كيفكم يا اخوات ..ان شاء الله الجميع بخير...
حبيباتي هذا الموضوع قرأته في احد المنتديات وحبيت انني انقله لكم
لعلنا نستفيد منه لأن فيه اشياء مفيدة جداً وانا قررت امشي على الطريقة
والله يكتب لنا مافيه الخير....
تقول صاحبة الموضوع:
الحمدلله رب العالمين ربنا كرمني بالحمل بعد سنتين من المحاولات
طبعا بعد إرادة الله سبحانه وتعالى ثم الاخد بالاسباب
اسالكم بالله قولو ماشاء الله لاقوة الا بالله ,
وادعولي ان الله يثبت حملي ويرزقني الدريه الصالحه وهيا بااتم صحه وعافيه
يعلم الله اني حاسه بمعانات كل وحده اتااخر حملها فعشان كدا قررت اكتب تجربتي
اسائل الله تعالى انه يفيد كل مسلمه بيها ,واسفه جدا اذا خدشت حيائكم ببعض الالفاظ
بس ربنا يعلم قصدي اني اقصد بيها التوضيح للفائده فقط
وارجو منكم قراءة الموضوع للاخير لان كل حاجه حااكتبها ممكن تفيدك
وتلفت نظرك لشيء كان غايب عنك زي ماكان غايب عني
اولا زي ماذكرت انا ليا سنتين متزوجه , ومن قبل مااتزوج وانا اتمنى احمل من اول شهر اتزوج فيه
علما اني من قبل مااتزوج كنت عارفه انو عندي ضعف في التبويض
وتكيسات على المبايض وارتفاع في هرمون الذكوره الحمدلله على كل حال
وطبعا نتيجة لكل دي الحاجات كنت الدوره تجيني كل 4 شهور او 5 شهور مره
وحتى لما تجي كانت جدا خفيفه ومااحس معاها بااي الم
قبل زواجي بكم شهر رحت عند الدكتور عبدالرحمن الشيخ في مستشفى فقيه
وكتبلي حبوب جلوكوفاج لمدة سنه كامله عشان تنظم الدوره وتخفض هرمون الدكوره
استخدمتها زي ماقال سنه كامله + بالاضافه اني كنت اخد كل يوم
ملعقه صغيره من عشبه اسمها القسط الهندي طبعا ريحتها جدا مزعجه
فكنت اخد وصله صغيره من لب العيش وافردها واحط جوتها القسط
واقفل عليها العيش يعني تسير كاانها حبة دوا وابلعها مع مويه
+ كمان كنت في فترات متقاربه اعمل حجامه خاصه بمناطق الدوره خلال هذي السنه
الحمدلله انتظمت الدوره وسارت تجي كل شهر والتكيسات سبحان الله اختفت تماما
بس لما رحت راجعت وسويت تحليل طلع هرمون الدكوره مازال عالي
لكنه نقص شيء جدا بسيط , كتبلي علاجات تانيه لكني يأست وما اخدت اي دوا
جلست كم شهر بعدها بدون علاج
وبعد فترة سمعت عن الدكتور عمر محجوب في مستشفى فقيه ماشاء الله دكتور ممتاز
بعد الفحوصات قلي اني عندي ضعف في التبويض بالاضافه لاارتفاع هرمون الدكوره
وقررت اجرب عنده اعمل كورس علاج واحد يعني اتعالجت عنده لمدة شهر واحد بس
خلالها اعطاني ابر تنشط المبيض كنت اخدها تقريبا مرتين في الاسبوع
بالاضافه لاابره تفجيريه وكل 3 ايام اروح يعملي الاتراساوند عشان يتابع المبيض
المهم حدد لي يوم معين ووقت معين للجماع , وقلي بعد الجماع بـ12 ساعه بالكتير لازم تكوني عندي
رحت له زي ماطلب , خلى الممرضه تاخد عينه من السائل المنوي الي في المهبل,
حاولت الممرضه وتقولي انتي متااكده سار جماع؟!!
استغربت من كلامها تقول اني نااااشفه من جوه وما في سائل منوي
بعدها جا الدكتور وجرب هو بنفسه ياخد العينه , قلي برضو انتي ناشفه غريبه ,
بس قدر ياخد شيء جداا بسيط وارسلو للمختبر
طلعت نتيجة التحليل بعد ساعه تقريبا ,
وطلعت النتيجه ان الحيوانات المنويه الي في المهبل ميته سبحان الله
طلب من زوجي انه يعمل تحليل للسائل المنوي بعد يومين ,
المهم سوا التحليل وطلعت النتيجه ان زوجي عنده ضعف في حركة الحيوانات المنويه وتشوه بسيط في بعضها
سبحان الله انا ليا فتره طويله اتعالج ونهائيا ماجا في بالي ان زوجي
ممكن يكون عنده شيء يمنع حملي
لكن بفضل رب العالمين ثم الدكتور عمر محجوب قدرت اعرف السبب
المهم الدكتور عمر محجوب خير زوجي بين حاجتين
يااما انه يروح عند دكتور ذكوره وهو يفحصه ويعطيه العلاج المناسب
,او انه يمشي على علاج الدكتور عمر محجوب لمدة 3 شهور واذا مانفع يسير وقتها ضروري يروح لدكتور مختص بالذكوره
طبعا زوجي اختار انه ياخد علاج من عمر محجوب ,
كتب له حبوب فيتامينات منوعه بالاضافه لحبوب زينك
وحبوب كلوميد يستخدمها لمدة 3 شهور كامله
جلسنا شهر وزوجي رافض انه يتعالج يقول انا مافيا شيء وهذا الدكتور مايفهم ...الخ
بعد ماكمل الشهر الحمدلله قدرت اقنعه انه نغير نظامنا بالكامل
بمعنى اني انا وزوجي مشينا على نظام معين لمدة شهرين كااااااااااامله
والحمدلله رب العالمين حملت اول ماخلصت الشهرين ماشاء الله لاقوة الا بالله
بس قبل مااقول النظام ,حاولي ماتفكري كتير بموضوع الحمل ,
انا عارفه انه شيء صعب جدا , بس حاولي تشغلي نفسك بااشياء جديده عشان ماتفكري ,
اتعلمي اي شيء جديد عن طريق النت او عن طريق الدورات
سبحان الله انا ماقدرت اقلل من تفكيري في الحمل غير الشهر دا ,
لان امي الله يطول بعمرها ويشفيها جاها مرض السرطان , فكنت مره مشغوله بمرضها وبالي على طول معاها
النظام هو :
عملنا انا و زوجي دايت صحي , علما ان زوجي نحيف وانا مليانه ,
لكن الغرض من النظام انه اجسامنا تعوض اي نقص فيها وعشان الصحه بشكل عام
وكنت امشي ساعه كامله 4 مرات في الاسبوع واحيانا 3 مرات في الاسبوع , زوجي لا بس انا
كل يوم لمدة شهرين كنت اخد حبه وحده فيتامينات منوعه
زوجي كان كل يوم لمدة شهرين ياخد الادويه الي وصفها له الدكتور عمر محجوب
بالاضافه كنا انا و زوجي كل يوم لمدة شهرين ناخد حبه وحده من كور التمر , حتكلم عنها بالتفصيل تحت
بالنسبه ليا ايام الدوره فقط : كنت اخد من تاني يوم للدوره
حبوب كلوميد حبتين في اليوم لمدة 5 ايام , وكل يوم اكل عين الجمل "نوع من المكسرات" ,
واشرب كاسه كبيره من منقوع الاعشاب التاليه( عشبة المدينه , قرفه , قرنفل , كمون , فلفل اسود , زنجبيل , ميراميه , بردقوش)
ملعقه صغيره من كل شيء بس عشبة المدينه احط ملعقتين ,
وكنت احطها في براد كبير جوته مويه مغليه وانقع الاعشاب فيه ساعتين او اكتر
ووقت ماابغى اشربه اسخنه شويه
سبحان الله من يوم ماجربت هدي الطريقه سارت الدوره ماشاء الله
تنزل بطريقه فضيعه ويجيني الم في الظهر والبطن من كتر الدوره الله يعزكم ,
لدرجة اني كنت اضطر البس حفائض الدوره الخاصه بالنفاس والله ,
سبحان الله كاانو رحمي كان مليان دم فاسد واوساخ ونزلت مع دي الطريقه
كنت خلال هدي الشهرين وقت الجماع لازم اكون نايمه على ظهري وحاطه مخده تحتي
لااااازم ومااقوم ابدا بعد الجماع مباشرة يعني انام بعدها مباشرة ومااقوم الا الصباح ,
لانك لو قمتي بعد الجماع على طول حيخرج كل الي جوتك
كنت كل يوم قبل ماانام لاااااازم استغفر
ولاني كسوله كنت غالبا كنت استغفراستغفار
مضاعف يعني هدي الصيغ الي كنت ارددها كتير:
استغفر الله عدد ماتعاقب الليل والنهار , وعدد مانزلت الامطار , وعدد كل شيء وملء كل شيء , وزنة كل شيء
استغفر الله العظيم واتوب اليه عدد خلقه ورضاء نفسه وزنة عرشه ومداد كلماته
واقول لا اله الا انت سبحانك اني كنت من الظالمين و اصلي على النبي عليه الصلاة والسلام بنفس الصيغه.
وكنت اتصدق كل اسبوع لما زوجي يروح صلاة الجمعه اعطيه الفلوس يوديها للمسجد
ملاحظه : اذا زوجك استخدم العلاج الي انا كاتبته حتلاحظي
انه ماشاء الله رغبتة الجنسيه قويت كتير عن الايام الي قبل العلاج ,
اتوقع والله اعلم من الكلوميد يخلي الرجال يبغى كل يوم ,
ومجرد مايوقفه بكم يوم حيرجع لطبيعته .
كور التمر:
بما ان زوجي كان متعبني ومايرضى يستخدم خلطات , جات على بالي فكره تسهل عليه استخدام الاعشاب
جبت تمر معجون كميه كبيره نوعا ما بحيث تكفيكي فترة العلاج ,
وكنت اخد وصله من التمر افردها واحط جوتها
7 حبات حبه سوده + شويه رشاد + شويه قسط هندي + قطعة عين الجمل
واكور التمر يعني يسير عندك كوره من التمر والحاجات هدي جوتها
طبعا اذا تحبي النارجيل ممكن ترشيه على الكوره من برا عشان يسير طعمه احلى
ورصيهم في صحن او في علبه وغطيهم تمام ,
وحطيهم في الثلاجه وكل يوم كلي انت حبه وزوجك حبه
هذي صورة عين الجمل لان كتير يلخبطو ببينه وبين مكسرات تانيه
هدي صورة القسط الهندي و الرشاد وعشبة المدينه بالترتيب
ملاحظه : ضروري جدا لما تشتري القسط الهندي وعشبة المدينه تخلي العطار
هو الي يطحنهم ناااااعم مره , لانهم مره قاسيين ماحتقدري تطحنيهم في البيت بنفسك
, وعموما القسط الهندي الافضل انك لما ترجعي البيت جيبي صفايه
فتحاتها تكون مره صغيره وانخليه عشان تاخدي بس الجزء الي مره ناعم منه
ملاحظه اخيره : ضروري تنبهي على زوجك يمتنع تماما عن الاستحمام بمويه حاره
لانها هي من الاسباب الاساسيه لضعف الحيوانات المنويه
هذا كلام الدكتور عمر محجوب مو كلامي انا
طبعا شكيت اني حامل لما جاتني الام فضيييييعه اسفل بطني والم فضيع في صدري
احساس غريب زي الحرقان بس في الصدر وكمان غثيان , فرحت سويت تحليل منزلي
قلت اتطمن قبل مااخد اعشاب تنزل الدوره
والحمدلله رب العالمين طلعو خطين يعني حامل
اسفه طولت عليكم ,اتمنى تكونو استفدتو من تجربتي ,
والي تحب ادلها على محل حجامه ثقه في مدينة جده تراسلني على الخاص ,
انا اتعامل مع وحده ثقه وتستخدم ادوات خاصه لكل وحده وترميها قدامك بعد الاستخدام
, وتجلس تقرا عليكي قران وهيا بتسوي الحجامه ,
علما ان في نفس المكان في قسم للرجال برضو اهلي مجربينه
وبالنسبه للعطار الي اشتريت من عنده الاعشاب وعين الجمل اسمه عطار الحجاز في شارع صاري
اسائل الله العلي العظيم ان يرزق كل محرومه بالدريه الصالحه عاجلا غير اجل
اسائلكم بالله ادعولي ان الله يثبت حملي ويفرح قلبي بالدريه الصالحه , و يطول بعمر امي ويشفيها عاجلا غير اجل
الله يثبت حملها ويفرحها بالذرية الصالحة
ويطول بعمر امها ويشفيها شفاء عاجلا غير آجل..
ويطول بعمر امها ويشفيها شفاء عاجلا غير آجل..
وانا اليوم كنت عند الدكتور عمر محجوب اول مرة اروح عنده وطلب مني ارجعلة تاني يوم الدورة وطلب من زوجي يعيد التحليل تاني
وبعد ما شفت موضوعك اتحمست للدكتور كتير
وهو دكتور يريح النفس وباله طويل
والله يرزقني ويرزق كل مين يتمنة الذرية الصالحة