غبت عنكم 3 أسابيع
وقبل ما اغيب كتبت موضوع ان راح اسوي عملية أطفال انابيب
او بمعني اصح (( ICSI)) اي التلقيح المجهري
وقلت لكم انها راح تكون اخر عملية لي
المهم هذا هو الرابط
http://forum.hawaaworld.com/showthread.php?t=1228594
واتوقع اني تسرعت اني طلبت من زوجي هالطلب لان مو من حقي لوحدي اني امنعة انه يكرر العملية :(
جزاكم ربي خير وربي يرزق كل وحده دعت لي ويجمعني بها جناته يااارب
والسموحه لاني توني ارد لاني ماجيت من استراليا الا يوم 18/ 6/ 2008
وراح اكتب لكم تجربتي بالتفصيل الممل ،، الممل الممل وبتعرفون لويش بكتبها بالتفصيل الممل
يعني اللي فاضية وحابة توسع صدرها او تزيد من همها وغمها ربي يبعد الغم والهم عندكم تقرا موضوعي للاخر ،،
واللي مو فاضية
تاخذ اللي يفيدها واللي مايفيدها تشق الورقة
وراح احاول يوميا انزل بعض الاجزاء وممكن تكون مهمة وممكن تكون مال امها داعي
بس بتعرفوون اذا كانت الوحده ماعندها لاشغلة ولاعملة في شقة وماعندها الا زوجها وبس .والنفسية ربي لك الحمد .
طبعا بعض الاحداث كتبتها يوميا في دفتر مذكراتي
وبعضها اتكيسل واخليها لوقت ثاني
واذا اشتهيت كتبت
وبعضها توني اكتبها وهي الاحداث الاخيرة
اللحين وانا اكتب لكم اليوم 12 من ترجيع الاجنه . (( 22/6/2008))
في تاريخ 2/5/2008
قبل الدورة بشهر
خبرتنا مساعدة الدكتور ان لازم ابتدي في اكل حبوب نسيت اسمة من اليوم الثاني للدورة ....... وهذي صورتة
بس انا لونة اخضر وابيض .
هذا الدواء لمنع الحمل . واتركة قبل ما اروح لهم بيومين او ثلاثة لان بعد ما اتركة بتجي الدورة على طول
انا تركته يوم الربعاء ، وجاتني الدورة يوم السبت ، يوم سفرنا لأستراليا لعمل العملية
وصلنا يوم السبت بالليل وكنا مرتبين مع مساعدة الدكتور لنا غرفة في فندق قريبة حيل من العيادة
علشان ما اتعب وارتاح من الروحه والجية ،، وعلشان مانصرف على التكاسي والباصات ،
لان يوميا تقريبا لازم نروح ونجي للعيادة وانتوا تعرفون اشلون الاسعار برة.
المهم
بعد وصولنا بالليل ، صلى زوجي ونزلنا لبقالة قريبة من الفندق وشرينا بعض الاجتياجات الضرورية
يوم الأحد كان جلوسنا الساعة 9 ، بعد الفطور طلعنا ندور ونستكشف مكان العيادة .
وطبعا يوم السبت والاحد عطلة عندهم يعني مايفتحوون اغلبية االأماكن . رحنا ندور ونبحث ونستكشف المكان وكانت العيادةفعلا قريبه جدا جدا من الفندق ، تقريبا 3دقايق مشي بس .
المهم
عرفنا مكان العيادة وهذا اهم شي كنا نبغى نتاكد منة . رجعنا الفندق حوالي الظهر علشان زوجي يصلي
صلى وبعدها طلعنا نكمل ندور ونبحث ونستكشف عن شقة قريبة ورخيصة لان الفندق كان غالي نوعا ما
وكان فية مايكروويف وملاعق واكواب وصحون بس ،، يعني اكل خفيف مافية طبخ
واحنا راح نظل 3 أسابيع يعني يا اكلك أغلبيته من برة وراح يفضى جيبك ، او انك تتكييفين مع المايكروييف ، يعني تشتريين معلبات واشياء خفيفه تنطبخ بالماكيروويف
وانا المايكروييف ما اتعامل معة الا في تسخين الخبز
مو لاني صحية ،، ويني وين الصحه ربي لك الحمد
لاني اخاف اتعامل معة واخاف من الطبخ فية ولا عمري طبخت فية
المهم
طاحت رجولنا للبحث عن شقة ، ورحنا للشقة القريبة اللي عطتني رابطها احد الاخوات هنا بالمنتدى ربي يجزاها خير ويرزقها الجنة ويوفقها وين ماراحت واوقول لها مشكورة كثير كثير كثير
بعدين اقول لكم يمكن شفتها وانا ما ادري
المهم قالوا لنا ان الشقق اجار 3 شهور اقل شي
وفية شقة قريبة نوعا ما قالوا لنا 6 شهور
واحنا نبغى 3 أسابيع فقط
المهم قررنا نتوكل على الله ونظل بالفندق .
هو لة حسنات كثيرة انه قريب من المستشفى العام (( مو مستشفى اللي بنسوي فية عالملية لا غيرة ))
ومن العيادة اللي بنروح لها كل يوم وحوالية مطاعم وبرضوا بنفس الفندق فية مطبخ ومطعم اذا تبغين تاكلين فية (( يعني هم يطبخون لك مو انتي ))
وفية محال تجارية صغيرة قريبة منه
بس مشكلته انه بـ 110 دولار استرالي في الليلة = 396 ريال سعودي في الليلة
يوم الاثنين كان موعدنا اول موعد لمقابلة الدكتور .(( لاتنسوون السبت جاتني الدورة والاثنين كان موعدنا يعني ثالث يوم الدورة ))
دخلنا ورحنا للاستقبال وقلنا لهم اسمائنا وقالوا جلسوا بالاستراحه على مانناديكم
جلسنا وبعدين جا دكتور ونادانا وقال اهلا فلان (( يقصد زوجي )) اخيرا اللتقينا (( لان كان فية بينهم اتصال بالتلفون والايميلات فقط ))
االمهم بعد السلام والسؤال عن احوالنا وعن رحلتنا
سأله زوجي: انت البروفسور بيتر اللينغوورث؟
قال له : اية
ارتسمت علامة استفهام على راس زوجي ، ليش ما ادري للان ماسالته
المهم انا في الانجليزي في الكلام صفر على الشمال
لكن الفهم افهم كثير لكن بعض الكلمات خصوصا العلمية او في مجال الطب ما افهم ،، لكن مو جاية اتكلم
المهم
>>>>> ياكثر المهم عندك وكلة الى الان ماجبتي فايدة وحده
المهم
طلع لنا دفتر وهذا صورته صورته لكم
وجلس يشرح لنا مراحل العلاج وكل شاردة وواردة راح نمر بها ،، وهل نوافق على هذا او هذا
وش راينا في هذا وهذاك و و و و و و .
على فكرة البرفسور مامعه في الغرفة ممرضة ، لاعطاء الخصوصية الكاملة بين الدكتور والمريض حتى في ابسط الاشياء
الممرضات لهم غرف لحالهم يعني اذا بتاخذين ضغط او بتضربين ابرة تروحين غرفة ثانية للخصوصية
المهم
بعد الجنجال الواجد من البروفسور وزوجي سالنا : أي استفسار او سؤال قبل مانبتدي في اول ابرة ؟
قالة زوجي : اول حاجه احنا مو مهم عندنا أي شي كثر الامانه ،، وتناقشوا بالموضوع ،،
قالة زوجي :نبغى نكون اثنينا في غرفة العمليات (( يعني يدخل معي لان انا اللي طلبت )) .
رد البروفسور : اللي تبغى بس في مرحلة سحب البويضات هي راح تكون مخدرة يعني نايمة ماتحس بشي
وجود المرافق مهم لدعمة معنويا لكن وهي نايمة ماراح تحس بوجودك ،، راح تككون معها الى مرحلة ماقبل التخدير وبس لاجل انها برضوا ماتعرف تتكلم انجليزي الا قليل وفية اسئلة راح تنسال اياها .
اما في مرحلة الترجيع بامكانك طبعا الحضور
(( وكتبوا في ملفي من فوق اني ما اتكلم انجليزي الا قليل :eek:))
قالة زوجي : شي ثاني مهم ، قبل العملية واثنائها وبعدها
ام راحيل تكون مغطاة تماما إلا الاماكن اللي تكون ضرورية للكشف عنها او تعيق اجراء العملية ، (( مسكين زوجي تعقد من مستشفياتنا واللي يصير فيها ،، يشيلون الغطا عنك حتى قبل مايخدرونك ، والطاقم كلة موجود اللي لهم داعي واللي مالهم داعي ربي سترك ))
المهم
قالة زوجي شي اخر : غرفة العمليات مايكون فيها الا الاطباء الضروريين لاجراء العملية ،، يعني متدربين او غيرهم لا . (( لان ببلاد الغربة ممكن يدخلون المتدربين لاجل الفائدة وممكن يطبقوون عليك ،،
حصلت معي في عملية المنظار كان الطاقم كلة حريم وسالوني هل اسمح بدخول متدربة لغرفة العمليات والمشاركة في العملية ،، قلت لهم تدخل اية لكن تشارك معكم لا ))
المهم
رد البروفسور : اكيد وانا عالجت كثير من ديانتكم ، وقدرنا نتعامل مع متطلباتهم ونحترم اديان وعادات وتقاليد الغير (( وهذا احسن شي فيهم ))
واذا برضو تبغى دكتورة حرمة بامكانها هي تسويها لكم وانا انسحب
وتفاهم وصار جلجال واااجد في هالامر وفي الاخير قررنا هو اللي يسويها
من ضمن الاشياء اللي قالها
ان القانون الاسترالي يمنع ترجيع اكثر من جنينين ،، وبالضبط جنين وااحد ،، لكن اذا كان الزوجين مسوين عمليات من قبل وفشلت
فيرجعون لهم اثنين فقط وغير مسموح باكثر . خوفا على الام والاجنة ،، خوفا على الام من حمل التؤام والمخاطر اللي تصاحبها ،، وخوفا على الاجنه من التشوهات او الموت .
طبعا من قبل هم قايلين لنا المبلغ وهو 13500 دولار استرالي = 45000 ريال سعودي تقريبا شامل الادوية ،،
طبعا احنا خسرنا على كل هالرحلة من بداية اجراءات فيزة استراليا مرورا بالتذاكر وحجوزات الفندق والمصاريف تقريبا حوالي 60 الف ريال سعودي ،ربي يعوضنا
طبعا احنا خلال فترة العلاج كنا نروح اماكن سياحية نبغى نطلع من جو التوتر والاضطراب يعني 60 الف هذي فيها ترفهه
.اخر شي ختم كلامة : الان روحوا لغرفة الممرضة هلين علشان تاخذين اول ابرة
وهي راح تكون الان كل شي انا الان مالي ضروري الى وقت السحب ،،
والممرضة هلين بديلة الممرضة نادية المسؤولة عن المرضى اللي جايين من الخارج (( الاوفر سيز )) >>> يمديك على الانجليزي كملي بس
رحنا الاستراحه وبعد فترة جات الممرضة هلين ونادتنا ورحبت بنا وماشاء الله عليهم لاحظتهم كلهم الابتسامة ماتفارقهم، وبعد الترحيب عطتنا هذي الورقة تبين المراحل اللي راح نمر بها ،،
....وهذ الثانية شرحت لكم وشو معاني هالعفسة
السموحه على هالخربطة بس احاول افهمكم
(( اللي تعرف تكبر الصو رة تكبرها ما ادري شلون طلعت صغيرة كذا ))
هذي الورقة هي عبارة عن المراحل اللي راح نمر بها مرحلة مرحلة
شوفوا اول الايام هو الابر العادية وعبارة عن قلم وهذي صورتها
وهذي وهي مفتوحه
......،، وبعدين راح ياخذون تحاليل .....
وشرحت لنا على الورقة كل شي
وقالت الان راح نعطيك اول ابرة وكل يوم خلي زوجك يضربها لك او انتي ضربيها . فتحنا عيونا قلنا مانعرف ،
قالت اوكي نعلمكم هي بسيطة ،، كل يوم تعالوا الى ان تتعلمون لان في العطلة الاسبوعية احنا ماراح نكون موجودين ،،
وبعدين ابرة التفجير راح تكون بالليل ،، يعني لازم تتعلمون .
وهذي صورة الممرضةنادية وهي تعلم احدى المريضات جبت الصورة من موقعهم
عطتنا اول ابرة ضربتها بالبطن ، وقالت تاكلين فوليك اسيد
واذا احتجتي بنادول او بندالين ما ادري بنادين ،، هو اخو البنادول ......
فقط لاغير
وعطتنا شنطة تحتوي هالابر والمسحة الطبية ومعهم هالعلبة
علشان نحط فيها الابر اذا خلصنا منهم (( ممنوع ترمينهم بالزبالة العادية ))
وصار كل يوم الساعه تسع ونص نطلع من الفندق نتجه للعيادة نضرب الابرة ويتعلم زوجي اشلون يضربها ونرجع .
طبعا في البطن كلهم اخذتهم .
اربع ايام رايحين وجايين يوميا على العيادة وضبط زوجي ضرب الابرة (( كان يضربها لي بوجود الممرضة ))
برجع عن اذنكم والسموحه
اللهم اسألك بإسمك العظيم ان ترزق اختي ام راحيل بالذرية الصالحة عاجلا غير آجل
اللهم اسألك بإسمك العظيم ان ترزق اختي ام راحيل بالذرية الصالحة عاجلا غير آجل
اللهم اسألك بإسمك العظيم ان ترزق اختي ام راحيل بالذرية الصالحة عاجلا غير آجل
اللهم اسألك بإسمك العظيم ان ترزق اختي ام راحيل بالذرية الصالحة عاجلا غير آجل
اللهم اسألك بإسمك العظيم ان ترزق اختي ام راحيل بالذرية الصالحة عاجلا غير آجل
اللهم اسألك بإسمك العظيم ان ترزق اختي ام راحيل بالذرية الصالحة عاجلا غير آجل
اللهم اسألك بإسمك العظيم ان ترزق اختي ام راحيل بالذرية الصالحة عاجلا غير آجل