تجربتي الحالية مع الحقن المجهري

السلام عليكم و رحمة الله و بركاته،
اتمنى يا رب اني تجربتي تفيد اي سيدة تبحث عن اي معلومة فهاذ الموضوع و مقبلة على عملية الحقن المجهري، و يا رب يتممها لي بنجاح و يرزقني و اياكم بالذرية الصالحة.
انا متزوجة من اربع سنين و كم شهر ، عمري 33 سنة ، و بعد سنتين من المتابعة مع الدكاترة، و التنشيط، و عملية منظار للمبيض لإزالة اكياس شكلاطة ، و عملية دوالي لزوجي، و حمل طبيعي و إجهاض و فشل تلقيح صناعي ، قررنا بإذن الرحمن نعمل عملية الحقن المجهري، لأنه مع تقدم السن عند الزوجة لو استنينا اكتر نسبة النجاح بتقل، بس فالاول و فالاخر كله بيد الله مهما كانت الظروف و العمر. المهم انا لخصت اخر سنتين فكم سطر عشان التفاصيل طويلة جدا و عايزة ادخل فالموضوع علطول، بس اي وحدة حابة تستفسر عن اي شيى انا هرد بكل سرور .
من حوالي شهر، روحنا للدكتور و قولناله اننا عايزين نعمل الحقن المجهري قبل مسافر ان شاء الله، عشان احنا اصلان عايشين برا مصر، و جينا هنا عشان ظروف كورونا و استغلينا الشهور للمتابعة و العلاج عشان طبعا كلنا عارفين ان الموضوع ده برا فاوروبا مكلف اكتر بكتير ، كان منتصف الدورة اما روحت للدكتور، و ابتديت اخذ حقن Decapeptyl يوم 21 فالدورة يعني قبل الدورة الحالية باسبوع، كونت بقرا كتير سيدات اللي الحقن اليومية ديه اخرت عندهم الدورة او عملتلهم الظطرابات، انا الحمد لله، ابتديت اخدها يوم 21و يوم28 بالظبط الدورة نزلت، كونت و مازلت بخدها كل يوم الساعة 7 تحت الجلد ، سعر الحقن ديه كل علبة ب 370 جنيه لحد دلوقتي انا داخلة على تالت علبة، كل وحدة فيها سبع حقن، اول مالدورة نزلت ، تاني يوم عملت تحليل E2 عشان يبان اذا الحقن قامت بدورها، و لو كدة ابتدي بالتنشيط، و فعلان ابتديت تاني يوم الدورة كل يوم اخود حقنتين fostimon و gonapure ، يعني كل يوم 3 حقن ، و الفوليك اسيد اللي اصلان كونت ماشية عليه بقالي شهور، و اسبوسيد، المهم ، سادس يوم الدورة روحت عشان اشوف حال التبويض ، و الصبح كونت عملت تاني تحليل E2 عشان بالعدد اللي بيطلع فالتحليل بيعرفه فيه كم بويضة ناضجة ، و زودلي جرعتين تاني، و رجعت للدكتور تاني حجم البويضات كان ما بين 11 و 15 و زودلي جرعتين تاني و النهاردة بإذن الله اليوم العاشر فالدورة و عندي معاد بالليل عشان اشوف حجم البويضات، و لو الحجم كويس هاخد الحقنة التفجيرية و هيحددلي يوم السحب فخلال ال 35 ساعة اللي بعد الحقنة التفجيرية، اللي بتطلع البويضات من مكانهم . طبعا فيه تحاليل تانية كتير كملتها ،زي مخزون المبيض قبل مبتدي اي حاجة فالاول خالص، و تحليل LH و غيرهم، من حوالي تلات اسابيع ابدكتور قالنا انه العملية هتكلفنا 17 الف جنيه، 12 الف حق المركز اللي هعمل فيه العملية و اللي هو نفسه اللي بروح اعمل فيه التحاليل و اجيب منه الحقن، و شاملة تجر الدكتور، و 5 الاف العلاج ، بس احنا حاليا معديين ال 6 الااف جنيه بس فالتحاليل و العلاج و لسه موصلتش لمرحلة السحب ، يعني لو مقبلة على العملية ديه اعملي حسابك و متعمليش بكلام الدكتور، لأنه التكاليف بتزيد على حسب كل حالة.
المركز اللي هعمل فيه العملية اسمه المركز المصري لاطفال الانابيب و الدكتور اللي متابعة معاه بقالي سنتين اسمه مصطفى حسني .
أملي فربنا كبير و الحمد لله نفسيتي كويسة و راضية بأي حاجة ربنا كتبهالي ، انصحكم يا بنات بعدم التوتر و انتي بتجهزي نفسك و جسمك للعملية ديه تكوني مرتاحة نفسيا و تعيشي حياتك عادي و متوقفيش حياتك على الموضوع ده بس، يعني لو ربنا أراد و نجحت العملية هتفرحي و تشكري ربنا كتير بس لو منجحتش اعرفي انه ربنا شايلك الافضل و كملي حياتك و متخليش ايامك تعدي و انتي كل تفكيرك فالموضوع ده بس.
المهم يا بنات ان شاء الله هدخل اكتب باقي التجربة بعد السحب بإذن الله ، و يوم ترجيع الاجنة و هحاول افيدكم بكل التفاصيل .
ادعولي