بسم الله الرحمن الرحيم
السلام عليكم ياحوائيات كيف حالكم..
فتحت هالموضوع لوجه الله للي حابه تستفيد من تجربتي ..
ماشاءالله تبارك الرحمن
انا عندي بنتين ربي يحفظهم ويخليهم بذكر تجربتي فيهم لما ولدت..
التجربه الاولى:
طوال حملي كنت مواصله ع قراءة البقره والاذكار وكنت انفث ع بطني وباخر الثامن كنت مستمره ع المشي ولا يوم تركته
امشي بهداوه مو بسرعه امشي تقريبا 20 دقيقه بالنهار و20 دقيقه بالليل واحيانا بس مره باليوم امشي بس اهم شي
ماوقفت مشي ملاحظه(وانا امشي كنت اقرا الزلزله وانفث بيدي وامسح ع بطني) المهم بقالي اسبوع واخلص التاسع
فسمعت وحده تمدح الاناناس بانها تجيب الطلق وانا بصراحه من الثقل مليت وقلت اتوكل ع الله وباكلها طبعا جربت
الاناناس المعلب مانفع معي وجبت الطازج شريته في الليل واكلته تقريبا الساعه 12 بالليل وكان بارد وطعمه جنااان >>
وقتها نسيت اني اكله عشان الطلق :d
المهم لما جاء وقت النوم توضيت وقبل لاانام قريت سورة مريم كامله وبعدها نمت جاني زي مغص الدوره الساعه 3 تقريبا
يعني بعد اكل الاناناس ب3 ساعات المهم استمر الطلق خفيف لين الساعه 6 وبعدها صار كل شوي يزوووود لين خلاص
ماقدرت اتحمل ودقيت ع زوجي كان بالدوام قال ساعه واكون عندك المهم جاء ع 7 تقريبا وجلس عندي وقال تقدرين
تصبرين لين مايفتح دوامها الدكتوره اللي في الخاص عشان تكشف وتشوف هي ولاده او لا عشان اذا ولاده تحولني للعام
صبرت للساعه 9 وكنت وقتها امشي واذا جاء الطلق وقفت واذا راح كملت مشي ، لبست عباتي ورحت لها كشفت علي
قالت فاتح 2 سانتي وكتبت لي تحويل للعام وطلعنا وقلت لزوجي روح للبيت مابي اروح الحين للمستشفى طبعا كان فيني
خوف قلت ماراح اروح الا بعد صلاة الظهر وطلع هالشي من صالحي احسن من قعودي عندهم شربتني ام زوجي حليب
سعوديه ياحبي لها تقول افيدلك وبتسهل الولاده وانا والله من الطلوق مااقوى اقول لا شربته وشربتني ثاني لين خلصت 3
علب حليب سعوديه:09: وقتها هربت للحوش عشان امشي وبرضو لاجاء الطلق وقفت ،وسمعت الاذان شوي رحت للحمام
تكرمون كان معي اسهال من بداية الطلق وهالشي حلو عشان مااحتاج لحقنه شرجيه توضيت وصليت ولبست عبايتي
ومشينا للمستشفى الولاده وطوارئ وكشفوا علي من تحت قالوا 4 ياربي رحمتك الم اذا كشفوا من تحت خصوصا
السودانيات ولا الباكستانيات و ع طول للكشك الولاده ولبست القميص اللي الواحد يجيه بطنه من شكله تقل بتموتين من
طريقة تفصيله لا وغير كذا انا طويله وطالع علي قصيير :42: مادري انا اضحك ولا اخانق واقول جيبي غيره قلت يابنت
مشيها لايسوون فيك شي وتخيلوا عاد شكلي ساتره وجهي وسيقاني طالعه خخخخخخخ >>> ركزي يابنت :22:
هنا الطلوق كل مالها تزووود وكل ماجاء دكتور كنت اطلبه يولدني عمليه طبعا غبيه وقتها لانها اول ولاده ماكنت عارفه وكان
الله يجزاهم خير يرفضووون، الكلام هذا كله تقريبا ع الساعه 1 ونص وكشفوا علي وقالوا 6 وطبعا كل ماقربت الولاده
خلاص ماتقدرين تمشين رحت تحضنت السرير وحاطه حرة الطلوق بشعري ولا بالبطانيه ومادري ليش حاطينها لاصار المهم
بيطلع وبيشوفونه >>> واخزياااه :S_45:
عاد المصيبه طلع اللي بيولدني رجال بس جد وقتها بس تبين الجنين يطلع ووبس .. تصدقون لاحظت حاجه طول الوقت وانا
لي صياح وصوت من الوجع وحاسه بس انا اللي لي صوت الباقي مادري هم نايمين او انا بزر مادري المهم هالكلام هذا
مافكرت فيه الا بعد ماولدت >>> فاضية شغل خخخخخخخ
وبعد ماصارت الشوشه منفوشه طلع الرحم فاتح 8 سانتي وكلها ع كلامهم دقايق بولد استااااانست واخيرا
، ونادوا السسترات الدكتور وناظرت الساعه لقيتها 3 ونص >>> مادري ليش ناظرتها قلتلكم فاضية شغل خخخخخخ
وقال اسمعيني كلها اربع دقايق والجنين طالع قلت طيب قال كل ماجاك الم ادفعي واذا راح وقفي لاتدفعين قلت زين والمهم
يوم شافو الراس بطوني ابره ماحسيت فيها ابدا ووسعوني وسويت مثل ماقال الدكتور لين ماطلعت بنووتي القموره طبعا
انا هنا يوم سمعت صراخها خفت وقلت وشو ذاااا >>> خخخخخخخ هلوست عقب الطلوق طفل ذا اجل وشو ..علمي نفسك :d
وبعدين ضغطت ع بطني السستر الفلبينيه ياحبي لها صبرت علي ويازين نفسها ضغطت وطلعت المشيمه وراح الدكتور
يصلي العصر ثم جاء يخيطني وخلص اخيرا دبل كببدي .. وجابت لي بنتي بستها ومسحت ع راسها كانت تصيح ولما
سمعت صوتي سكتت ..>> هذاهي جنبي تلعب بالايبوود بسم الله عليها
قعدت بالكشك ساعتين ثم طلعوني لقسم التنويم وووبس ...
اللهم لك الحمد والشكر كما ينبغي لجلال وجهك وعظيم سلطانك ..
ملاحظه بنتي كانت متورررمه من قوة الطلوق وطبعا الاناناس تحمي الطلق بقوووووه ...
يتبع التجربه الثانيه لبنتي الثانيه
....ماشاءالله تبارك الرحمن لااله الا الله ....
حلاي ببناتي @hlay_bbnaty
عضوة نشيطة
يلزم عليك تسجيل الدخول أولًا لكتابة تعليق.
الصفحة الأخيرة
حلو امداني نحفت ،بعد ماوصلت الشهور الاخيره كنت احيانا اشرب مراميه ونعناع وقعدت كذا في يوم من الايام افتش
بهالمنتدى بقسم الحمل ولقيت موضوع لوحده ناسيه اسمها عن خلطه تسويها وتشربها ع كلامها انها تسهل الولاده وزينه يعني
من ضمن هالخلطه ان ماخاب ظني ( نونخه وشمر وكمون وحبه سوداء وحلب ويمكن رشاد ) طبعا مع اكل التمر
طبعا هالخلطه بديت اشربها من الاسبوع الاول من التاسع واستمريت عليها بس غلطت في حاجه ماكنت امشي كثير
وهالشي طلع مو من صالحي ، جاء يووم الولاده الموعود كان لي من استعمال الخلطه اسبوعين تقريبا يعني كنت بنص
التاسع جاء زوجي وداني للممشى طبعا ماكنت راعية مشي بس اليوم هذا مشيت فيه مشي ياالله تكسرت رجولي بعدها
لاني طوولت حيييل وانا امشي ويوم خلصت رجعنا البيت وسويت الخلطه وشربتها واكلت لي كم تمره وطلع زوجي لشغله ،
جاء الليل وكان وقتها زوجي مو موجود واروح افتح الشيبس واحطه بالصحن واطلع الكاكاويات اللي مخبيتها عن زوجي
خخخخخخخ (مايحبهم) والكولا واسهر عند التلفزيون يمكن ع الساعه 12 بالليل ماجاء في بالي ابدا اني راح اولد لاني
لسى بنص التاسع ، المهم تخدرت وجاني نوووم
ع الساعه1 جاني زي مغص دوره طبعا توقعته كاذب زي ماكان يجيني قبل مغص دوره ثم يروح المهم انا بصراحه شفت
المغص الخفيف كل شوي يجي ويروح ارسلت لزوجي رساله انه احتمال قربت الولاده انتبه لجوالك اذا دقيت عليك وطبعا الله
يعينه كان تعبان حيل من شغله قال ان شاءالله ، رحت نمت وصحيت الفجر صليت ورجعت نمت وع الساعه 8 الصبح
مسكني مغص قووووي ماقدرت اتحمله رحت سويت لبنتي رضعتها عشان ماتحس فيني واخذت شنطتي اللي مجهزتها
وانا بالثامن ورحت للشغاله صحيتها تجي عند البنت لين مايجي احد من اهلي ياخذها او يجي بعدين زوجي عندها وادق
ع زوجي وقلت له خلااااص الولاده جت تعال ودني للمستشفى ورحت للمستشفى ع طول وكشفو قالوا 3 سانتي وطلعوني
للكشك والطلوووق ياالله ماقدرت استحملها وتجي دكتوره باكستانيه قالت بكشف عليك من تحت يوم شفت اظافره وبقول لا
الا مسكت نفسي قلت يابنت لاتكون هذي اللي بتولدك تحملي كلها كم مخشه وخلاص >>>خخخخخخ انعن ابو التفكير
كشفت وقالت مفتوح 6 او 5 مو فاكره بس جد حسيت اني ماقدر اتحمل الطلووق وبس دموعي تصب واطرد السسترات
السعوديات اللي يتدربن اقسم بالله دبلن كبدي بس يسولفن عند راسي ويضحكن ، ولا الممرضات اللي يشتغلن رسمي
لاوالله محترماات ويهونن عليك من اسلوبهن وحتى الفلبينيات ياحبيييي لهن بس يحسون فيك ويقدرون الوضع اللي انتي فيه
برضو يوم قربت الولاده تحضنت السرير ومعععط بهالبطانيه من حر الطلق لين جت سستر وكشفت قالت 8 سانتي قلت
لا اكيد اكثر احس البيبي بينزل واقعد ماسكه صوتي واتعصر شي غصب عني وطيران السستر للدكتوره واشوا طلعت
حرمه اللي بتولدني وبسرعه طوو السرير وزينت رجولي لوضعية الولاده وقتها الساعه 1 ونص ودخلت فيني زي البلاستيك
طويل ونحيف تفك فيه الماء فتحت الماء ونزل لونه اصفر واستغربت الدكتوره وانا ع طول جاء في بالي انه من الخلطه تلونت
الماء وممكن يكون غلط توقعي احتمى عندي الطلق وحسيت بالدفع اكثر وصرت ادفع كل ماجان طلق واذا خف وقفت واذا
رجع دفعت والحمدالله طلعت بنتي الثانيه الله يحفظها بس المره هذي ماخفت >>> خخخخخخ خلاص عرفت مايطلع الا اطفال اصلا :)
واول مره اشوف وش يسوون بالطفل اول مايطلع لان ببنتي الاولى خذوها لغرفه ثانيه اما بنتي الثانيه لا شفت ايش سوو
مسكوها وقلبوها وقاسو طولها اتوقع ودخلوا بفمها زي اللي الصغير يشفطون الماء عاد تعرفون انا تجيني هلوسه بعد
الطلق قلت ووهم وش تسوون بالوغد خلاص وش تسوون >>> ماحد عبرن عارفين اني بحالة هلووسه خخخخخخ
وجابت لي السستر الفلبينيه شاي حار وكشري >>> خخخخخ ولا ع النيل
المهم جاء في وقته الشاي لاني كنت عطشانه بعد الولاده من الصياح ووجع الطلق وجابو لي بنتي بستها وضميتها وبعدين
اخذوها وبعد ساعتين ع قسم التنويم وووبس..
..
وان شاءالله اذكر لكم التجربه الثالثه بعد مايسهل الله علي واجيب البيبي ادعولي الله يسهل علي ويقومني بالسلامه انا
والبيبي يارب ولكم بالمثل .
.
ملاحظه مهمه ولادتي الاولى حسيت اني اقدر اتحمل الطلق والولاده لاني كنت امشي ومواصله ع المشي من اخر الثامن
اما في ولادتي الثانيه حسيت اني مااقدر اتحمل لا الطلق ولا الولاده لان كان مشيي قليل بس الخلطه اتوقع من بعد الله
فادتني بانها خلتني اولد بدري بس ماينفع ابدا اذا صرت ماامشي وناويه بإذن ربي من بداية السابع بحملي هذا بسوي
تمارين كيجل وبمشي من اخر الثامن عشان اقدر اتحمل الطلق والولاده ويكون عندي طاقه بعد الولاده ان شاءالله .
.
لاتنسوني من دعواتكم وارفعوا الموضوع الله يجزاكم خير حابه الكل يستفيد لاني من جد تعبببت وانا اكتب لكم الموضوع ..
يلا عن اذنكم بريح شوي..
ماشاءالله تبارك الرحمن لا اله الا الله ...
اللهم لك الحمد والشكر كما ينبغي لجلال وجهك وعظيم سلطانك ..
سبحان الله وبحمده عدد خلقه ورضا نفسه ووزنة عرشه ومداد كلماته..