تجربتي السهله جدا للتخلص من التكيس

السﻻم عليكم

خواتي الغاليات حبيت افيدكم للي معاها تكيسات على المبايض

انا متنت فجاه وصار معاي تكيسات وتميت فترة اعاني
منشطات ومدري شو وحبوب و و و وكله ما انتظم عليه
لدرجة مرة من المرات رحت اشيك ع المبايض كان تقول لي الدكتورة
ي بنت شو ها؟؟؟؟ مبايضج تخوف من شدة الدهن والتكيسات بلاش منشطات ﻻ تحملين ابد لين تتشافين
انتي مو صالحه للحمل الحين

طبعا انا كنت مستهينه بالتكيس بس لما شفت وجه الدكتورة وهي تصارخ علي صحيت من نومي
وقلت اول شي اشيل شي اسمة تكيس من جسمي بأذن الله
قلت اول شي اسويه انحف ..ﻻن الخطوة الاولى لتكيس وزيادة الخصوبة هو الوزن
نحفت ونحف
وكان نظامي
اتريق عدل ... اتغدا نص اللي كنت اكله .. مااتعشى
الا شي بسيط مثل تفاحه وماي جيه بس


المهم .. نحفت 5 كيلو وتميت بعد اخذ حبوب كلوفاج xr اتوقع اسمها اللي ماتسبب لوعه وترجيع ونحفت مع الكلوفاج 4 كيلو غيرهن يعني نحفت 9 كيلو
...بعدين ورحت اسوي حجامة خاصة بالتكيس بمواضع معينة .. ورحت بعد اسبوع اشيك قالت خف
واستمريت بالاكل الخفيف ورحت بعد 3 اسابيع قالت لي المبيض رجع حجمة الطبيعي والرحم سليم والحمدلله


هاذي تجربتي وحبيت افيد اللي فيها تكيس او اي حد تعرفونة يعاني منه

الخﻻصه :
العلاج الاول والاخير للتكيس يبدى من ايدج
وطبعا كلكم تعرفون التكيس يصعب معاه الحمل
ﻻن حتى لو سويتي طفل انابيب تكون نوعية البويضة اساسا مش كويسه
بتالي صعب يكمل نمو الجنين ﻻن البويضه اساسا مش تمام حتى بالتنشيط .. غير كذا البطن ﻻزم ينحف ﻻن
الدهن اللي ف البطن يكون نفس الحاجز بين الرحم و هرمونات اللي تكون من المخ ب التالي المبايض والرحم مايستجيبون لهرمونات المخ


طبعا هذا الكﻻم اللي كنت اسمعه من 10 دكتورات مريت عليهم طوال مسيرتي العلاجيه
واللي ايقنت بعدها ان العﻻج بعد الله بأيدج مو الدكتورة

دعواتكم لي بالذرية الطيبة حبيباتي