تجربتي في تفتيح الجسم

السلام عليكم ورحمة الله،،
اليوم بشارككم تجربتي في تفتيح المناطق الحساسه،، يمكن الموضوع مكرر لكن هذي تجربتي الشخصية بدون نقل،، طبعاً ما بقول تبييض ف يوم ويومين لانه طبعاً مستحيل،، وبقول تفتيييح وليس تبييض لاني للحين ما وصلت للتبييض وما بكذب عليكم،،
طبعاً أول شي بعطيكم نبذة بسيطة عن الموضوع قبل ما أخبركم طريقتي،،
أنا وحدة حالي حال أغلب النساء اللي تعاني من اسمرار المناطق الحساسه وخصوصاً اني أعاني من لخبطة الهرمونات ومع العلاجات والأدوية زاد الاسمرار عندي،، وبما انه المنتدى نسائي اعذروني بخذ راحتي ف الكلام،، المنطقة عندي سمّرت بزيادة وصار الفرق واضح بينها وبين باقي جسمي خصوصا انه جسمي مايل للبياض بزيادة وأي فرق ف اللون يوضح ع طول معي،، وخصوصا منطقة الأشفار (عذراً) صارت سودااء وغامقة جداً خصوصا اني استخدم موس ف الحلاقة فزادت المنطقه سوء،، ومن هنا قلت لازم أحاول أغيّر شوي مو شرط تبييض أهم شي تفتيح ونعومه وبعدها مع مرور الوقت مع الاهتمام بإذن الله بتصير بيضاء،،
حالياً صار لي اسبوع اتبع نظامي ف التفتيح والحمد لله مرتاحه عليه ولاحظت نعومه وتفتيح بسيط وان شاء الله مع الاستمرار بوصل للنتيجه المطلوبه،،
أولاً : حطيت ف علبة نظيفة (ملعقتين فازلين +ملعقتين جلسرين سائل +ملعقة زيت خروع +ملعقة زيت لوز حلو) وأول ما اصحى الصباح أخذ من الخليط ف إيدي وأدهن المنطقة كامل من الامام للخلف وأفركه شوي لين تتشربه البشره ؤالبس ملابسي عادي واكمل شغلي،،
ثانيا : قبل لا استحم الظهر اخذ شوي ف ايدي ملعقة صغيرة ملح الحليب +ملعقة صغيرة قهوة عربيه وارطب المنطقة بشوي ماي وأقشر المنطقة بحركات خفيفه مدة دقيقتين فقط لا وحدة تجرح نفسها وتدعي عليّ ،، وبعدها اغسل المنطقة بصابونة بابايا واجفف المنطقة زين ..
ثالثاً : بعد ما أخلص تجفيف المنطقة طبعا بتكون نظيفة ومقشرة وبتستقبل أي ماسك،، احط عليها (ملعقة جل صبار+ ملعقة عصير ليمون) وامسح بقطنة نظيفة من الخليط وامسح فيها المنطقة كامل كلما ينشف امسح مرة لحد ما تخلص الكمية واخليه ينشف ربع ساعه وبعدها اغسله بماء فقط،،
واحيانا أبدل بين خلطتين يا أني استخدم جل صبار مع عصير ليمون أو ( ملعقة لبن مع ربع ملعقة صغيرة كركم) وبنفس طريقة الصبار والليمون،،
رابعاً: بعد ما اغسل المنطقة من الخلطة بالماء فقط انشف زين وارش عليها ماء ورد وأخليه ينشف وبعدها أخذ قطرة زيت لوز مع قطرة زين فيتامين e وادهن المنطقة وبس،، وممكن تستخدمي واحد منهم اذا مو متوفرين معك الاثنين..
هذا النظام اتبعته اسبوع يومياً ولاحظت نعومة وتفتيح بسيط وبكمل الاسبوع الثاني يوم ايه ويوم لا،، وبعدها ف الاسبوع ثلاث ايام وعاد استمري ع ثلاث ايام ف الاسبوع لحد ما توصلي النتيجه اللي تبيها،،
ولا تنسون تنشيف المنطقة بعد كل حمام ( اعزكم الله)..
صح الخطوات ممكن تشوفوها طويلة وصعبة لكن صدقوني لما تسووها سهله وبسيطه،، وان شاء الله اسبوع وبتلاحظي النتيجه خصوصاً اللي مثلي سواااد،، خصوصا النعومه بتلاحظوها ع طول،، اما اللي شوي افتح أكيد بتلاحظ نتيجه أسرع،، ودعواتكم لي بالذرية الصالحه..
صح نسيت اقولكم أنا من بلغت وتزوجت وللحين ما عمري حطّيت غسول للمنطقة أبداً صراحه ما اقتنع فيها بس نهاية كل اسبوع اتشطف بماء وملح فقط،، امهاتنا وجداتنا لا عرفت كيرفري ولا غيره وما شاء الله عليهم لا التهابات ولا سواد ولا شي،، وصراحه اقتنعت بالطبيعه ومستحيل استخدم كريمات تفتيح للمنطقه،، غير الاشياء الطبيعه ما بستخدم حتى لو تأخرت النتايج اهم شي اشياء اضمنها انها ما تضرني،،
واعذروني طولّت عليكم ويمكن الموضوع ما مرتب بس حاولت أوصل لكم المعلومه،، ولا تنسوني بالدعاء بالحمل السليم المعافى....