تجربتي السيئة مع المقشر الكيميائي للركب والكوع

السلام عليكم ورحمة الله وبركاته 💞
كثير مننا يعاني من التصبغات الصعبه فاماكن معينه مثل الركبه والكيعان و جوزة القدم و بالاصبع الكبير فيها ودائما الحل للتصبغات تقشير + ترطيب و ممكن كحل مساعد كريم تبيض آمن.
انا من الناس اللي عندي تصبغات و جربت كريمات كثير للتفتيح وماكنت اشوف نتيجة لاني ما اقشر احط كريمي سواءً كان مرطب او مبيض على تراكمات جلديه ماراح تستجيب لاي شي بس عندها استعداد تسود زيادة 😇😂
دايما كنت ابحث عن حل وبيوم شفت بالانستقرام حساب يبيع مقشرات وكريمات تبيض و اشياء من ( تايلند،اليابان ، كوريا) تحل مشاكل البشره ومن ضمن الاشياء اللي تبيعها مقشر كيميائي وظيفته يشيل طبقة رقيقه جداً من الجلد الميت المتراكم و كل شهر مره يتطبق لين نتخلص من الجلد الميت تماماانا بصراحه اغرتني مقاطع التقشير و النتايج و مدح زباينها وظليت فتره اتمنى يجي اليوم اللي يوصلني فيه هالمقشر العجيب و اغراني اكثر كلامها عن نفسها بانها حريصه على زباينها وتتابعهم و بانها تحل مشاكلهم لو صار شي لاسمح الله
مرت الايام وطلبت منها اخيرا وطلبت مع المقشر الكيميائي صابونة و لوشن تبيض و كريم مقشر لتفتيح الابط والوجه والمنطقه الحساسه الصابونه ماعليها شي استخدمتها وجيده اللوشن ماستمريت عليه الكريم المقشر ماستخدمتو ابداً نجي لزبدة البوست المقشر الكيميائي طريقتو كانت متعبه شويه احط المقشر ٣ مرات باليوم وبين كل مره ومره نص ساعه واكرر العمليه يومين كمان وبعدها اوقف لين يتقشر يعني ٣ ايام احط المقشر اول مره لما جربت الطريقه و بدا الجلد الميت يطلع وسحبتو انجرحت ( واعتقد سحب الجلد غلط مع ان اللي باعتلنا كانت دايما تحط مقاطع يسحبو فيها الجلد الميت مو يخلوه يطيح لحالو ) السحب سببلي جروح باماكن صغيره بس مؤلمه نوعا ما والسبب اني ماحطيت فوسودين للحساسيه حطيت واحد للعين الله يفتح مخي و عيني و طبعا ماحطيت واقي شمس و كنت اداوم و ركبتي صارت ف ح م !!
وبكذا يكون غلطي بالمره الاولى اني ماحطيت فوسودين مناسب ولا واقي شمس واتحمل النتجيه هذي تماماالمره الثانيه بعد شهر سويت كل شي بالظبطط فوسودين و واقي شمس والنتيجه بالبدايه تونس و بعد كم يوم فحم 😂
المره الثالثه بالشهر الثالث كنت حريصه لدرجة اني كنت احط واقي شمس كل ساعتين و كنت ارطب بمرطب طبيعي و كل شي بالحرف طبقتو و النتيجه برضو فحم مشكلتي ماكانت بس بالسواد اللي زاد بالركبه بل بالدائره الغامقه اللي حولين الركبه اللي اصلا فحمه مايبغالها زودو الشكل كان عباره عن دائره اغمق من جسمي داخلها ركبه سودا ( الدائره مكان ماكنت احط المحلول و تقشر)
الدائرة كانت فعلا بمعنى كلمة دائرة يعني واضح اني سويت شي فاشل بهدلني و صرت البس طويل عشان اغطي كوعي و ركبتي ماكانت مشكله لان البنطلون يستر عليها قفلت معايا ورحت لدكتور جلديه صرفلي مرهمين اخلطهم مع بعض و النتيجه كانت مرضيه تقريباً يعني كانت لسا الدوائر حقتي واضحه بس بشكل اخف من اول وبعدها صرت اقشر جسمي بمقشر ( مشمش - ملح حليب - نشا - بيكربونات الصوديوم ) مرتين بالاسبوع و باقي الايام بمقشر كاب معاه ملح حليب وزيوت ( الان اكتفيت بكاب لحالو لاني استخدمو على جسم ناشف ) والنتيجه جداً مرضيه الحمدلله الدوائر شبه اختفو و رجعت ركبتي و كوعي بحالتهم الطبيعيه اللي ماكانت عاجباني 😂
لكن اهم شي بعد التقشير ترطيب سواء بزيت او كريم
العبره : لا يغريكم اي شي نتيجتو سريعه و لا تسوو الاشياء هذي بالبيت روحو عيادة متخصصه او لا تسووه ابدا. المقشر الكيميائي قريب كنت اشوف تعليقات ناس سوه يمكن ٣ بالكثير اللي قالو نتيجتو استمرت وحلوه و الباقين كلهم قالو ان النتيجه بالبدايه حلوه وبعدها الركبه تصير اسوء من اول لايغريكم التسويق خليكم على شي مضمون مامنو ضرر لو مافادكم لان الاشياء هذي ممكن تسبب ضرر يبقى اثرو طول الحياه اللي اشتريت منها ولا مره سالتني ايش صار فيكِ يعني ماستفدت منها بمشكلتي ولا اظن بتفيدني اصلا😂💔!!
ان شاء الله تستفيدو و ماتطيحو بنفس مشكلتي 💞