تجربتي الثالثة والاخيرة لاطفال انابيب عسى الله يطرح فيها البركة 🍇

السلام عليكم جميعا
ببدأ باختصار ب اول وثاني تجربة لاطفال انابيب بدون ذكر اسم المنشطات ذكرتها بموضوع مستقل بذيك الفترة واصلا نسيت اسم العلاجات 😩
التجربة الاولى فشلت لماذا لانهم عطوني ابر تنشيط وقالوا تعالي موعدك الاول وجيت وقالو بنعطيك ايضا ابر تنشيط وتعالي موعد الاخر وكانت الطامة 🤥 ان بويضتي الجميلة انطلقت في ارجاء الرحم ولم تحتمل المدة الطويلة بين الموعدين 🙄 وهذا سوء تنظيم منهم ليس الا /
وكله بقضاء وقدر وحكمة من رب العالمين
كان المفترض يعطوني مواعيد قريبة بين التنشيط الاول والثاني مع العلم ان حجم البويضة كبرت بس طمعو او ان خطة العلاج تستلزم هالحجم فقط لا اعلم 🙇‍♀️
كان الحجم 18 -22 مو متذكرة لكن المفترض يعطوني ابرة تثبيت البويضة لان بالعادة بهالحجم 18 تخرج بويضتي دائما اذا ب ارتب للحمل العادي بالبيت بدون تنشيط🙇‍♀️
التجربة الثانية وكانت رائعة حينما وطت رجلي غرفة السحب ويالها من غرفة 💃 قبلها بالفندق استشورت شعري و حطيت ميك اب ربع فل القلق كان مسيطر علي والارق ماسك فيني ف خففته بهالطريقة وتغيرت نفسيتي 180 درجة يوم السبت دخلت و طلعت من غرفة السحب للسرير ودموعي اربع اربع واشوف بالمراية هالدموع و شحلات شعري ومكياجي ونسيت الوجع كله وجفت دمووعي 😑
على فكرة ماتوقعت الم السحب كذا والصراخ اللي اسمعه من الحريم واللي تطلع من الغرفة وتشاهق قلت مو من جدهم بس لما اختكم في الله عطور جربت 🌝 عرفت الحق وين 🥴 الحمدلله كل الم ب اجر
وسافرنا لبيتنا السبت الظهر وجاني اتصال الاحد 🤥 قالوا ابشركم تلقحت وحدة من الدرجة الثانية و فيها البركة والثانية لم تتلقح وتعالوا يوم الاثنين بدون تأخير .
( لان عندي مخزون المبيض قليل جدا فما انتجت الا بويضتين فقط )
ورجعنا للفندق ننتظر موعد الاثنين بفااارغ الصبر والحمدلله رجعوا لي وحده و مت الم حتى في الترجيع !!
بعد انتظار دام اسبوعين لم يحصل حمل والحمدلله من قبل ومن بعد ،
🍒🍒🍒🍒🍒🍒🍒🍒🍒
الان تجربتي الثالثة والاخيرة ويارب اكتب فيها الخير واطرح فيها البركة 🌸
التجربة الثالثة يوم الاحد 30 يونيو - 27 شوال وكانت ثالث يوم دورة تقريبا .

سويت تحاليل دم واشعة عندهم والنتيجة
1)كان مقاس بطانة الرحم 3 <<< ماعرف اذا كويس او لا
2)كانت فيه بويضة عاليسار حجم 10 ملم <<< ماعرف اذا مناسب هالحجم لليوم الثالث من الدورة
وعاليمين مافيه شي واضح .
اول علاجاتي هي كالعادة ابرة جونال اف لكن رفعوا الجرعة الى 300 يوميا لمدة 6 أيام اضربها طبعا بالبطن
ثاني علاج لوڤيريس LUVERIS 75 IU الكرتون فيه علب صغيرة ماء وعلب صغيرة بودرة والمطلوب استخدم يوميا علبتين بودرة وعلبة ماء اضربها بالرجل او اليد .
ثالث ورابع علاجاتي هي 1ملجم حمض الفوليك و حبة صغيرة ماعرفت ايش مكتوب ..
بدأت استخدم العلاجات الاربع يوم الاثنين وليس بنفس اليوم اللي صرفوه لي
رحت امس الاثنين وضربت الابر بالمستوصف الخاص وبعد 5 دقايق 😳 الم فضيع بالبطن والظهر وغثيان 😳 ايش ذا شكله من الابرة البودرة اول مرة يجربوها لي
واليوم الثلاثاء صحيت من النوم والالام ببطني ورجلي وكأنه الالام التكيس 😳 واشتغلت شوي بس شوي وحسيت مثل الكهرب اسفل ظهري يوم رجعت انسدح سلامات ايش ذا
عالعموم الله يطرح البركة في هالعلاجات واستودعنا الله انفسنا واجسامنا من هالابر ..
نجي للاخير وهو موعدي الاول بعد التنشيط بيكون الاحد 7يوليو - 4ذو القعدة القادم واشوفه جدا بعيد بالعادة يعطوني موعد قريب الاربعاء . لكن هم اعرف على قولهم 🍇



كتبت تجربتي هنا وباكتب ان شالله اذا ما انشغلت كل الخطوات اللي بيسووها معاي كمرجع لكم ولي قبلكم باستفيد منها بعد سنوات مو شرط لنفسي يمكن لغيري من قرايبي او للذكريات الجميلة والنونو بحضني 🥳 يارب ياكريم .