يا حلى بنات منتدى احب اشكركم على تعليمي طرق للعجن
انا يابنات ليا ماشاء الله 11 سنه متزوجه وهدي اول سنه اعجن فيها:icon28::icon28::icon28:
ما شاء الله عيني على نفسي بارده خايفه ياناس من العين ههههههه
وانا اخدت طريقة عجينه رائعه بس والله نسيت مين صاحبتها بس الله يسعدها ويوفقها يارب
المهم حبيت اقولكم عن تجربتي مع العجينه الرائعه صراحه مره تجتت كانها زي معجنات الدانوب طريه جدا ولذيذه
المقادير
في الخلاط الجك تحطي
1ونص كاسة ماء دافيه
4الى 5 ملاعق اكل حليب مليانه
فنجان قهوه سكر وممكن تخففي شويه اذا تبغي العجينه ماتكون حاليه
فنجان ابو ادن زيت
2 ملعقة اكل خميره فوريه
ملعقه صغره ملح
وتخلطيهم
وبعدين في زبدية العجن تحطي
من 3 الى اربعه كاسات دقيق انا تقريبا حطيت 4 الا ربع
وملعقة اكل بكن بودر
وتضيفي الخليط اللي في الجك وتعجني مظبوط مو اقل من 5 دقايق
وبعدين خبطيها شيلها وارميها كم مره الين ماتحسي انك طلعتي اللي في نفسك ههههههه انتقمي فيها
وبعدين انا اكون مشغله الفرن من قبل بفتره وطافياه بس عشان يكون دافي شويه بس مو يكون حار انتبهو
وادهن العجينه بشوية زيت واحطها في الفرن عشان تخمر 20 دقيقه
بعدين تقسميها 3 كور واشتغلي فيها
وبعد كده احشيها باللي تحبي
وانا احطلها خلطه رائعه وسريعه وولدي وزوجي مره عجبتهم
اخلط تونه مع مايونيز وجبنه كاسات وشويه خردل وكتشب وملح وفلفل سود
بس يكون الصوص اللي مع التونه اكتر شويه
وبعدين افرد العجينه واقطعها دوائر واحطها في صينية الكب كيك واحط فيها خلطة التونه واسيبها شويه وبعدين اخبزها الصراحه رائعه جدا
ترى الاولاد مره يحبوها
وكمان خلطهتانيه
حطي سبانخ مع توم وحبه ماجي على النار لغاية لمن تدبل وبعدين ارفعيها من النار وضيفي لها جبنه بيضه ومزرولا وشويه كريمة الخفق عشان يكون في صوص كويس مو مره كتير الصوص بس لازم يكون فيه صوص شويه
وبعدين تحطي في العجينه بنفس الطريقه السابقه
وبالعافيه يارب تعجبكم طريتي
وادعولي ربي يوفقني ويهديلي ولدي وبنتي يارب
t0na80 @t0na80
محررة برونزية
يلزم عليك تسجيل الدخول أولًا لكتابة تعليق.
الصفحة الأخيرة
الله يعطيك العاافيه