تجربتي إلي بهرت كل من شافني "كاااااااااان وزني 75 والحين والحمدلله صار 55 "

كيف الحال ومبارك علينا وعليكم العيد مقدماً
بصراحه أنا ماأحب أسوي ريجيم أبداً لكن أخفف ممكن
مع إني دائماً أقرأ واسمع بس مطنشه بمزاجي على بالي جسمي مو مره متين لأني ما دبدبت إلا يوم جلست سنتين بعد التخرج قاعده آكل ونوم ويادوب شغل بسيط بس .
وبعد سنتين قمت أجرب تنانير الكلية لقيت الوضع ما يخارج تفاجأت إن ولا تنورة من تنانير الكلية تضبط عليه.
فأيش سويت صرت لما أقوم العصر على طول أشرب كوب ماء وبعدها كوب شاي أخضرلأني سمعت إنه قبل الآكل ينحف وبعد الآكل يثبت الوزن.
وأحياناً أسوي خلطة مره حلوه لشد البطن تدرون أيش هي أكيد الكل يعرفها وهي (الكمون والليمون )
أحط ملعقتين كمون ومويه حاره وأغليها على النارفي براد وسط وما عاد تحتاجينه وأطفي وأحط فوقها شرايح ليمون مقطعه وأغطي على البراد وأكتم فتحته بالقصدير وأخليه حتى يبرد وأحطه بعدين في الثلاجة عشان كل عصر أشرب منه كوب وسط ماهو كبير.
وكملي شغلك حتى تنتهي نصف ساعة وحاولي كل ماتذكرتي تشدين بطنك لمدة عشرين ثانية وبقوة وهكذا .................
أسبوع بس وراح تشوفين البطن بدأيصغر وصرتي خفيفة حتى في ركوعك وسجودك وحتى لما تقومين من على السرير تحسين إنك نشيطة حيل.
بعدها بنصف ساعة أكل 3قطع توست محمصه وبيضه مسلوقة ومملوحه وكوب عصير سن كويك وشطة لأني أحبها حيل
ويوم ثاني أبدل بدل البيض شريحتين جبنة مربعات قليلة الدسم.
وأروح أمشي لمدة نصف ساعة وإذا مشيت مسبحتي في يدي أسبح واستغفرعشان ماأتوقف عن المشي .
وأحياناً أشغل المسجل على أي شريط (إسلامي ) طبعاً عشان تحسين بطعم الوقت إنه يروح في شي ينفعك في الدنيا والآخرة .
وإذا جعت زبادي قليل الدسم أوكوب لبن قليل الدسم معه شوية مويه عشان يكون أخف وألذ .أو عصير برتقال أو كوكتيل أو أناناس وكيوي لأنه مره حلو الأناناس والكيوي للريجيمات زي ما قريت عند البنات بالمنتدى .
وفي الليل سلطة حمراء أوبيضاء طبعاً ومعها شطه بتكون ألذ وأطعم .
وأحياناً مشاوي إذا توفرت صدر دجاج مثلاً أو قطعة لحم مشوية أو مسلوقه طبعاً ماهو كل يوم مشاوي بس على حسب إذا جابوا أهلي من برأوعليها كم قطعة توست بس في الليل ما أحمصه عشان ما أطفش منه .
وحتى لو أشتريت شاورما عادي أكل وحده وبس.
وأرجع بعدها على طول كوب شاي أحمر مرررررررررررررررر بدون سكر
وأمشي النصف الساعة الباقية
وبهذا يكون مجموع الساعات (ساعة كاملة ) باليوم بس المره هذي مافيه مسبحه بس فيه مسجل تدرون ليش لأني أمشي وأشد بطني فلا يمديني أسبح أو استغفر
والله إني شفت نتائج تهبل وكل من شافني استغرب ( نحفتي ولاخرب وجهك ماشاء الله)
وأما جسمي فوالله أنشد بشكل ما تتصورون وتخفيفي هذا ولله الحمد ساعدني في صيام الأيام البيض وأيام الخميس والاثنين.
ملاحظة : أكيد في الأيام الأولى ماراح تقدرون تمشون نصف ساعة كامله فأقسميها ربع ساعة وأرتاحي فترة وأرجعي كملي الربع الساعة الثانية بتحسين إنك حققتي هدف في ذاك اليوم كله .
وهذا ريجيمي ومن أختراعي وجلست عليه تقريباً ستة شهور يمكن تقولون طولت وأكيد طولت بس لآني ما أقوم من على العشاء إلا قد شبعت (فل كامل) لأني أحسب حساب عشاء وسحور مع بعض.

وعلى فكرة فيه خلطة (تلين البطن )أنا عني والله شفت نتائجها على أختي الدلوعه الله يحفظها وعليه طبعاً مررررررررررررررررررره تهبل أنا آخذها مابين العصروالمغرب كقهوه .
الخلطة هي عبارة عن ثلاثة أشياء فقط وهي كالتالي :
ملعقتين زنجبيل ـ ملعقتين نعناع وأنا آخذ نعناع المدينة المنورة "المجفف والمعلب طبعاً " بس عادي لو أخذتي نعناع أخضر طازج أكيد بيكون أفضل ـ ملعقتين قشر رمان مطحون
تغلين كل المقادير على النار لمدة 5دقائق وبعده تحولينها في ترمس وتشربين منها متى مابغيتي بس أنا مابين المغرب والعشاء فقط.

((وأنصحك ماتأخذين من عند العطارين قشرالرمان لأنك ماتضمنين فين يخلي القشر ينشف يمكن في مكان ماهو نظيف لأني سمعت إن العطارين عندهم قشر رمان بس والله ماشفت .لكن أنتي كلي الرمان وبعدها أغسلي القشر بموية نظبفة وجففيه في المطبخ على منشفة نظيفة وكل يوم قلبيه حتى يقسى تماماً يمكن يستغرق أسبوع وأيام على بال ماينشف أو حطيه في غرفتك إذا كانت المروحه والمكيف شغاله , وبعدها كسريه وأطحنيه بالطحانه الكهربائية حتى يصير ناعم مره))
وهذي تجربتي ياحلوات.
ونصيحتي للخريجات إلي يقولون طفشانين من البيت يستغلون أيامهم هذي بالذكر والاستغفار والحمدلله دائماً وأبداً له سبحانه وكذلك الصيام والله فيه راحه وفائدة.
لأنك بتقعدين في البيت سنة سنتين ويمكن أكثر وبعدها بيجي ابن الحلال وتبدأين معاناه
(زوج ـ بيت ـ أطفال ـ سمنة )
وبهذا الريجيم تكونين استفدتي فوائد كثيرة
يارب يكون الجمبع استفاد ولاتنسوني من صالح الدعاء يابنات حواء.
وتكفون في هذي الأيام الأخيرة من هذا الشهرالكريم إنكم تدعون لبنت جيرانا "مهـــــــــــــــــــــــا" ولجدها بالرحمة والرضوان وأن يرحمهم جميعاً وجميع أموات المسلمين تحت الأرض ويوم العرض
اللهم آمين