تجربتي الخاصه مع الأجهزة الإلكترونيه وتأثيرها على ولدي

السلام عليكم ورحمة الله
احترت كيف اصيغ العنوان لموضوعي ومحتاره أكثر كيف اكتبه لأني مستعجله والصراحه
احس اني ماسكه وحش 😐"لأني حاليا ارسلكم من جهاز ولدي " وجهازى مخلص شحن
المهم
انا ولدى عمره ٤ سنوات ونص يحب شيء اسمه جوال فشريت انا جوال وعطيته جهازى القديم
فصار أغلب وقته عليه ولأن عندى طفلين اصغر منه فعشان ارتاح من هوشاتهم ومضارباتهم اعطيه جهازه الي صار
خلاص ملكه واخوه الي اصغر منه معه لما كان صغير كان يعجبني لأنه يشوف مقاطع تعليم لغه انجليزيه ويعرف بس بعدين صار يروح لمقاطع اطفال وحياتهم اليوميه ويحمل العاب غير مخله والكلمات الانجليزية الي تعلمها نساها حاولت اخليه نظام ابوي لكن علق وصار يطلب ايميل فماقدرت احذف شيء وانا ادري انها مضره بس هم حرب طول الوقت مع شغل البيت وطلبات ابوهم انضغط واعطيهم يفكوني شوي
لكن بعدها شفت بقناة اجيال اخذين لقاء مع مذيعه قديمه كانت عندهم بالقناة ناسيه اسمها الحين بالقناة الاولي عندها ٣ اطفال تقول ممنوع جهاز الاي باد يدخل بيتي لأن ولدها صار عصبي والأجهزة هذي تخلى الطفل يحس بأحباط وما عنده خيال وتأثر على دراستهم وان الطفل طبيعي يحس بالملل لأنه اذا حس بالملل يبدا يدور ويكتشف ويحاول يسعد نفسه وهذا شيء إيجابي
فنتبهت لأشياء كثير
انو انا نفسي لما أكثر من الجلوس على الجوال اصير مشدووووده ومتوتره واحس نفسي مشغوله وانا ما عندى شيء وقبل فتره كنت ادعي الله كثثثير انى ارجع لقراءت الكتب وفعلا صرت اقراء بس شيء بسيط جدا لكن بعد كلام المذيعه
اخذت جهازى وجهاز ولدى وخبيتهم
اول يوم يسأل عنه كثيييير وانا بعد احس ودي اجلس عالجوال شوي بس صرت احاول الاعبه واخذناهم الحديقه وصرت كذا مره بالأسبوع ينزلني زوجي بمنتزه الحي ويروح كله عشان يفرغون الطاقه الي عندهم بدال ماهم محبوسين بهالشقه ومتخدره عقولهم واجسامهم قدام هالجهاز
اليوم الي بعده شرينا لهم اللعاب تركيب وأشياء بسيطه اهم شيء يتحركون
والله ياني لاحظت حاجات على نفسي وعيالي وعلى فكره ابوهم يشتغل صباحي ومسائي ما يجي أحيانا إلا على ١ بالليل يعني ما فيه احد يساعد واهلى الله زوجي برا منطقتنا
قبل ما اقدر عليهم عصبيه وهم مثلي لكن بعد ثالث يوم من مقاطعتنا للأجهزة
صارت نفسيتي هاديه واتحمل واخذ واعطي معهم وأفكر بشكل جيد حتي بيتي صرت اقدر أهتم فيه صحيح فيه تقصير بالذات بالبيت بس
قدام الي شفته بولدي تخيلوا صار يسولف معي ومع أبوه ويسأل كثير ويناقش ويقول انه يحبنا كلنا 😢 ويسمع كلامي صحيح مو مره بس افضل من قبل ونومه تحسن قبل يصحي الصبح عطيني الجهاز حتى اكلهم صار افضل بشرط التلفزيون مغلق☺ وانا صار عندي طولت بال والله لما اشوفه مع اخوه الحين كأنهم بدوا يتعرفون على بعض و ما اقدر اشرحلكم التأثير حتى بنتي الصغيره لاعبتها امس اول مره اشوفها تضحك بهالطريقه كأني اول مره اعرفها بديت انا نفسي اشوف الأشياء بعمق أكثر هذا اقرب وصف اوصف فيه وضعي ما اقول صارت حياتي مثاليه بس صرت اعرف وين انا وركزت على عيالي وصرت رااااضيه بكل ضروفى مو مثل قبل بس متضايقه حتى وصل الأمر لتفكير بالإنتحار رغمنه الحمد الله اموري تمام صار كل شيء اشوفه أو اسمعه صار له طعم قبل بس ملل وتحس تبي أكثر ومايعجبك شيء الأجهزة هذي مرهقه للعقول ولأنفسنا وارواحنا
طبعا حاليا افكر اشترك لهم بمكتبة الملك عبدالعزيز عشان يرسل لهم كتب جربتها من زمان ممتعه للأطفال بس بشرط تكونين انتي مرتاحه وذهنك صافي وانا اذا مليت قريتلي روايه حلو عيالنا يشوفونا ماسكين كتاب
ومنعت نفسي امسك الجوال قدام عيالي إلا إذا صرنا برا البيت للمكالمات فقط اما اذا ابي اشيك على ال واتس وارسل كذا مقطع بالذات للقروبات الي مالي اقطع فيهم غير اهلي واشيك ايميل حاجات مهمه اخبار و ممكن توتر هذا اسويه بالليل أو أي وقت ثاني لأني فعلا كرهت الجهاز هذا
مثل السحر تحس عيونك عليها غشاوة مانتحملها فكيف الأجيال الي بكره احنا عشنا طفولتنا بالبداية بدون أجهزة ولاحظوا المخترعين الي بهالزمن كانوا مثلنا لهم طفوله بدون اجهزه لكن اطفال هالزمن الجيل هذا كيف بيصير بكره لما يصيرون مراهقين ولا بالثلاثينات طبعا ربي سبحانه ارحم عليهم منا احنا يدبرهم بتدبيره علام الغيوب لكن الحذر واجب جربوا تقطعونها بالتدريج أو قللوا ساعات الجلوس عليها ثم اقطعوا اسبوع إلا لضرورة
الله يحفظلنا عيالنا وكل أحبابنا
والحين استودعتكم الله وادعولي استمر لأن شكل بنتى بتصحي من نومها وتصحي اخوانها معها 😓