تجربتي في الحقن المجهري لمحاولة إنجاب (مولود ذكر)

السلام عليكم ورحمة الله وبركاته
كيف حالكم حبيباتي الحوائيات
في الحقيقة من زمان كان ودي أتكلم عن تجربتي في الحقن المجهري لمحاولة إنجاب (مولود ذكر)
بس اللي أخرني هو محاولتي التسجيل بمعرف جديد...
طبعا أنا متعمدة أكتب موضوعي في هذا القسم لأني أحمل طبيعي ولله الحمد..
موضوعي كتبته وتعبت عليه راجيه من الله العلي القدير الأجر والثواب...
لي أهداف كثيرة ..
من أهدافي أفيد غيري كثير ممن هو متعطش لأي معلومة تخص الموضوع
لأني كنت في يوم من الأيام أبحث عن خلاصة تجارب ولكن لم أجد...
و أنا اليوم جئت لكم بخلاصة تجربتي ..
تجربتي باختصار.. >>> بأحاول أختصر قدر الإمكان مع عدم الإخلال
أنا ربي رزقني ببنات جميلات مؤدبات الكل يغبطني عليهم ماشاء الله تبارك الله..
الله يحفظهم ويخليهم... لله الحمد والشكر والثناء الحسن..
طبعا زوجي إنسان متفهم ومؤمن إيمان تام بقضاء الله وقدره .. ولله الحمد
وبناته هم نور عينه وسعادته
طيب وحنون معهم لأبعد درجه>> ماشاء الله تبارك الله
بحملي ببنتي الأخيرة يوم عرفت إنها بنت ولاحظ علي شيء من الحزن، لأني كنت متأملة إنه ولد ، عاتبني عتاب شديد وذكرني بأن هذا رزق من ربي وما نعرف من اللي بينفعنا في مستقبلنا..
طبعا كبرت بنتي الأخيرة وكملت ٣ سنين ونص ورجعت فكرة الحمل تراودني من جديد
ملاحظة: ببنتي الأخيرة بذلت الأسباب وكنت أتابع تجمع إنجاب الأشبال (عن بعد)
في أيام مؤسسة التجمع ( ام الأشبال ) الله يذكرها بالخير
وتأكدت من نزول البويضة عند الدكتورة وحصل التوت مرتين في هذاك اليوم ومن بعده عزل إلى أن عرفت بالحمل..
لكن الله ما أراد لي الولد ..
وحملت بقرة عيني ببنتي الأخيرة ...
المهم مثل ما قلت لكم رجعت فكرة الحمل تراودني ورجعت الرغبة في إنجاب الولد
واللي جربت مثلي وحاولت في الأسباب الطبيعية وما ضبطت معها تعرف إن كلها مجرد صدف وإن الله إذا أردا شيء يقول ( كن فيكون)
وبدأت أبحث عن الطرق المؤكدة اللي سخرها ربي و اكتشفها العلم الحديث ما وجدت إلا طريقة الحقن المجهري
هي اللي بعد أمر الله لو ربي كتب الحمل بيكون نفس الجنس المرغوب
طبعا ما تتخيلون صعوبة الموضوع على نفسي وكيف بأحاول أقنع زوجي فيه
بدأت أدعي الله إن إذا كان الموضوع فيه خير أن ييسر لي الطريقة المناسبة اللي أفاتح فيها زوجي بالموضوع وأن يشرح الله صدره له..
والحمدلله جيته في يوم كان رايق وسولفت له أخبرته أني متعجبة أني قرأت عن طريقة بعد أمر الله مؤكدة لإنجاب ذكر..
وقرأت له فتاوى وسمعته مقاطع في اليوتيوب عن مشايخ يجيزون الأمر لمن رزق بثلاث بنات وأكثر
المهم إني حسيته متقبل الفكرة نوعا ما و ما عارضها خصوصا بعد ما سمع الفتاوى
أنا موظفة بدأت أجمع المال لأجل هذا الموضوع وحتى لا يستصعب الأمر ويتعذر بالمادة
وكنت بين فترة وفترة أقول له إني الحمدلله جمعت كذا وكذا لأجل نعمل العملية
حتى اكتمل المبلغ عندي وأخبرته وقلت بإذن الله على الشهر القادم نبدأ
كان متردد ويحاول يأجلني من شهر إلى شهر حتى ضغطت عليه وبدأنا المشوار ..
هذا الكلام قبل أقل من سنة تقريبا..
سويتها في مستشفى في الرياض..
طبعا ما يحتاج أحكيكم عن التعب والمعاناة مع الإبر في فترة التنشيط غير ألم العملية مسكني مغص مثل مغص الدورة فترة ثم خف
الطريقة للي ما يعرفها بإختصار (((((( من ثاني يوم للدورة ولمدة أسبوع إلى أسبوعين ( على حسب استجابة جسمك) خلال هالفترة تضربين كل يوم إبر حتى تنتجين بويضات ويتابعونها معك اذا وصلت للحجم المناسب تاخذين إبرة تفجيرية ثم يحددون موعد العملية لسحب البويضات.. طبعا يكون زوجك معطيهم العينة بنفس اليوم و ياخذونها ويحقنونها بالبويضات اللي سحبوها منك .. اليوم اللي بعده يتصلون عليك يخبرونك إذا تلقحت بويضاتك وتكونت الأجنة أو لا.. بعدها بأربع أيام يتصلون عليك ويخبرونك إذا لقوا أجنة ذكور أو لا.. و إذا فيه أجنة يتم الترجيع من بكرا في اليوم الخامس))))))
المهم نرجع،،
سحبوا مني ١٣ بويضة
اتصلوا علي من بكرا قالوا تلقح ٨ فقط
في اليوم الرابع كنت على أعصابي انتظر اتصالهم
اتصلوا قالوا للأسف الأجنة ما كملت انقسامات ما بقي الا جنينين فقط وبعد الفحص اتضح إنهم إناث..
طبعا ما أقدر أوصف لكم شعوري
سكرت مباشرة وأول شيء قلته (((اللهم أجرني في مصيبتي واخلفني خيرا منها )))
وأعيد وأكرر الدعاء >>> باقي مو مستوعبة
وبعد ما هديت نزلت مني دموعي مو اعتراض والله لكن دموع حزن طبيعية
كنت في دوامي لما اتصلوا علي المختبر طبعا بعد ما هديت أرسلت لزوجي رسالة أخبره بالخبر..
رجعت البيت و واساني وقال الحمدلله ربي ما قدر ولعل الأمر فيه خير لنا...
وبس انتهى الموضوع على كذا...
طبعا ما أخفيكم أنا عندي ما انتهى ..
بعد ما ارتاحت نفسيتي شوي ورجعت لحياتي الطبيعية رجعت أفكر بالموضوع مرة ثانية ما يأست واستمريت بالدعاء والابتهال لله بأن يوجهني وأن يرزقني ويكرمني
بعد فترة وبعد ما جمعت جزء من المال فاتحت زوجي بالموضوع مرة ثانية
لكن المرة هذي كانت أصععب كان راااافض مرررة مرررة
لدرجة أحيانا أتحطم وأيأس ...
وأسكت فتررة ... وأرجع بعد فترررة أفاتحه مرة ثانية ... ويزعل مني .. ويقول خلاااص اذا ربي رزقنا طبيعي ولا الحمدلله مو لازم يجينا ولد...
اما بهذي الطريقة لا ... ضاعت فلوسنا وتعب ومشاوير ... ليه هذا كله؟؟؟ الحمدلله على عطية الرحمن...و اذا ما أراد الله لنا الولد ما راح يجي..
ما أخفيكم كنت أحزن مرات ومرات أسكت وأقول بعدين بأفاتحه >> باقي ما يأست
المهم ظليت أدعي وأدعي إن ربي يسخره وييسر الأمور
إلى أن جاء الوقت اللي فاتحته فيه وكان رايق ورفض طبعا بس أصريت عليه وسألته لييش ترفض وش السبب؟؟؟ الفلوس فلوسي ما راح تخسر شيء ...
والتعب علي أنا مو أنت...
خلنا نبذل الأسباب وليش بس من مره وحده نيأس
تكفففى خل نعيدها ووعد مني إذا ربي ما كتب لي ذا المرة إني ما عاد أطلبك مرة ثانية...
سكت ما قال شيء..
وبعد هذا الموقف يمكن بأسبوع جاتني الدورة و أرسلت له مسج على جواله أعطيه خبر...
وطبعا فهم مقصدي إني أحاول فيه نبدأ العملية..
ثم رد علي قال خلاص احجزي موعد...
أنا طرررررت من الفرحة ومباشرة حجزت وبدأت خطوات التنشيط بنفس ما كانت المرة السابقة
طبعا ما يحتاج أوصف لكم مشاعري في هذي العملية غييييير من توتر وقلق اللي ما كان فيني المرة الماضية
واستمريت عالتنشيط إلى أن جاء موعد العملية وتم سحب ١١ بويضة الحمدلله
اتصلوا علي اليوم الثاني قالوا تلقح ٩
حمدت الله وسألته أن يطرح البركة
إلى أن جاء اليوم الرابع و هو اليوم اللي بيخبرونا فيه نتيجة فحص الأجنة
وكان بالنسبة لي يوم جدا صعععب
تخيلوا موقفي ... وموقف زوجي بعد..
كان متوتر بس مو محسسني
طلع من البيت وقال عندي شغلة بسيطة إذا اتصل المركز وكان فيه شيء رجعت لك..
وقال لي قبل يطلع إذا الله ما كتب الحمدلله لا يضيق صدرك ولا شيء وحطي ببالك الاحتمالين..
تأخروا ما اتصلوا ..
قمت اتصلت عليهم قالوا لسى باقي ما طلعت النتيجة.. انتظري ربع ساعة ..
انتظرت ربع ساعة كأنها ٢٤ ساعة...
ثم فجأة
يرن جوالي
قمت فززززيت
المختبر:
ألووو
مدام .....فلانة
ايوه معك
صارت تسألني مجموعة أسئلة عشان تتأكد إني أنا>> يا هي رايقة
بعدين سألتني أنتي طالبة تحديد جنس؟؟
قلت ايووه
قالت طيب ما شاء الله طلع عندك ٣ ذكور لازم تكوني عندنا بالمركز الساعة كذا
قلت: الحممدلله .. إن شاء الله بإذن الله
أنا سكرت من هنا وقمت طحت ساجده عالأرض سجود شكر لربي وأبكي أبكي من الفرحة وأحمد ربي وأشكره
قمت من سجودي مباشرة اتصلت على زوجي وأنا ابكي وهو يقول وش فيييك ؟ (( توقع إني مصدومة وإن النتيجة سلبية))
قلت: أبشرررك الحمدلله لقوا أجنه اولاد
قال: الحمدلله.. كم؟
قلت: ثلاثه
قال: ماشاء الله .. يالله شوي وجايك..
طبعا تم الترجيع ولله الحمد وكانت لحظات ممتعه ذيك الفترة عشت فترة سعادة
تخيلت إن الحلم اللي أتمناه من سنوووات تجاوزت (العقد) من الزمان وأكثر راح يتحقق إن شاء الله
مرت فترة الترجيع ارتحت أول الأيام وبعدها مارست حياتي طبيعي بس بدون إجهاد
وعندي خادمة وبناتي كبار الحمدلله
هذي كلها أسباب كانت
وكنت متيقنه لو ربي كاتب لي الحمل بأحمل لو أسوي اللي أسوي
ولو ما كتب ما راح أحمل لو ألتزم فراشي طول الأسبوعين
طبعا بعد ما مر يمكن ٨ ايام رجع القلق والتوتر من جديد والخوف من عدم وجود حمل
مع استمراري بالدعاء وبالرضا بالمكتوب
صبرت على أساس أحلل هرموني
ولكـــــــــــــــــــــــــــــــــــــــــــــــــــــــن
في اليوم العاشر كانت
الصددددمة
دخلت دورة المياه ووجدت دم وأنتم بكرامة
مبااااااشرة رددت (( اللهم أجرني في مصيبتي واخلفني خيرا منها)))
وأكرر وأكرر
خرجت من الدورات وأنا أبككككي
وأسترررجع (انا لله وانا اليه راجعون)
وأحوقل (لاحول ولاقوة الا بالله)
>> كان زوجي وقتها مسافر يومين وراجع
بس الصدمة إن الدورة جتني قبل موعد التحليل
وكان قبل يسافر طلبت منه يشتري لي تحليل منزلي .. رحت جربته على اساس أحاول أقنع و أأمل نفسي إن فيه حمل
لكن للأسف ما طلع شيء ( خط واحد)
ولأني ما ودي أصدمه أرسلت له رسالة وقلت لا تنساني من دعواتك و أنت مسافر نزل مني افرازات بنيه و خايفه تكون الدورة
رجع اتصل ويقول الحمدلله ربي منعم علينا بنعم كثيره ليش نجحدها و إذا ربي ما كتب الحمدلله والله إننا راضين و و و
وكلام كثيييييير...
ومن ضمن كلامه أذكر قال:
والله إني ما ودي بالولد إلا عشانك أنتي ولا أنا بناتي مالين علي دنياي الله لا يحرمني منهم
دمعت عيوني قلت الله يخليهم ويحفظهم ويرزقنا خير على خير..
مرت نفسيتنا اليومين الباقيه وهي متهيأه إن ما في حمل لسبب إن الدم استمر ينزل
بل بدأ يزيد أكثر
وشريت أكثر من جهاز منزلي واستعملتهم في أوقات مختلفة وتأكدت إنه ما في حمل و إنها فعلا دورة
فقلت له خلاص الحمدلله على كل حال ما يحتاج أحلل هرموني
نفسيتي خلال هذاك الأسبوع كانت جدااا تعبانه
الحمدلله والشكر متيقنه إنها الخيرة اللي أرادها ربي لي ..
لكن ماتتصورون حجم الخساير النفسية والجسمية والمالية..
مر قدامي شرييط حياتي للعمليتين اللي سويتها واللي كانت في أقل من سنة كان بينهم ٨ أشهر تقريبا..
دفعت فيها فوق الخمس وأربعين ألف وكلها راحت..
لكن عزائي إن كل شيء بأجره و يارب يجعل ما أصابني من هم أو حزن أو ألم رفعة لي في جنات النعيم...
هذي تجربتي باختصااار وأقسم بالله العظيم إني صادقة في كل حرف فيها
حاولت اختصر قدر الإمكان وبدون لا أخل بهدف الموضوع..
وآسفة اذا طولت عليكم..
أتمنى منكم حبيباتي ما تحرجوني بالأسئلة لأني خايفة أحد يعرفني... مثال كم عدد بناتك؟ كم لك متزوجة؟ وغيرها... من الأشياء اللي ممكن تكشف الخصوصية... وما منها فايده ...
بالنسبة لي تعمدت ما أذكر المركز ولا الطبيب ولا أي معلومات تخص الموضوع لأن الناس تتعلق بالأشخاص..
أنا عني وااااااثقة إن ربي اللي ما أراد للولد يجي وليس الخلل لا في المختبر ولا في الطبيب...
رغم إني سويتها عند أفضل المراكز..
لكن إرادة الله فوق كل شيء آمنت به سبحانه وأيقنت أنه هو المدبر وهو على كل شيء قدير...
طبعا ... ما يحتاج أذكر لكم الشيء اللي كان بيني وبين ربي من تحري لأوقات الإجابه والدعاء والصدقة والتوكل .. هذي كلها ماذكرتها بموضوعي لكن هدفي من الموضوع ياحبيباتي توصيل رسالة ..
أنه مهما بذلنا وسعينا وتعلقنا بالأسباب مالك إلا اللي مقدره لك رب العالمين ...
والرضا والقناعة هي أهم شيء بالحياة ...
أنا استفدت كثييير من تجربتي والله أراد لي بها الخير الكثير...
والله يا بنات صار عندي رضا عجيب وقناعة يارب لك الحمد والشكر..
ختاما ...
لاتنسوني من دعواتكم في ظهر الغيب
محبتكم .. أختكم حوراء العينين