تجربتي في الولاده القيصريه

السلام عليكم عليكم حوائيات بالأخص الحوامل 🙋‍♀️
في وحده من الأخوات طلبت مني انزل تجربتي عشان الكل يستفيد👌
طبعا انا حابه اذكر تجربتي بشكل إيجابي رغم ان في سلبيات ماحب أخوف اي بنت على وشك ولاده قيصري كوني ماره بشيء ذا...
أولا ... 💛عسى ربي يتمم حمل الجميع على خير
تجربتي للي مقرر لها قيصري حطي ببالك أن الله جعل مخرج ثاني لطفل ولله الحمد بعد تطور الطب.
ثانياً... 💛قبل أي شي لازم تستعينين بالله وتتوكلين عليه سبحانه وتعالى طبعا انا سالفتي طويله بالولاده بس ببدأ من اول ماتقرر لي عمليه على كثر ماكنت متحمسه ميار 😩 تطلع لانها اتعبتني الا اني خفت اول ماقالو عمليه وشفت الملابس قدامي قلت يابنت خلاص عمليه توكلي على الله رحت استغفر واقرا قرآن بعدين خذت غفوه بعدين اتفرجت على الجوال واغير الجو عشان مافكر رغم اني متخوفه بس المهم الحمد لله اشوف النونو جلست اقرا وش الأشياء الي اسويها بعد الولاده اسلي نفسي تو بحط راسي حسيت بنام قالو يلا عمليه واركب السرير وامشي لين شفت مكتوب غرفه الافاقه عشان يجهزوني ويخدروني خلاص ميار بتشررف💃 الحمد لله
ثالثاً... 💛 السوالف إلي تصير وقت العمليه ماقدر اقولها لان تجارب تختلف بس حمد لله و ع حسب الطبيب يعني في بنات قالت ماحس وبنات تحس وبنات معها زوجها وبنات لا بس المهم اني انا كنت نصفي عشان اشوف البيبي أفضل لي من ناحيه الآثار الجانبيه بعد العمليه ممكن تحسين بشكات وتحسين بضغط يد الممرضات عشان التنظيف بعد ربع ساعة شرفت الاميره 😍 رغم ماشفتها زين بس سمعت صياحها الله يحفظها ويعافيها
نص ساعة خلصنا العمليه والقسطره ركبوها لي بعد التخدير عشان ماحس
ماخفيكم يوم خلصت شوي دخت اتوقع عشان الصيام عطوني الكمام يالبيه دخلت بأحلام ورديه 😃 ماقدرت ارد ع الدكتور يوم تحمد لي بسلامه والطاقم كان ينكت معي ويطقطق لين ولدت انا مو يمهم وخايفه منهم اصلا 😩
بقولكم شي اذا انتي خايفه من شكل الغرفه غمضي عينك لين يوقفون وافتحيها بس تحصلين السقف والنور فوقك
رابعاً... 💛بعدها تروحين الافاقه يبدون يخلونك شوي عندهم لين تصحصحين ويبدلونك الملابس يتاكدون انك تحركين جسمك من خلال كيس الثلج طبعا التحذير مايروح بسرعه انا جلس يوم كامل حبه حبه يروح مني من اصابعك لين الحوض وتخدير إلي بالجرح جلس ممكن شهرين او اكثر
بعدها تروحين بتنويم يتاكدون من بعض الشغلات اول ٢٤ ساعه يتابعون حالتك من ناحيه الضغط والحراره وطبعا في مسكن يحطونه لك كل ١٢ ساعه او تحميله انا كلها خذتها
اول ١٢ ساعه بدت الممرضه حقتي تساعدني اتحرك واغير وساعدتني وانتم بكرامه بالحمام اول شي جا ببالي المشي واني اخدم نفسي ماعتمد ع الممرضات كنت كل ساعتين امشي ربع ساعة أجلس كانت ممرضه تشجعني تقول كويس ممتازه استمري بعلمكم صارت معي حاجه بالتنويم نزل معي باليوم الثاني دم متجلط فجأه وانا امشي وقلت اكيد مشيمه بس كيف هي عمليه لين رحت كلمت الممرضات قالو تصير بس انتبهي تتكرر بسبب حبس البول لازم تروحين حتى لو مافيك صرت كل شوي اروح بس عشان اتحسن تعرفون المثانه عند الرحم تتأثر الحمد لله ماعد شفتها رغم الحركه كانت صعبه اول ٤ ايام وتخف فجأه قمت يوم من الايام اختفى الألم الي لما تقومين تحسين بشد الجرح ولي يشفي جرحك المشي ثم المشي انتبهوا تتكاسلون
بنسبه للغازات بتلعب فيكم طبيعي بسبب العمليه حتى كانوا يمنعوني من الحليب لانه يجيب غازات ع العموم بشكل عام مشتقات الحليب ماهي زينه كنت اشرب كمون كان يسهل علي يطردها وبنسبة للبراز يعطونك تحميله ضروري يتاكدون أن الأمعاء كويسه وعلاج الإمساك يابنات ملينات طبيعيه مثل الجرجير الخس والأدوية يصرفونها لك انا خذت شراب مره حلو
انتبهوا تهملون الامساك خطر ع الجرح ومعلومه ماتتحكمين بالبول والغازات والبراز تكرمون الا بعد فتره بسيطه مع الايام يرجع كل شي طبيعي يومين طلعت الحمد لله سليمه يصرفون لك اشيا مثل فيتامينات وابر مسيله وحبوب منع الحمل
خامساً... 💛 بناااااات انتبهوا من إهمال الجرح 🥺 انا التهب علي بسبب اللصقات خليتها ع لان الدكتور قال هي تطيح صدفه اسولف مع بنت خالتي طريتها قالت روحي شيليها بسرعه شلتها حبه حبه كل مكان فيه اللصقه محمر منتفخ جلست ٣ أسابيع عشان الألم يختفي بتدريج طبعا الحمد لله راح واختفى بعد شهر نهائي بعد ماخذت مضاد اعتنيت فيه من كل قلبي كانه بنتي كيف تنظفونه بعلمكم من خلال الخبره الي خذتها من اقاربي والدكتوره كل مسا وصباح روحي نظفي الجرح بالمناديل طبطبي وامسحي بعدين خذي المسحه على الجرح خلاص كذا نظف إذا بصيف البسي شي فضفاض انتبهوا تخلونه رطب مثله مثل الجرح الي تحت وقت النفاس تعتنين فيه أذا تبين معقم طبيعي مضاد عندك المره تعقم الجرح صح برضوا لاقربتي تخلصين روحي شيكي ع الالتهابات الي تحت مو شرط عشان عمليه مايجيك كنت ماصدق وجاني مو الكل يجيهم بس اقول شيكي
سادسا واخيرا... 💛 طولت عليكم 🙇‍♀️
نصيحه... مني🤍
كل تجربه تسمَعينها تختلف عنك انتي عارفين وش اقصد عشان كذا ماذكرت التفاصيل بس المهمات ولاترسمين الأحداث خليها تمشي على مجراها بتتيسر بعد الولاده انسي المعاناه فكري بسبب الجرح هذا كان نتيجه روح صغيره انشطرت منك جت على الدنيا بسلامه عيشي حياتك طبيعيه لاتجيك وحده تقول ماراح تقدرين تعيشين طبيعي لا طبيعي وأفضل ممكن الشي الي يختلف ابعدي عن الثقيل وتمارين فتره ٦ شهور و مع نصايح الطبيب لاتخلين الجرح اعاقه لك وان العمليه تخليك ناقصه عن الباقي ودايم تقولين ياحظ الي تولد طبيعي كلهم فيهم تعبهم لكن ماتدرين وش الخيره ان العمليه تقررت لك ممكن وقت الولاده الطبيعي كان ولدك بختنق او ينقص عليه الأكسجين او او او.... الخ قولي الحمد لله أهم شي قمت بسلامه لاتخلين الي معك ينظر لك ان انتي مسكينه مسويه عمليه مجرد طبقات شقوها وخيطوها ماخذو شي من جسمك بس هذي العمليه اتمنى اني فدتكم بنات القيصري 😩 عسى ربي يتمم لكم على خير طبعا حبيت اذكر تجربتي لان نص قريباتي قيصري كلهم كلموني وعطوني المفيد عندهم
ممكن تجربه سيئه من خلال توصيل المعلومات بأسلوب لطيف تخلي البقيه تحب التجربه هذي والعكس صحيح
انتبهوا الي يشوهون سمعه القيصري انا ماني ضد الطبيعي لا ابد لكن كلهم فيهم سلبيات وإيجابيات والهدف واحد 😜

معليش طولت بالكلام اول مره اكتب كذا اي سؤااااااال حاضره احب افيد الجميع 😍 والله يتمم لكم على خير حبايبي🤍🤍

دعواتكم الخالص لميار بشفاء العاجل 🤲