تجربتي الخامسة بالحقن المجهري

السلام عليكم ورحمة الله وبركاته

شخباركم حبيباتي ..احب اشارككم تجربتي الخامسه ماراح اقول فاشله لانه الحمدلله الحمدلله ع كريم عطاياه ..انا سبق وكتبت اني كبيره بالعمر وتزوجت متاخر ومخزون المبيض عندي ضعييييف جدا ومع التنشيط ينتج فقط بويضتين ..وسبق اني حقنت ونتج بعد الجمع ٥ بويضات انحقن منها ٣ في اليوم الثالث خسرت ٢ توقف انقسامات واليوم السابع تم ارسال عينه من الجنين الاخير ..وبعد يومين تم ابلاغي اني خسرته..المهم من بعدها الدكتوره قررتلي اعمل سحب وتلقيح نفس اليوم لانه الفرش في حالتي افضل وبديت من جديد (مااخفيكم هالفتره اصبت بكورونا وتعبت وااايد ويتني كحه قويه وحمى ماتنزل غير كم ساعه وترجع لدرجة انه الدكتزره بغت تلغي البرنامج بس انا اصريت 😭) كملت مع التنشيط وكان لازم مااخلي حرارتي ترتفع عشان احافظ ع بويضات سليمه مرت العشر ايام ثقيييله وايد وجا يوم الفحص وانا يوميا كنت اخذ ابر بقوة ٦٠٠ وابر مثبته وطبعا فيتاميناتي كيو تن والفوليك والسيلينيوم ..اليوم العاشر يوم الفحص بشرتني الدكتوره انه في ثلاث بويضات وراح نعمل السحب واعطتني ابرة تفجير وموعد للسحب ورحت وتاملت خيررررر وكنت جددددددا متفائله
وبعد يومين جا موعد السحب ورحت وانا سعييييده كنت متفاااائله وادعي واسبح واحوقل كثيررر ..وصلت العياده ودخلت للسحب وتم السحب وبعد الافاقه جتني الدكتوره وبشرتني انهم ٤ بويضات وتم سحبهم كلهم وبكرا يتصلون علي يخبروني عن التلقيح ماتتخيلون سعادتي
تمنيت تلفوني جنبي ابشر ريلي واتريييت ٢٠ دقيقه في غرفة الافاقه كأنها دهر ابي اوصل لفوني وابشر ريلي
المهم قلت ريلي وطار سعاده وقلنا يارب انه يجي اليوم اللي ابشره بحملي
رجعت البيت مبسوووووطه خذيت شاور ونممممت لانه يوم بالنسبه لي كان طووويل

اليوم الثاني اتصلوا فيني المختبر قالولي تم تلقيح بويضتين والبويضتين الثانيه مانضجوا فتخلصوا منهم
فرحت ومازعلت قلت الحمدلله المهم عندي جنينين
خبروني انهم بيتصلونلي في سابع يوم مش من ثالث يوم استبشرت خير
اليوم السابع اتصلوا علي قالولي الحمدلله الاجنه سليمه وتم تجميدهم بس باقي نف***م جينياً قلت يااارب لك الحمد وتفاااائلت قالولي بنرد عليج بعد يومين او ثلاثه
استنيت محد اتصل ولا حد تواصل معاي تواصلت مع دكتورتي قالتلي للاسف اتا مسافره وبرجع ع الاسبوع الجاي واتوقع ماجزين طاقم العمل لانه يوم وطني
قلت يلا لعله خيره
ويارب اجنتي بخير .... وجتني الدوره واتصلت اسوي موعد قلت بسال مره وحده عن اجنتي
قالولي ماجزين مافي غير تجين اليوم الثالث اللي هو اليوم تاريخ ٣ ديسمبر .. رحت وحولني لدكتوره غير لين ترجع دكتورتي اول ماشافت وجههي قالتلي انتي خسرتي كل اجنتج ..تدرون شو كان الوقعه علي ...ولااااااا شي والله كنت اظن اني بزعل ..انا زعلت وحزنت بس ولاااااشي من اللي تخيلته يعني ماانصدمت فاهمين علي الشعور اللي يقولونلج بعد انتظار انج خسرتي والله ماحزنت الحزن اللي تخيلته اذا سمعت هالخبر قلتلها الحمدلله ..المحزن شووو انها ناظرتني وقالت انتي مبايضج وااايد تعبانه زععععلت هني قلتلها هاىشي يعني جديد ولا من من اول ماراجعت قالت لا من اول قلتلها ..يعني مو شي جديد ليش الا وتبين تزعليني وطلعت وكلمت دكتورتي وقلتلها بالخطه العلاجيه اللي قالتلي عنها الدكتوره ..قالتلي ارجعي بكرا وروحي للدكتوره اللي كانت وياي واتوقع كلمتها هي قالتلي اعطتج علاج قلييييل ماراح يفيدج وبكرا ان شاءالله بتواصل مع دكتوره ثانيه وابدء رحله جديده

بتقولون شو فايدة اللي كتبتيه وين العبره . . انا واقولكم اني كتبته اني ماقطعت الامل بالله واللي اواجهه كثير مثلي يواجهووونه والدكتوره اللي اتابع معاها تقولي طالما جسمج ينتج بوضات يضل في امل نتمسك فيه لين نوصل وراح اوصل وابشركم

تدرون كم جنيين خسرت فوق ال ٨ اجنه انا سويت من قبل في عياده غير وخسرت مرتين يعني اجمالي العمليات تقريبا ١٠ والامل والتوفيق من الله ..وكل شي بوقته هو يدبر الامر ولا نقول الا الحمدلله ..

اي وحده تخطط للحمل سواءا بحقن مجهري او طبيعي رحلة علاجج خليها متعه تخيلي انج راح تكونين ام الحمدلله نحن نسعى لنكون امهات يعني مو علاج من مرض لاااا هدفنا جمييييل وشعور تحبه اغلب النساء فاسعي فيه بسعاده

وياااااااارب اعطي كل وحده تتمنى وترزقها قبل كل شي الرضى ...دعواتكم حبيباتي لي

اي وحده تخطط للحمل تكتم عن الموضوع ماتخبر اي حد حولها لانه لايحتمل اي كلمه خارجيه من اي حد

وتوووووكلي ع الله واستودعي صحتج ونفسيتج

بقولكم شي ع السريع قبل لا اختم
والله يابنات انه التفسيه لها دوووور كبير في فشل العمليه في دوره من الدورات اللي فيها تنشيط ١٠ ايام وسحب بويضات كانت نفسيتي كلها زفت في زفت وكنت بكاااااااايه ومتوتره وشاده ع نفسي وكنت اقول هالعمليه ماراح تنجح انا عندي احسااااس مليون لاني في حاله زفت فعلا نتج عنها فقط بويضه ويوم السحب ما تلقحت تخيلووووو الدكتوره انصدمت ليش ..
النفسيه النفسيه انتبهوا

والسموحه ع الاطاله ❤️