تجربتي في تأخر الحمل، يارب تفيدكم🤍

مرحبـا بنات، راح ابدأ بتجربتي على طول

انا اجلت الحمل لمدة سنتين، بدون اي دواء مانع، فقط مانع طبيعي، والحمدلله بعد السنتين قررت احمل
وكنت متخيلة الحمل سهل وراح يصير على طول والموضوع فبالي كان سهالات، انتظرت شهر شهرين سته ماصار حمل وكل شهر اعيش جو اني حامل وفيني غثيان وتجي الدورة! بالشهر السادس من المحاولات تأخرت الدورة اسبوعين قلت خلاص اكيد حامل ومااحكيكم كيف عشا الجو، رحت المستشفى التحليل سلبي سويت فحوصات طلعت عندي الغدة الدرقية مرتفعة ارتفاع بسيط، لكن على كلام الدكتور حتى لو الارتفاع طفيف جداً إذا تبين تحملين لازم تعالجينه، والحمدلله كان علاج الغدة سهل والاستجابة سريعة، لكن سويت سونار للأحتياط وطلع عندي كيس دموي بطانة الرحم المهاجرة
كان شي جديد علي وماعندي اي خلفية عن الموضوع!
لكن الحمدلله..
الدكتور قال الكيس صغير وبجهة وحدة دام اني عالجت الغدة ممكن يكون فيه مجال للحمل بدون علاج للكيس، طبعاً هذا الكيس علاجه هو الحمل لأنه يتغذا على الدورة الشهرية، عموماً قلت تمام بجرب ٣ شهور وكنت متفائله بالحمل هالفترة لكن مو مكتوب لي..
بعدها صار يجيني الم بالجماع، والم الدورة فضيع رجعت للدكتور وسويت سونار طلع الكيس حجمه تغير من 3 إلى7 ، وصار فيه كيس بالمبيض الايمين حجمه 2 ، وفتاتات دموية متنشرة بالرحم، طبعاً 7 يعتبر كبير مره قالي لازم عملية وانا كنت خايفة ورفضت، غيرت الدكتور وطلب مني نبدأ علاج كورس 6 شهور " اول ثلاث شهور ابرة ديكاببتيل كل شهر ابرة بالعضل، وثلاث شهور حبوب منع حمل "
الهدف من الكورس ان الدورة تتوقف ويروح الكيس لأن مافيه شي يتغذا عليه "
كان فيه احتمال نكتفي بالأبر فقط لأن مفعولها قوي وممكن ينزل الكيس معها
لكن للأسف بعد ماخلصت ابر 3 شهور سويت سونار الكيس حجمه 6 يعتبر ماتغير! والحمدلله الكيس جهة اليمين والفتات اختفى
بعد ماشاف الدكتور السونار قال دام الأبر ماقلصت حجم الكيس الأيسر ف مايحتاج نكمل الكورس، علاجه المنظار ..
واستخرت والحمدلله بعد شهرين سويت المنظار 3 فتحات بالرحم وفتحة فوق السرة، اول يومين بعد العملية كانت اصعب شي، بعدها جلست اسبوعين اتعافى تدريجي والحمدلله

طبعاً كانت الخطة المفروض بعد العملية بشهر تنزل الدورة طبيعي، بحكم اني كنت اوقفها بالابر 3 شهور والابر مفعولها 6 شهور ، لكن خلصت المدة ومانزلت !
رجعت للدكتور وقال مو مشكلة ننتظر شهر، انتظرت ومانزلت وصرف لي حبوب بريمولوت عشان انزلها، وبرضوا مانزلت ! كملت 7 شهور بدون دورة
بعدها حطيت امل ان يصير حمل بدون دورة لكن كان صعب وكلام الدكتور انه نادر والغالب يصير مع اللي ترضع بس نحاول، كان املي بالله كبير ودعيت ربي برمضان ليل ونهـار ورحت مكة برمضان اخذت عمرة انشرح صدري، والحمدلله يارب وكلت امري لرب العالمين واخذت راحة من المستشفى شهرين لنفسي
بعدها رجعت للدكتورة الغدة وكنت مستمره معها بالعلاج طول السنة، ولما رحت لها قلت لها عن اللي صار وقالت خليننا نسوي تحليل حمل، سويت تحليل وطلع سلبي والحمدلله على كل مكتوب يارب، بعدها رجعت لدكتور النساء بعد عشر ايام من موعد الغدة، وقلت له ان بيرمولوت مانفع ومانزلت الدورة ومره استغرب، قال بصرف لك مره ثانيه بس خليننا نسوي تحليل حمل احتياط، قلت له مافيه حمل سويت قبل عشر ايام عند دكتورة الغدة وطلع سلبي
قال معليه للأحتياط بس وصرف لي بريمولوت
طبعاً كذا صار لي قريب 9 شهور بدون دورة وكنت بس ابيها تنزل عشان اقدر احسب التبويض واحس ان كل شي صار طبيعي.
ماكان عندي شعور بالحمل ابداً ف ماانتظرت النتيجة صرفت العلاج وطلعت من المستشفى
المفاجأه اللي ربي مخبيها لي دخلت تطبيق المستشفى اشيك على تحاليلي واشوف تحليل الحمل نزل ايجابي!
مافيه حكي ولا كلام يوصف شعوري بهذيك اللحظة وكل اللي اقوله الحمدلله قدرة ربي فوق كل شي، وإذا أعطى أكرم، ولايخيب من رجـاه الحمدلله

انا الآن بالشهر الرابع ولله الحمد دعواتكم الله يتمم لي على خير، ويارب الله يرزق كل من تتمنى الذرية الصالحة🤍

+ كثرو من الاستغفار + دعاء ربي لاتذرني فرداً وانت خير الوراثين لايفارقكم + وكلو امركم كله لرب العالمين

عذراً على الإطالة ويارب اكون افدتكم🤍