السلام عليكم

الله يسعدكم يابنات والله انشرح صدري لما قريت ردودكم

المهم خلوني اكمل لكم قبل ما امي تجي

القصه وما فيها اني كنت مع زوجي في بعثته وكنت ادرس في كولج للغه فترة الصباح وارجع البيت في حدود 2 وزوجي يجي مابين 4 و6 كل هذا تمام قبل ما ابدا احس بالملل وان زوجي مهملني خاصة بعد ما كنت في السعوديه اهتمامه الاول والاخير

مرت اول سنه وانا بين تملل وطفش ومشاكل اسويها بنفسي ما ادري ليه بس السنه مرت وكانت الطامه لما جات الاجازه واكتشفت ان ماعنده اجازه وما نقدر نسافر في الصيف لحد ما يخلص التجارب الي يقول انه بداها مع المشرف حقه وما راح يسمح له المشرف يسافر قبل ما ينتهون منها

جلست ازن واختلق مشاكل لحد ما اقنعته اني اسافر وحدي بعد ما كان رافض كليا ....سافرت وليتني ما سافرت الكل انتقدني وكاني سويت جريمه من امي لابوي لاخواتي الي اصغر مني وكاني تركته وهو بين الحياه والموت لا كل ذا كوم واهل زوجي كوم حقدوا علي حقد الله لا يوريكم المهم مرت الاجازه بين نصايح ونكد وبلاوي ما صدقت متي يجي موعد رجعتي ورجعت واستقبلني زوجي وكان اكثر من عادي

بديت احسه حاقد علي او في نفسه شي علي بس ما يقول لي شي ,كانه جالس يراقبني ويراقي تصرفاتي ,يالله لما اتذكر الحين والله كان واضح انه زي الي معطيني فرصه اخيره ويراقب هل اثبت جدارتي فيها ولا لا

ما اقلكم انا لما رجعت كنت مره متحمسه لكل شي في البيت وقايمه بواجباتي علي اكمل وجه وخاصه لما اتذكر حالتي في الصيف

بس يا خساره سرعان ما بدين افقد حماسي واتدهور من جديد واتملل واطفش وبدت رحلة المعاناه من جديد طفش طفش واحساس اني مهمله و....و.....الخ عاد تعرفون زين هالمشاعر

بديت اختلق مشاكل عشان احرك الجو وزوجي لا زال في وضع المراقب وكثير ما يلزم الصمت علي غير عادته اذا كان جو البيت مليان مشاكل وملل وطفش

ولكن تطورت الحاله خاصة اني كنت متعوده لما اسوي مشاكل يتفاعل معي ويسير في البيت شوية اكشن بس الحين لا ما عاد يتفاعل معي ويتركني في مشاكلي لحد ما اراضي نفسي لوحدي .وبديت اتجاوز حدودي معه وكاني فهمت تغيره وكانه يقولي ما عاد تاثر فيني طرقك القديمه جربي غيره وياليتني ما تماديت اكثر لاني كنت مخطئه

استمريت علي هالحال لحد ما قربت السنه الثانيه تنتهي وهو ساكت ما سوى اي شي ولكن في اخر مره تفاجات به يقولي جهزي شنطك بنسافر السعوديه الشهر الجاي فرحت انا وقلت ايوه ما تجي الا بالعين الحمرا "في نفسي اكيد"

جاء موعد السفر ووصلنا مطار هثروا وقبل ما ندخل صاله الاقلاع واول ما فتحوا البوابات قام وواجهني وقلني اسمعي يا بنت الناس انا اعطيتك فرصه سنه كامله تحسنين فيها سلوكك لكن الظاهر انك ما تقدرين تعيشين معي الا في الرخاء وانا ما ابغي وحده بكره لا جار الزمن علي جت مع الزمن ضدي لذلك انتي طالق وتراني كلمت اهلك يستقبلونك في الرياض وبلغتهم بقراري

انا سمعت الكلام هذا وانخرست وما عادقدرت اتكلم , انصدمت صدمه عصبيه فضيعه ما عرفت بعدها اسوي اي شي غير ا اني دخلت صاله الاقلاع وطلعت الطياره وانا زي الهبلا بلا حول ولا قوه

انا الحين افكر واقول ليه طلعت ليه ما رفضت اني اسافر بدونه ليه ما صرخت ليه ما سويت اي شي
وللاسف ماني لاقيه اي اجابه

وجلست طول فترة الرحله ابكي وكاني صحيت من نوم عميق علي حقيقه بشعه ,طول الرحله وانا افكر كيف بيستقبلوني اهل وكيف وكيف وكيف ............اخ يا مراره الذكرى احسها تخنقني وابي ابكي


وصلت واستقبلني ابوي والله يابنات ما قالي حتى الحمدللله علي السلامه ولا طالع في وجهي اصلا ولا قال كلمه وحده ليما وصلنا البيت وانا اتقطع بجنبه كل ثانيه الف قطعه كان ودي انه يكفخني قدام الله وخلقه بالمطار بس ما يسوي لي كذا

ونفس الشي لقيت في البيت قدام امي ما سلمت علي بعد ما غبت عنها سنه كامله علي ولا احد كلمي لاكثر من ثلاث ايام لحد ما انفجرت انا ومسكت امي وقلت لها يمه انا ماسويت شي انا ............وردت علي وليتها جلست ساكته كلامها لحد الحين كل ما تذكرته بكيت

الحين مر علي شهر وانا علي هالحال ندمت علي كل شي وما عاد ينفع الندم

معقوله ياناس زوجي يرميني بالسهوله هذي معقوله اهون عليه معقوله كل ذا يسير

انا املي الوحيد الحين انه ما طلق غير طلقه وحده وان شاء الله انه يجي ويرجعني يارب ادعو لي يابنات والله المجتمع قاسي ولا يرحم ما كنت اضن ان المطلقه تعاني كل هذا لين جربت

اسالتي:

هل زوجي ضلمني ؟ هل تخليه عني منطقي ؟ هل اسبابه الي قالها لي مقنعه ؟
كيف اتعامل من من هم حولي في وضعي الراهن
شرعيا هل يمكن ان اعود لزوجي اذا الله حنن قلبه علي ؟
وما ذا تنصحوني اذا الله وفقني ورجعت لزوجي في غربته ؟
شاكره لكم تعاطفكم الي مالقيته بين اهلي ويارب ما وحده منكم تعاني الي عانيته ولا تشوف الي شفته يارب

سبحان الله عسى ان تكرهوا شيئا ويجعل الله فيه خيرا كثيرا
عزيزتي زوجك ظلمك في نقطه انا اراها وهي انه فاجأك في المطار بقراره لأن فيها صدمه ممكن تسبب لك مرض لا قدر الله ثم تركك تسافرين لوحدك بهذا الوضع ولكن سؤال هل حذرك قبل كذا وقالك عن حركاتك معه
عزيزتي سببه الي طلقك عشانه موكفايه
اما من ناحية تعاملك مع الناس فرضا الناس غايه لاتدرك الله يعينك بس طنشي وكوني واثقه من نفسك
وممكن ان زوجك مسوي هالحركه فيك تأديبا لك الله يكتب لك مافيه خير وصلاح يارب
ولكن لا تنسين نفسك يمكن الحركات الي كنتي تسوينها فيه غير مطاقه وبعض الرجال ما يتحمل وما له خلق فتذكري ان تراقبي نفسك عزيزتي وتعدلي منها اما والديك فان شالله سيصفحوا عنك لأنهم والديك وختاما انصحك بالدعاءفي جوف الليل فله مفعول السحر سبحان الله يغير من حال الى حال وادعي وانتي متيقنه بإجابة الدعاء فالدعاء يغير القدر وهذه نصيحه من مجرب
اتمنى اني اكون افدتك ولو بالقليل وكل له وجة نظر والله يردك لزوجك على خير بدون ذل يارب .

من وجهة نظري ان بينكم خلل ما ؟ بس شوفي انت ادرى! وين الخلل في علاقتكم ؟
ثانيآ:-
كانت تصرفاتك واسمحيلي اقولك تطفش وفيه بعض الرجال مايظهرون الي في بواطنهم فالمفروض انتي من البدايه درستي شخصية زوجك من ناحية الأجابيات والسلبيات
! وهذه نصيحه لكل اخت...........
لابد تعرفين زوجك وشو يحب وشنو يكره (فالمفروض انك تراعين زوجك وتقدرين غربته المهم ابغاك تعرفين ان الغلط منك بنسبة70%
وزوجك ايضآ غلطان لأن موعلى طول ويفاجأك بهذه الطريقه
اللي ابغى منك أ نك تكلمينه قبل لاتخلص العده وتتفاهمين انتي وياه وتوضحين له انك مازلتي شاريته وان تقصيرك كان عن جهل وقلة خبره وسأليه هل مازال يكن لك حب ؟؟
واذا رجعتي خليكي انسانه كلها حيويه ومتفائله في الحياة والزوج ياخذ زوجته معاه ليه ؟حتى تأنس غربته وتهون عليه واذا رجع من الدوام يلقى الحبيبه في استقباله في وجه باسم... ولابد من الملل والزهق بس لابد من الصبر والمفروض انك تستفيدي من الغربه حتى تقربك اكثر لزوجك وتكونون شيء واحد ، مافيه دخلاء على حياتكم انتي له وهو لكي حاولي ارسال رسائل لزوجك واسعي انتي مافيها شيء؟؟؟؟؟؟؟؟؟؟؟؟؟
والله يوفقك يارب ويرجعك لزوجك ويقر عينه فيك وتقرين عينيك فيه ولا يدخل بينكم اي حاسد وعذول
والله الله الله بالدعاء(سهام الليل لاتخطيء...........ولكن لها أمدآ وللأمد انقضاء)

لاحول ولاقوة الابالله العلي العظيم
الحقيقة انني اندهشت بقوة عندما قرأت مشكلتك ، كل اللي اقول كوني قوية ايمان والجي الى الله جل وعلا وادعي الله ان كان لك خير في هذا الزوج ان يعيدة لك ويوفقكم ويصلح شانكم .

الله يكون في عونك ويؤجرك في مصيبتك ويعوض خير اللهم امين

لاحول ولاقوة الاباالله اكثري من الدعاء يااختي وحاولي باقرب واسرع وقت تكلمينه وتبين له الندم والاسف الشديد وتوعدينه بانك تغييرين طبعك وانه ماكان قصدك انك متعوده على عيشه الرخاء زي ماقال او حاولي تخلين ابوك في البدايه يكلمه ويقنعه اذا انتي ماتقدرين وهو يااختي معه حق باللي سواه يمكن الطريقه غلط شوي بس ضغوط الحياه بالغربه تخليه يسوي كذا والله يجمع مابينكم من جديد ويوفقكم ويهديك يااختي ويصلحك وبالنسبه لتعاملك مع الناس خللك طبيعيه جدا ومو اي احد تعلمينه بمشكلتك والله يوفقك .