تجربتي البئيسة في ولادتي بمستشفى الهدا:(

السلام عليكم ورحمة الله وبركاته...


أولا الحمد لله على سلامتي وسلامة بنتي..صحيح اني ولدت من تلاتة شهور بس جية احكيلكم قصتي عشان ولا وحدة تفكر تولد بمستشفى الهدا...

أول شي هدا أول حمل ليا يعني بكريتي بنوتة ربي لايحرمني منها ولمن كنت حامل فالعيد كشفت سونار قالتلي الدكتورة ان راس الجنين صغير وقعدت مكتئبة ومهمومة الين سويت تصوير 3دي واطمنت الحمدلله مع العلم ان متابعتي كانت بمكة والولادة بالهدا..
عدت دي القصة نجي للولادة بما اني بكرية ولدت بالاسبوع التاني من الشهر التاسع صحيت داك اليوم وما الاقي الا نزلت الموية الله يعزكم مع اني ماحسيت باي اعراض ولادة الا بعدها بدات الالام بس كانت خفيفة ماتوقعت اولد وبس عبيت اغراضي بسرعة لاني ماكنت مجهزتها لسه ماكنت اتوقع اني اولد يعني تفاجئت بس لمن الله اراد خلص جات الولادة المهم وطلعنا وفالسيارة كان الالم يشد شوية شوية الين ماوصلنا دخلنا الطوارئ وانا ابكي خايفة كيف حتكون الولادة +الالم وماما معايا والممرضة تستهبل على راسي تقلي ليش تبكي المهم وطلعوني بالعربية لفوق الين كشك الولادة الين وصلت وعينكم ماتشوف حالتي...لانهم منعو دخول ماما وزوجي معايا حسبي الله عليهم دخلت لحالي وانا ابكي خايفة اش حيسووا فيا الممرضات المهم عل طول جابولي ملابس وغيرت وجات فلبينية حسبي الله عليها فين ماكانت اول جات تسحب دم وتحط ابرة المغذي وانا اخاصمها اقلها بشويش وهيا عصبت قالت انا في بيبي بشويش كانت حامل هيا كمان الله يقطعها اقلها ابغى ماما تقلي ممنوع المهم وكل شوية تجيني وحدة وانا ابكي ابا اعرف اش حالتي ويطنشوني وجات وحدة باكستانية تقلي معليش حبيبي انتي ولادة اصبري وحطولي التخطيط وأظنهم حطولي طلق صناعي فالمغذي لان جات الفلبينية ودخلت اصباعها بقوة الله يقطعها والله كل مافتكرها يجيني رعب وقالت 2سم مع كل دا الالم وشوية وشوية يزيد الالم ما اصدق متى تجي لحظة الي يروح فيها الطلق ولمن يرجع اتجنن ..بس وشوية جات فلبينية وباكستانية وتنين طالبات متدربات تخيلو يابنات هدول الي ولدوني..حسبي الله عليهم وانا احس ان جسمي وعضامي بتتفكفك من الطلق وبتجنن يااااااااااالله الم فظيييييييييييع ما انساه ديك الساعة فعلا حسيت ماحد بيده مساعدتي غير ربي..وقلك جابولي كمامة زي البلا ماتسوي شي قمت رميتها ماستفدت شي وهما يقولولي ادفعي وانا ماني قاااااااااادرة يمكن من5-7 وهما يقولو يلا باقي شوية الراس قريب وانا اقول اصيح وهما يقولو انت مدلعة بس الين ماولدت وحطولي بنتي على بطني شوية وجا وقت الخياطة والله يابنات حسيت بألم ابرة البنج وماستفدت:44:حسيت وهما يخيطو وكل شوية اسالهم ماغلقتو وانا ابكي احس لمن تشد الخيط (ملاحظة :هما استعجلو عليا بالولادة وكبرو الجرح مرة لان لمن قالتلي فاتح 2سم بعد شويتين جات تقول 8سم يلا ولادة كيف كدا وانا مامشيت ولاشي حسبي الله عليهم بس )..المهم خلصت وطلعوني وشافوني اهلي وانا اتالم يقولو معليش طبيعي صبرت صبرت الالم نفسو بل زايد ويعطوني مسكنات برضو الالم ماقدر انام ومسدوحة على جنبي بس اتألم وأصيح ماما حست الوضع مو طبيعي وتنادي لاحد يجي يشوف حالتي والله يطنشوها الين ماعصبت وخاصمت جات وحدة تانية باكستانية حسبي الله عليها ماما تكلمها ماترد تطنش بس قالت الجرح متورم ومنفوخ صار تجمع دموي ونادو دكتورة مصرية جات تدخل اصباعها وانا اصيح وابكي وجسمي ينفض ماخليتها قالو مدام كدا لازم نخدرها عشان نقدر نشوف اش المشكلة وانا ابكي اقول لزوجي الله يخليك لاتخليهم ياخدوني وبعد ما تفقو مجموعة دكاترة قرروا لازم بنج كااامل عشان ينضفو الجرح يعني ماستفدت شي كني ولدت بعملية:(
وسلمت امري لله ودخلوني غرفة العمليات واعطوني اول شي ابرة في ضهري لتخدير الجزء الاسفلاني وشوية ومععد احس برجولي:( وبعدين سدحوني وكملو تخدير ونمت وبدأو يشتغلو كبرو الجرح ونضفوه من الدم وحطو شاش جوا وطلعت حطوني فغرفة الملاحظة ليلة كاملة بدون ماحد يجيني وطلعت تاني جو فالصبح دكاترة وشالو الشاش قديش طولو وانا أصيييييييييح وماما تبكي ياقلبي عليها خرجت برة تقول ماقدر اسمع بس والحمدلله على كل حال:(.. والبيبي مايرضو يطلعوه أبدا الين تخرجي من المستشفى ،تبغي تشوفيه ترضعيه انت تروحليه الله يكافيهم وانا بالقوة كنت امشي وجرحي منفوخ

بس هدي هيا قصتي :( سامحوني طولت عليكم بس والله عقدوني من الحمل والولادة والله صارت رعب بالنسبة لي:44: والله كم مرة دحين افتكر أو اشوف بالنوم الولادة اصحى مرعوبة جسمي ينفض:44::44: وشايلة هم كيف لو احمل مرة تانية:44:

الله يكتبلبنا الاجر نحن الامهات ولايحرم ولا أم من الجنة يارب

دعواتكم ربي يسعد بنتي ويصلحها ويجعلها قرة عيني ويجعلها بارة تقية نقية ولايحرمني منها يارب..


مودتي أحبتي:)