وكمامات !!
قالن انزعي ملابسك والبسي لبس خاص بالعمليات بصراحة هنا انا خفت عالآخر حسيت برهبة على توتر على كلام بعقلي يقول يا بنت انتي سليمة بس تعوذي من ابليس وارجعي للبيت ..
توكلت على الله وعملت كل اللي قالوه لي وانسدحت عالسرير وفوق مثل جهاز يصور او حاجة زي كذا ..
وقدامي الدكتورة على كرسي وخلتني افتح رجولي عالآخر وما اتحرك كثير وجلست تطمني انها سهلة بس انا ماساعدت نفسي
دخلت جهاز مثل الانبوب العريض جدا مع مقص او آلة تشبة المقص او المنقار وبصراحة ما اوجعتني بس وهي تدخلها مزعجة مرة ومحرجة كثير ..
حسيت وقتها ان فيه شيء انفتح داخل الرحم ماعرف كيف اوصفه ..
اول ماحقنت الصبغة صرخت صرخة كل المستشفى سمعوها والممرضات يمسكون يديني يثبتوني عشان ماتضطر تعيد الصبغة مره ثانية ...
بصراحة يا بنات ألم فضيع مايوصف حسيت رحمي ومكان المبايض على بطني على رجولي يوجعوني مره لدرجة اني صرت ابكي واصرخ واقول لها خلاص ما ابي برجع للبيت ..
وهي تصبرني وتقول لي كلها كم دقيقة ونخلص وتشجعي انتي قوية وانتي وانتي ..
طلعت بالاخير الدكتورة حقنت الصبغة مرتين عشان كذا توجعت اكثر ..
المهم خلصت واخذت تقريبا خمس دقائق ويمكن لو كنت هادئة كان بدقيقتين فقط وانتهينا ..
قالت لي خلاص انتهينا ، وباقي نطلع الانبوب من الرحم .. وبصراحة شعور مزعج لما تطلعه فيه ألم بسيط ..
طبعا الوجع راح بنفس الوقت والآلام انتهت ، بس تحسي رحمك تعبان وكأن عليك الدورة وجسمك من تحت كله بارد نفس احساس الدورة بالضبط ..
طبعا بنفس اللحظة خرج دم كثير والى الان الدم معاي كأن الدورة رجعت لي بعد الطهر ..
قالت لي الدكتورة هذا طبيعي وتقريبا يومين وتنقطع ..
عشان كذا لازم الوحده تاخذ معها فوط صحية ..
ّ
والحمدلله طلعت سليمة تماما يا ربي لك الحمد ..
على كثر أوجاعها نسيت كل شيء لما طلعت سليمة ولله الحمد ..
الدكتورة قالت لي اصلا من صرختي عرفت انك سليمة لأن اللي ماتتوجع تكون الصبغة مادخلت الانابيب ..
وانا ماقصرت بالصراخ والبكاء :)
وقالت لي الجماع ممنوع لمدة يومين الى ثلاث ..
وطبعا قبل الصبغة مافيه جماع اطلاقا ..
واعطتني تحاميل البوثيل وغسول ..
بس للأسف قالت لي معك قرحة ولازم كي .. انا ماكنت ادري انه معاي قرحة !
اهملت نفسي بالالتهابات وانا ماعرف افرق بين الالتهابات وافرازات التبويض الله المستعان ..
قالت القرحة معك كبيرة بس علاجها سهل وممكن هي اللي تعيق مرور الحيوانات المنوية ..
وراح اسوي كي الشهر الجاي بعد الطهر مباشرة ..
انا الآن لي اربع ساعات من سويتها اشعة الصبغة والى الان احس بأعراض الدورة وبرودة بجسمي من تحت وان رحمي يوجعني شوي ..
لكن الحمدلله اني سليمة ورحمي سليم وانصح كل وحدة متأخرة بالحمل ومانفع معها تنشيط انها تسوي اشعة الصبغة وتحليل الاجسام المضادة وتعالج الالتهابات اذا معها قبل لا تتحول لقرحة ..
سويت تحليل اجسام مضادة ب 300 ريال عن طريق الدم والحمدلله ماعندي اجسام مضادة ..
واشعة الصبغة كلفتني 400 ريال
ابرة فولتارين 20 ريال
تحاميل البوثيل 14
غسول هيربا كير 75
هذه تجربتي وعدت بسلام ..
نصيحة نصيحة لا تهملون اشعة الصبغة كلها وجع دقائق .. بس تكشف لك كل شي داخل ...
اي سؤال حاضره .. بس قولوا لي الكي يوجع !!
الدكتورة قالت لي مايوجع الكي .. بس مدري خفت والله