تجربتي الرهيبه مع الروكتان (ادخلو وادعولي)

السلام عليكم ورحمة الله وبركاته
كيفكم عساكم بخير

طبعا انا بنت ك أي بنت فيها حبوب ومتعذبه ومو قادره تعيش حياتها
طبعا ماخليت شي ما استعملته ( استعملت مليون خلطه وخلطه من النت استعملت الفكس مع العسل وانواع الصابونات ومنتجات البحر الميت , وخلطات تسويها تاجره , واستعلمت كريم الحيه , ونتروجينا واشياء مب ذاكرتنها لانها وايد والله ثم والله ان حجرتي عالكومدينا كلها منتجات عشان حب الشباب حتى منهم مادري فيهم انهم موجودين من كثرها

فـ قعدت اقرى عن تجارب البنات في الانترنت ولقيت وحده استخدمت الروكتان وقريت طبعا عن مخاطره وكل شي بس يالله توكلت على الله ورحت الدكتور واصلا الدكتور من شافني قال ضرووووري روكتان هذا مابينفع وياي وخذته



نفسيتي وحياتي قبل لا اخذ الروكتان :-
انطوائيه دايما مضايقه وادا لقيتهم خفو اكون في قمة سعادتي .. اقولكم على شي .. انا ماعندي هموم الحمدالله غير وجهي اعتبره همي الكبير .. وكنت اتضايق من اي كلمة تنقال عن ويهي ,, ما اطلع من البيت حتى لو اهلي طلعو .. اتفادى النظر الى المرآة .. احسد البنات اللي لهم وجيه صافيه ,, مب اجتماعيه ,, تدهور مستواي الدراسي ,,


حالة ويهي قبل الروكتان :
طبعا ويهي الله كريم كل يومين لازم 4 او اكثر ويوم الدوره الله كرييييييييييييم شكثر حبوب تطلع كلهم هالكبار وفي مرات حبوبي تكون داخلها ابيض واخضر وععع كانه مخاط وحتى كنت بيضا مادري ليش اسمريت من الحبوب اللي بوجهي



(عند استعمالي الروكتان )
طبعا ببداية الشهر او الشهرين مالاحظت تغير الا بسيييط حتى ماينبان ولاحظت ان ويهي يصفر ويشحب مرات يعني لا تحاتين بيرد مثل اول ,, ولاحظت ان الحبوب زادت .. وترى لازم تاكلين فواكه وااااااااايد عشان ويهج مايشحب ,, وتققلين دهون عشان يستفيد جسمج اكثر من العلاج .. انا لاحظت لما اقلل دهون ويهي يتقشر وهذا المطلوب ( عشان تخف لاثار بعد .. الاثار خفففففففففففففففت وايد وهذا توني انا بالشهر الثالث وماخلصت الثالث باقيلي اسبوع .. باقي كم اثر بس بيروح مع انتهاء علاجي .. بس لاحظت انه عيوني جافه وجفني ينتفخ .. ومرات صداع .. وجفاف الشفايف هذا احلى شي واستغربت من البنات اللي يقولون يعانون منه .. تدرون ان الشفاة تحلو تستوي ورررررررررررررررررررديه او حمرا كانك اجنبيه او روسيه وايد بنات اعجبو بلون شفاتي .. وطبعا ويهي بين مع انه كان شاحب بس الحين رد ابيض من قبل احس انه ويهي مصقووووووووول صقل مافي شي .. الرؤوس السودا مافي ولا رأس وايد اسود خشمي نظيف ميه ميه .. الرؤوس السودا لما احك خشمي كانت تطلع .. ( شعيرات صغييره مره ) .. وتساقط الشعر بعد صارلي بس الحمدالله صار شعري احلى من اول


نفسيتي مع الروكتان : تمام وكل مره ابي اطلع حت ماما استغربت قالت لي شو فيكي كله تبين تطلعين عكس قبل
احلويييييييييييييييت مره .. كل البنات قاموا يمدحوني وفي بنات الغيره طالعه من عيونهم - وعلى فكرة هالمعلومه انا لاحظتها مادري اذا كانت صج ولالا .. رمووووشي كثثثثثثفت وطولت مادري ليه ؟ يعني الروكتان مب بس يحلي بشرتك يحلي عينك وخشمك وشعرك وكل شي تطلعين ملكة جمال ..


ملاحظه : انا توني ماخلصت العلاج باقي لي 3 شهور ولاحظت هذا كله كيف لا خلصت العلاج .. ولا تستعجلون بالنتيجه ابد مابتلاحظونها الا بعد مرور شهرين او 3 بالكثير ..



وانصح كل وحده تعاني مثلي تاخذها باسرع وقت اتعبي 6 شهور ولا تتعب نفسيتك طول العمر


ومع السلامه .. ودعواتكم لي بالتوفيق